ଗଞ୍ଜାମ,୯।୧(ଡି.ଏନ୍.ଏ.): ଗଞ୍ଜାମ ଥାନା ଅନ୍ତର୍ଗତ ୱାର୍ଡ ନଂ. ୩ ଦୁର୍ଗାଦେୀ ସାହିର ବିଶ୍ୱନାଥ ପାଢ଼ୀଙ୍କ ଘରୁ ଶୁକ୍ରବାର ବିଳମ୍ବିତ ରାତିରେ ଚୋରି ଉଦ୍ୟମ ପଣ୍ଡ ହୋଇଥିଲା। ଏ ନେଇ ଶନିବାର ବିଶ୍ୱନାଥ ଗଞ୍ଜାମ ଥାନାରେ ଲିଖିତ ଅଭିଯୋଗ କରିଛନ୍ତି ।
ପ୍ରକାଶ ଯେ, ଘର କବାଟ କଟାଯାଉଥିବା ଶବ୍ଦ ଶୁଣି ପରିବାର ଲୋକଙ୍କ ନିଦ ଭାଙ୍ଗିଯାଇଥିଲା । ଏହି ସମୟରେ ଦୁର୍ବୃତ୍ତମାନେ କବାଟ କଣା କରୁଥିବା ଦେଖି ପରିବାର ଲୋକେ ପାଟି କରିଥିଲେ। ପାଟିଶୁଣି ସେମାନେ ଦୌଡ଼ି ପଳେଇ ଯାଇଥିଲେ ବୋଲି ବିଶ୍ୱନାଥ ଏତଲାରେ ଦର୍ଶାଇଛନ୍ତି ।
ଗତ କିଛି ଦିନ ହେବ ବାହାର ରାଜ୍ୟର କିଛି ପରିବାର ଗଞ୍ଜାମ ସହର ବଡ଼ ବଜାର ମିନିଷ୍ଟାଡିୟମ ଠାରେ ଶାଳ କରି ଲୁହାରେ କାତି, ପନିକି ଇତ୍ୟାଦି ବିକ୍ରି କରୁଛନ୍ତି । ଦିନରେ ସେମାନେ ଉକ୍ତ କାମ କରିବା ପରେ ରାତିରେ ଚୋରି କରୁଥିବା ସ୍ଥାନୀୟ ଲୋକେ ସନ୍ଦେହ କରୁଛନ୍ତି l ଗତବର୍ଷ ମଧ୍ୟ ଏହି ଶୀତ ଦିନରେ ଏମାନେ ଗଞ୍ଜାମରେ ପହଞ୍ଚିବା ପରେ ବିଭିନ୍ନ ସାହିରେ ଚୋରି ହୋଇଥିଲା । ଏଣୁ ପୋଲିସ ଏମାନଙ୍କୁ ଥାନାକୁ ଡାକି ତଦନ୍ତ କରିବାକୁ ଅଞ୍ଚଳବାସି ଦାବି କରିଛନ୍ତି ।
