ନୂଆଦିଲ୍ଲୀ,୧୦ା୫:ଭାରତରେ ସାଧାରଣ ନିର୍ବାଚନ ଚାଲିଥିବାବେଳେ ଆମେରିକା ଏଥିରେ ହସ୍ତକ୍ଷେପ କରି ରାଜନୈତିକ ଅସ୍ଥିରତା ସୃଷ୍ଟି ଲାଗି ଉଦ୍ୟମ କରୁଛି ବୋଲି ରୁଷିଆ ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ କୁହାଯାଇଛି। ଖଲିସ୍ତାନୀ ନେତା ଗୁରପତଓ୍ବନ୍ତ ସିଂ ପନ୍ନୁନ ହତ୍ୟା ଉଦ୍ୟମ ପଛରେ ନୂଆଦିଲ୍ଲୀ ସମ୍ପୃକ୍ତ ଥିବା ଅଭିଯୋଗର ନିର୍ଭରଯୋଗ୍ୟ ପ୍ରମାଣ ଆମେରିକା ଏପର୍ଯ୍ୟନ୍ତ ଦେଇ ନ ଥିବାବେଳେ ଭାରତର ଧର୍ମୀୟ ସ୍ବାଧୀନତା ଉପରେ ୟୁକ୍ତରାଷ୍ଟ୍ରର ରିପୋର୍ଟ ନିରାଧାର ବୋଲି ରୁଷିଆ ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ମାରିଆ ଜାଖାରୋଭା କହିଛନ୍ତି। ଭାରତର ଜାତୀୟ ମାନସିକତା ଏବଂ ଇତିହାସ ସମ୍ପର୍କରେ ଆମେରିକା ପାଖରେ ବୁଝାମଣାର ଅଭାବ ରହିଥିବାରୁ ଏଭଳି ଭିତ୍ତିହୀନ ରିପୋର୍ଟ ପ୍ରକାଶ କରୁଥିବା ଜାଖାରୋଭା ମତ ଦେଇଛନ୍ତି।
ଆମେରିକା କମିଶନ ଅନ୍ ଇଣ୍ଟରନ୍ୟାଶନାଲ ରିଲିଜିଅସ୍ ଫ୍ରିଡମ୍ (ୟୁଏ୍ସିଆଇଆର୍ଏଫ୍) ପକ୍ଷରୁ ନିକଟରେ ପ୍ରକାଶିତ ରିପୋର୍ଟରେ ଭରତକୁ ଧର୍ମୀୟ ସ୍ବାଧୀନତା ଉଲ୍ଲଂଘନ ଏବଂ ଅନ୍ୟାନ୍ୟ ପ୍ରସଙ୍ଗରେ ସମାଲୋଚନା କରାଯାଇଥିଲା। ଭାରତ ସମେତ ୧୬ଟି ଦେଶ ଧର୍ମୀୟ ସ୍ବାଧୀନତା ଓ ବିଶ୍ୱାସ ଅଧିକାରର ଗୁରୁତର ଉଲ୍ଲଂଘନ ହେଉଥିବାରୁ ସେଗୁଡ଼ିକୁ ‘ନିର୍ଦ୍ଦିଷ୍ଟ ଚିନ୍ତାଜନକ ଦେଶ’ ତାଲିକାରେ ସାମିଲ କରିବାକୁ ଉକ୍ତ ରିପୋର୍ଟରେ ଆହ୍ବାନ ଦିଆଯାଇଥିଲା। ଏଭଳି ରିପୋର୍ଟକୁ ବହିର୍ବ୍ୟାପାର ମନ୍ତ୍ରଣାଳୟ ଦୃଢ଼ ବିରୋଧ କରିଥିଲା। ଉକ୍ତ ରିପୋର୍ଟ ପକ୍ଷପାତ ବୋଲି ମନ୍ତ୍ରଣାଳୟ କହିବା ସହ ଦେଶର ବାର୍ଷିକ ରିପୋର୍ଟର କିଛି ଅଂଶକୁ ବାହାନା କରି ୟୁଏସ୍ସିଆଇଆର୍ଏଫ୍ ଭାରତ ବିରୋଧୀ ପ୍ରଚାର କରିଆସୁଥିବା ମନ୍ତ୍ରଣାଳୟ କହିଥିଲା।
ପନ୍ନୁନ ହତ୍ୟା ପାଇଁ ଭାରତୀୟ ଗୋଇନ୍ଦା ଅଧିକାରୀ ଯୋଜନା କରିଥିବା ନେଇ ଆମେରିକାର ଅଭିଯୋଗକୁ ମଧ୍ୟ ରୁଷିଆ ଅଧିକାରୀ ଖଣ୍ଡନ କରିଛନ୍ତି। ପନ୍ନୁନ ହତ୍ୟା ଉଦ୍ୟମ ପଛରେ ଭାରତୀୟ ନାଗରିକଙ୍କ ସମ୍ପୃକ୍ତି ଥିବା ନେଇ ଏପର୍ଯ୍ୟନ୍ତ ଓ୍ବାଶିଂଟନ କୌଣସି ପ୍ରମାଣ ଦେଇପାରି ନାହିଁ। ବିନା ପ୍ରମାଣରେ ଉକ୍ତ ପ୍ରସଙ୍ଗରେ କଳ୍ପନା ଜଳ୍ପନା ଗ୍ରହଣୀୟ ନୁହେଁ ବୋଲି ଜାଖାରୋଭା କହିଛନ୍ତି।