କଟକ ଅଫିସ, ୧୬ା୪: କାନ୍ଭାସ ପରିବର୍ତ୍ତେ ପତ୍ର, ବାଦାମ, ନଡ଼ିଆ ଆଦିରେ ଶ୍ରୀଜଗନ୍ନାଥଙ୍କ ଚିତ୍ର ଆଙ୍କି ଚର୍ଚ୍ଚାରେ କଟକ ଦରଘାବଜାର ଜେଲ୍ରୋଡ଼ ଅଞ୍ଚଳର ଭାଗ୍ୟଶ୍ରୀ ବେହେରା ା ରାଜେନ୍ଦ୍ର ବେହେରା ଓ ଉଷାରାଣୀ ବେହେରାଙ୍କ ଏକମାତ୍ର ଝିଅ ଭାଗ୍ୟଶ୍ରୀ ଜଣେ ବ୍ୟାକିଂ ଛାତ୍ରୀ। ହେଲେ ଚିତ୍ର ଆଙ୍କିବା ପ୍ରତି ପିଲାବେଳୁ ତାଙ୍କର ଆଗ୍ରହ ରହିଛି। ସେ ଅଶ୍ୱତ୍ଥ ପତ୍ରରେ ଶ୍ରୀଜଗନ୍ନାଥଙ୍କ କଳାକୃତି ଆଙ୍କିଛନ୍ତି। ହେଲେ ଏଥିପାଇଁ ସେ କୌଣସି ପ୍ରଶିକ୍ଷଣ ନେଇନାହାନ୍ତି। ଏ ସମ୍ପର୍କରେ ଭାଗ୍ୟଶ୍ରୀ କହିଛନ୍ତି, ପ୍ରଥମେ କାନ୍ଭାସରେ ଚିତ୍ର ଆଙ୍କୁଥିଲି। କିଛି ମାସ ହେବ ଅଶ୍ୱତ୍ଥ ପତ୍ରରେ ଶ୍ରୀଜଗନ୍ନାଥଙ୍କ ଚିତ୍ର ଆଙ୍କିବା ଆରମ୍ଭ କରିଛି। ଏହା ମୋତେ ସ୍ବତନ୍ତ୍ର ପରିଚୟ ଦେଇଛି। ପ୍ରଥମେ ବାଡ଼ିରେ ଥିବା ଅଶ୍ୱତ୍ଥ ଗଛରୁ ପତ୍ର ଆଣି ୨୫ରୁ ୩୦ ଦିନ ପର୍ଯ୍ୟନ୍ତ ପାଣିରେ ଭିଜାଇଥାଏ। ପରେ ପତ୍ରର ଉପରସ୍ତରକୁ ସଫା କରି ଶୁଖାଇଥାଏ। ଏହାପରେ ତାହାକୁ ଚିତ୍ରକଳା ପାଇଁ ବ୍ୟବହାର କରେ। ପତ୍ରରେ ଶ୍ରୀଜଗନ୍ନାଥଙ୍କ ଭଳି ଶିବ, ହନୁମାନ ଆଦି ଅନେକ ଠାକୁରଙ୍କ ଚିତ୍ର ଆଙ୍କିଛି। ସେହିପରି ବାଦାମ, ନଡିଆରେ ମଧ୍ୟ ଚିତ୍ର ଆଙ୍କିଛି ବୋଲି ସେ କହିଛନ୍ତି।