ମାହାଙ୍ଗା, ୧୭ା୮ (ଯଯାତି ସିଂହ)କଟକ ଜିଲା ମାହାଙ୍ଗା ବ୍ଲକ ଅନ୍ତର୍ଗତ ଏକ ବିଦ୍ୟାଳୟର ଦଶମ ଶ୍ରେଣୀ ଛାତ୍ରୀଙ୍କ ସନ୍ଦେହଜନକ ମୃତ୍ୟୁ ଘଟିଥିଲା। ମୃତ୍ୟୁର ୨ ମାସ ପରେ ଏକ ଅଡିଓ କ୍ଲିପ୍ ଭାଇରାଲ ହେବାରେ ଲାଗିଛି। ଯେଉଁ ଅଡିଓରେ ନାବାଳିକାଙ୍କ ମୃତ୍ୟୁକୁ ନେଇ ୭୦ ହଜାର ଟଙ୍କାର ଡିଲ ହୋଇଥିବା ଶୁଣିବାକୁ ମିଳିଥିଲା। ଭାଇରାଲ ହୋଇଥିବା ଅଡିଓ କ୍ଲିପଟି ଜଣେ ବିଜେଡି ନେତାଙ୍କ ବୋଲି ଅଭିଯୋଗ ହେଉଛି। ତେବେ ଘଟଣାକୁ ନେଇ ଏବେ ଏକ ହାତଲେଖା ଚିଠି ଭାଇରାଲ ହେବାରେ ଲାଗିଛି। ଏହି ଚିଠିଟି ମୃତ ନାବାଳିକାଙ୍କ ବୋଲି ଆଲୋଚନା ହେଉଛି। ତେବେ ଏହି ଚିଠିରେ ସ୍ପଷ୍ଟ ଭାବେ ଲେଖା ଅଛି, ମୃତ ନାବାଳିକାଙ୍କୁ ଜୀବନରୁ ମାରିବାକୁ ତାଙ୍କର ବାପା ବିଷ ଖାଇବାକୁ ଦେଇଛନ୍ତି। ଅପରପକ୍ଷେ ଭାଇରାଲ ଅଡିଓରେ ମୃତ ନାବାଳିକା ରଶି ଦେଇ ଆତ୍ମହତ୍ୟା କରିଥିବା ଶୁଣିବାକୁ ମିଳୁଥିବା ବେଳେ ଭାଇରାଲ ଚିଠିରେ ବିଷ ଦେଇ ମାରିବାକୁ ଉଦ୍ୟମ କରାଯାଉଥିବା ଲେଖା ଅଛି। ଏଭଳିସ୍ଥିତିରେ ମଙ୍ଗଳବାର ଏକ ଖବରଦାତା ସମ୍ମିଳନୀରେ ମୃତ ନାବାଳିକାଙ୍କ ବାପା କହିଛନ୍ତି, ବାତ ମାରିବାରୁ ଝିଅର ମୃତ୍ୟୁ ଘଟିଛି। ଅନ୍ୟପକ୍ଷରେ ଏହି ଘଟଣାରେ ସବୁଠାରୁ ବେଶୀ ସନ୍ଦେହ ଘେରକୁ ଆସିଛନ୍ତି ଜଣେ ବିଜେଡି ନେତା। ଫଳରେ ପୋଲିସ ଘଟଣା ସମ୍ପର୍କରେ ଅବଗତ ଥିଲେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ପଛଘୁଞ୍ଚା ଦେଉଛି। ଏପରିସ୍ଥିତିରେ ବୁଧବାର ଥାନାରେ ପରିବାର ଲୋକ ପହଞ୍ଚତ୍ ଆଇଆଇସିଙ୍କୁ ଭେଟି ଘଟଣା ସମ୍ପର୍କରେ ଏକ ଲିଖିତ ଏତଲା ଦେଇଛନ୍ତି।