ନୂଆଦିଲ୍ଲୀ, ୧୫।୭: ଚଳିତ ବର୍ଷ ଅଗଷ୍ଟ ୧୫ରେ ଲାଲ୍ କିଲ୍ଲାରେ ହେବାକୁ ଥିବା ସ୍ବାଧୀନତା ଦିବସ ଉତ୍ସବରେ ଛୋଟ ପିଲା ଯୋଗଦେବେ ନାହିଁ। ସେମାନଙ୍କ ବଦଳରେ ୧୫୦୦ କରୋନ ବିଜେତା ଉତ୍ସବରେ ଉପସ୍ଥିତ ରହିବେ। କରୋନାକୁ ପରାଜିତ କରି ସୁସ୍ଥ ହୋଇଥିବା ଏହି ବ୍ୟକ୍ତିମାନେ ସ୍ବାଧୀନତା ଦିବସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭାଷଣ ଶୁଣିବାର ସୁଯୋଗ ପାଇବେ। ଏହି କରୋନା ବିଜେତାଙ୍କ ମଧ୍ୟରେ ୫୦୦ ଜଣ ପୋଲିସ ରହିଛନ୍ତି। ସେହିପରି ୧୦୦୦ଜଣ କରୋନା ବିଜେତା ଦେଶର ଭିନ୍ନ ଭିନ୍ନ ଅଞ୍ଚଳରୁ ଆସିବେ। ଚଳିତ ବର୍ଷ କେବଳ ୨୦ ପ୍ରତିଶତ ଭିଭିଆଇପି ଏବଂ ଅନ୍ୟ ଲୋକଙ୍କୁ ଉତ୍ସବରେ ଯୋଗଦେବାର ଅନୁମତି ମିଳିବ। ଇତିମଧ୍ୟରେ ପ୍ରତିରକ୍ଷା ସଚିବ ଅଜୟ କୁମାର ଏବଂ ଏଏସ୍ଆଇ ମହାନିର୍ଦ୍ଦେଶକ ବି.ବିଦ୍ୟାବତୀ ଲାଲ୍ କିଲ୍ଲାଠାରେ ହେବାକୁ ଥିବା ସ୍ବାଧୀନତା ଦିବସ ଉତ୍ସବର ପ୍ରସ୍ତୁତି କାର୍ଯ୍ୟ ବୁଲି ତଦାରଖ କରିଛନ୍ତି। ଉତ୍ସବରେ କେବଳ ୧୦୦ ଜଣ ଭିଭିଆଇପି ଯୋଗଦେବେ। ସୂଚନାଯୋଗ୍ୟ, ପୂର୍ବରୁ ସ୍ବାଧୀନତା ଦିବସ ଉତ୍ସବରେ ୧୦ ହଜାର ଲୋକ ଯୋଗଦେଉଥିଲେ। ତେବେ କରୋନା ସଂକ୍ରମଣକୁ ଦୃଷ୍ଟିରେ ରଖି ଏଭଳି ପଦକ୍ଷେପ ଗ୍ରହଣ କରାଯାଇଛି।
