ଦୁଷ୍ଟ ଶାସକ ଔରଙ୍ଗଜେବଙ୍କ କବର ଉପରେ ବୁଲ୍‌ଡୋଜର ଚଢ଼ାଇ ଦିଆଯାଉ…ରାମଭଦ୍ରାଚାର୍ଯ୍ୟଙ୍କ ଦାବି

ନୂଆଦିଲ୍ଲୀ,୫।୩: ମହାରାଷ୍ଟ୍ର ସମାଜବାଦୀ ପାର୍ଟି ଅଧ୍ୟକ୍ଷ ଅବୁ ଆଜମୀ ଔରଙ୍ଗଜେବଙ୍କୁ ମହାନ କହି ବିବାଦରେ ଫସିଛନ୍ତି। ରାଜନେତାଙ୍କଠାରୁ ଆରମ୍ଭ କରି ଧାର୍ମିକ ନେତା ପର୍ଯ୍ୟନ୍ତ, ସମସ୍ତେ ତାଙ୍କ ବକ୍ତବ୍ୟକୁ ସମାଲୋଚନା କରୁଛନ୍ତି। ଏହି କ୍ରମରେ ତୁଳସୀ ପୀଠର ମୁଖ୍ୟ ରାମଭଦ୍ରାଚାର୍ଯ୍ୟ ଏକ ବଡ଼ ବୟାନ ଦେଇଛନ୍ତି। ଔରଙ୍ଗଜେବଙ୍କ ସମାଧି ଉପରେ ବୁଲଡୋଜର ଚଢ଼ାଇଦେବା ଉଚିତ। କାରଣ ସେ ଜଣେ ଅତ୍ୟନ୍ତ ନିଷ୍ଠୁର, ହିଂସ୍ର ଏବଂ ଦୁଷ୍ଟ ଶାସକ ଥିଲେ। ସେ ହଜାର ହଜାର ନିର୍ଦ୍ଧୋଷ ଲୋକଙ୍କୁ ହତ୍ୟା କରିଥିଲେ ବୋଲି ସେ କହିଛନ୍ତି।

ରାମଭଦ୍ରାଚାର୍ଯ୍ୟ କହିଛନ୍ତି, ଔରଙ୍ଗଜେବ ହଜାର ହଜାର ବ୍ରାହ୍ମଣଙ୍କଠାରୁ ପଇତା ବାହାର କରିଦେଇଥିଲେ। ହଜାର ହଜାର ବ୍ରାହ୍ମଣଙ୍କ ମୁଣ୍ଡକାଟ କରାଯାଇଥିଲା। ସମଗ୍ର ଦେଶ ଧ୍ୱସ୍ତବିଧ୍ୱସ୍ତ ହୋଇଯାଇଥିଲା। ଔରଙ୍ଗଜେବ ଆମର ଆଦର୍ଶ ନୁହନ୍ତି, ଆମର ଆଦର୍ଶ ହେଉଛନ୍ତି ଶିବାଜୀ ଏବଂ ରାଣା ଜୀ। ଆମର ଆଦର୍ଶ ହେଉଛନ୍ତି ପ୍ରଭୁ ରାମ ଏବଂ କୃଷ୍ଣ। କେବେଠାରୁ ଔରଙ୍ଗଜେବ ଆମର ଆଦର୍ଶ ହୋଇଗଲେ? ଔରଙ୍ଗଜେବ କୌଣସି ମନ୍ଦିର ନିର୍ମାଣ କରି ନ ଥିଲେ।

ଔରଙ୍ଗଜେବ ବାଲାଜୀ ମନ୍ଦିରରେ ମହୁମାଛି ଆକ୍ରମଣ କରିବାରୁ ଦୌଡ଼ି ପଳାଇଥିଲେ। ସେ କୌଣସି ସ୍ଥାନରେ କୌଣସି ମନ୍ଦିର ନିର୍ମାଣ କରି ନ ଥିଲେ। ଔରଙ୍ଗଜେବଙ୍କ କବରସ୍ଥାନକୁ ବୁଲଡୋଜର ଚଢ଼ାଇ ଭାଙ୍ଗି ଦେବା ପାଇଁ ସାଧୁସନ୍ଥମାନେ ଯେଉଁ ଦାବି କରୁଛନ୍ତି, ତାହା ଏକ ବହୁତ ଭଲ ନିଷ୍ପତ୍ତି। ଅଖିଳେଶ ଯାଦବ ଏହି କାର୍ଯ୍ୟକୁ ଭୁଲ ବୋଲି କହିଛନ୍ତି, ଏହା ତାଙ୍କର ନିଜସ୍ବବୁଦ୍ଧି। ସେ କାହିଁକି ବୁଝିପାରୁନାହାଁନ୍ତି ତାହା ପରମେଶ୍ୱର ଜାଣନ୍ତି।

ଆପଣଙ୍କୁ କହି ରଖୁଛୁ ଯେ ମହାରାଷ୍ଟ୍ରରେ, ମୋଗଲ ସମ୍ରାଟ ଔରଙ୍ଗଜେବଙ୍କୁ ମହାନ କହିବା ପାଇଁ ଏସପି ବିଧାୟକ ଆବୁ ଆଜମୀଙ୍କୁ ୨୬ ମାର୍ଚ୍ଚରେ ଶେଷ ହେଉଥିବା ବଜେଟ ଅଧିବେଶନର ଅବଶିଷ୍ଟ ଅବଧି ପାଇଁ ମହାରାଷ୍ଟ୍ର ବିଧାନସଭାରୁ ନିଲମ୍ବିତ କରାଯାଇଛି। ଆଜମୀ କହିଛନ୍ତି ଯେ ତାଙ୍କ ପ୍ରତି ଅନ୍ୟାୟ ହୋଇଛି। ବୟାନ ପ୍ରତ୍ୟାହାର କରିବା ସତ୍ତ୍ୱେ, ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।

ଏହାଛଡ଼ା ସୋସିଆଲ ମିଡିଆ ପ୍ଲାଟଫର୍ମ X ରେ ଏକ ପୋଷ୍ଟରେ ଆଜମୀ କହିଛନ୍ତି ଯେ ତାଙ୍କ ବକ୍ତବ୍ୟକୁ ବିକୃତ କରାଯାଇଛି। ସେ ଔରଙ୍ଗଜେବଙ୍କ ବିଷୟରେ ଯାହା କହିଥିଲେ ତାହା ଐତିହାସିକମାନେ ଉଲ୍ଲେଖ କରିଛନ୍ତି। ସେ ଶିବାଜୀ ମହାରାଜ, ସମ୍ଭାଜୀ ମହାରାଜ କିମ୍ବା ଦେଶର ଅନ୍ୟ କୌଣସି ବ୍ୟକ୍ତିତ୍ୱଙ୍କ ବିରୋଧରେ କୌଣସି ଅପମାନଜନକ ମନ୍ତବ୍ୟ ଦେଇନାହାଁନ୍ତି। ଯଦି ତାଙ୍କ ମନ୍ତବ୍ୟ ଦ୍ୱାରା କାହାକୁ ଆଘାତ ଲାଗିଛି, ତେବେ ସେ ତାଙ୍କର ବୟାନ ଫେରାଇ ନେଉଛନ୍ତି ବୋଲି କହିଛନ୍ତି।