ସିଡନୀ,୭।୧: ସିଡନୀରେ ଅଷ୍ଟ୍ରେଲିଆ ଏବଂ ଇଂଲଣ୍ଡ ମଧ୍ୟରେ ଆଶେସର ଚତୁର୍ଥ ଟେଷ୍ଟ ଖେଳାଯାଉଛି। ମ୍ୟାଚ୍ର ତୃତୀୟ ଦିନରେ ଏକ ନିଆରା ଘଟଣା ଦେଖିବାକୁ ମିଳିଥିଲା। କ୍ଲିନ୍ ବୋଲ୍ଡ ହେବା ପରେ ବି ବ୍ୟାଟ୍ସମ୍ୟାନ୍ ନଟ୍ଆଉଟ୍ ରହିଥିଲେ। ସମସ୍ତେ ଏହା ଦେଖି ଆଶ୍ଚର୍ଯ୍ୟ ହୋଇଯାଇଥିଲେ। ଏହି ଘଟଣା ଇଂଲଣ୍ଡର ଅଲରାଉଣ୍ଡର ବେନ ଷ୍ଟୋକ୍ସଙ୍କ ସହ ଘଟିଥିଲା ଏବଂ ସେ ଏହାର ସମ୍ପୂର୍ଣ୍ଣ ଫାଇଦା ମଧ୍ୟ ନେଇଥିଲେ।
ସିଡନୀ ଟେଷ୍ଟର ତୃତୀୟ ଦିନରେ ଇଂଲଣ୍ଡ ଦଳ ବ୍ୟାଟିଂ କରିଥିଲା। ମଧ୍ୟାହ୍ନ ଭୋଜନ ପରେ ବେନ ଷ୍ଟୋକ୍ସ ଏବଂ ଜନି ବେୟାରଷ୍ଟୋ କ୍ରିଜରେ ଥିଲେ। ଇଂଲଣ୍ଡର ପ୍ରଥମ ଇନିଂସର ୩୧ ତମ ଓଭରରେ କ୍ୟାମେରନ ଗ୍ରୀନ ବୋଲିଂ କରିବାକୁ ଆସିଥିଲେ। ଇଂଲଣ୍ଡ ଅଲରାଉଣ୍ଡର ଷ୍ଟୋକ୍ସ ଷ୍ଟ୍ରାଇକରେ ଥିଲେ। ଗ୍ରୀନ୍ ଓଭରର ପ୍ରଥମ ବଲକୁ ବୋଲିଂ କରିଥିଲେ। ଷ୍ଟୋକ୍ସ ଭିତରକୁ ଆସୁଥିବା ସେହି ବଲ ଉପରେ ସଟ ଖେଳି ନ ଥିଲେ। ବଲ ଅଫ ଷ୍ଟମ୍ପକୁ ଧକ୍କା ଦେଇ ଉଇକେଟ ପଛରେ ଯାଇଥିଲା। କିନ୍ତୁ ଅମ୍ପାୟର କିମ୍ବା ଅଷ୍ଟ୍ରେଲୀୟ ଫିଲ୍ଡରମାନେ ଏହା ବୁଝିପାରିଲେ ନାହିଁ।
କଙ୍ଗାରୁ ଦଳ କ୍ୟାଚ ଆଉଟ ପାଇଁ ଏକ ଦୃଢ ଆବେଦନ କରିଥିଲା। ଅମ୍ପାୟାର୍ ପଲ ରାଇଫଲ ମଧ୍ୟ ତାଙ୍କ ଆଙ୍ଗୁଠି ଉଠାଇଲେ। କେବଳ ଷ୍ଟୋକ୍ସ ସତ୍ୟତା ଜାଣିଥିଲେ। ସେଥିପାଇଁ ସେ ତୁରନ୍ତ ଡିଆରଏସ୍ ନେଇଥିଲେ। ତୃତୀୟ ଅମ୍ପାୟାର ଷ୍ଟୋକ୍ସଙ୍କୁ ନଟ୍ଆଉଟ୍ ଦେଇଥିଲେ।
ଟିଭି ରିପ୍ଲେ ସ୍ପଷ୍ଟ ଭାବରେ ଦେଖାଯାଇଥିଲା ଯେ ଗ୍ରୀନଙ୍କ ବଲ ଷ୍ଟୋକ୍ସଙ୍କ ବ୍ୟାଟକୁ ନୁହେଁ, ବରଂ ସିଧାସଳଖ ଅଫ ଷ୍ଟମ୍ପକୁ ଧକ୍କା ଦେଇଥିଲା। କୌତୁହଳର ବିଷୟ ହେଉଛି ବଲ ଏତେ ବେଗରେ ଉଇକେଟ ବାଜିଲା କିନ୍ତୁ ଷ୍ଟମ୍ପ ବେଲ୍ ପଡି ନ ଥିଲା। ଷ୍ଟୋକ୍ସ ନିଜେ ମଧ୍ୟ ଏଥିରେ ଆଶ୍ଚର୍ଯ୍ୟ ହୋଇଗଲେ। ସେ ତାଙ୍କ କପାଳକୁ ପିଟି ଥିଲେ। ସେତେବେଳେ ସେ ୧୬ ରନ୍ରେ ଖେଳୁଥିଲେ। ପରେ ସେ ତାଙ୍କର ଅର୍ଦ୍ଧଶତକ ପୂରଣ କରିଥିଲେ। ମାଷ୍ଟରବ୍ଲାଷ୍ଟର ସଚିନ ତେନ୍ଦୁଲକର ମଧ୍ୟ ଏହି ଘଟଣାକୁ ନେଇ ଆଶ୍ଚର୍ଯ୍ୟପ୍ରକଟ କରିଛନ୍ତି।