ମେଲବୋର୍ନ,୩୧।୧୨: ଆଡିଲେଡ୍ରେ ଅଷ୍ଟ୍ରେଲିଆଠାରୁ ଲଜ୍ଜାଜନକ ପରାଜୟର ସମ୍ମୁଖୀନ ହେବା ପରେ ମେଲବୋର୍ନରେ ଜିତି ପ୍ରତିଶୋଧ ନେଇଛି ଭାରତୀୟ ଟିମ୍। ବିଶେଷକରି ଷ୍ଟିଭ୍ ସ୍ମିଥ୍ ଏବଂ ମାର୍ନସ ଲାବୁସେନଙ୍କ ଭଳି ବ୍ୟାଟ୍ସମ୍ୟାନ୍ଙ୍କ ପାଇଁ ଦଳ ଆପଣାଇଥିବା ରଣନୀତି ଫଳପ୍ରଦ ହୋଇଛି ବୋଲି ଘରୋଇ ଦଳ ସ୍ବୀକାର କରିଛି।
ଭାରତ ଏଯାବତ ସ୍ମିଥ ଏବଂ ମାର୍ନସଙ୍କୁ ଖେଳିବାକୁ ଅବସର ଦେଇନାହିଁ। ଲେଗ୍ ଷ୍ଟମ୍ରେ ବଲ୍ ପକାଇବା ରଣନୀତି ଯୋଗୁ ଉଭୟ ବ୍ୟାଟିଂ କରିପାରୁନାହାନ୍ତି। ଘରୋଇ ଟିମ୍ର ସହାୟକ କୋଚ୍ ମେକ୍ଡୋନାଲ୍ଡ ଗୁରୁବାର ଖବରଦାତାଙ୍କୁ କହିଛନ୍ତି, ସ୍ମିଥ୍ଙ୍କ ଉପରେ ଜଲଦି କୌଣସି ରାୟ ଦେବାକୁ ଚାହୁଁନାହିଁ। ସେ ଚଳିତ ସିରିଜ୍ରେ ସଂଘର୍ଷ କରୁଥିବା କଥା ସତ। ବକ୍ସିଂ ଡେ ଟେଷ୍ଟ ମ୍ୟାଚ୍ରେ ପ୍ରଥମ ଚାରି ବଲ୍ ସେ ଖେଳିଥିଲେ। ସେଥିରେ ଭଲ କରିଥିଲେ। ଭାରତ ଯେଉଁଭଳି ରଣନୀତି ପ୍ରସ୍ତୁତ କରିଛି ଏବଂ ଉଭୟ ଖେଳାଳିଙ୍କୁ କାବୁ କରିଛି, ତାହା ମୋ ପାଇଁ ପ୍ରଶ୍ନ ପାଲଟିଛି। ସେମାନଙ୍କୁ କିଛି ଭଲ କରିବାକୁ ହେବ। ରଣନୀତିରୁ ବାହାରିବାକୁ ହେବ। ଫିଲ୍ଡିଂରେ ପରିବର୍ତ୍ତନ ଯୋଗୁ ମଧ୍ୟ ସେମାନେ ଅସୁବିଧାର ସମ୍ମୁଖୀନ ହେଉଛନ୍ତି। ଲଗାତାର ଏପରି କରୁଥିବା ଯୋଗୁ ଏବେ ସେମାନଙ୍କୁ ନିଜର ଖେଳ ଉପରେ ନଜର ରଖିବାକୁ ହେବ ବୋଲି ସହାୟକ କୋଚ୍ କହିଛନ୍ତି।