ଭୁବନେଶ୍ୱର, ୧୭।୧(କ୍ରୀଡ଼ା ପ୍ରତିନିଧି): କଳିଙ୍ଗ ଷ୍ଟାଡିୟମରେ ଚାଲିଥିବା ହକି ବିଶ୍ୱକପ୍ର ସୋମବାର ଅନୁଷ୍ଠିତ ଅଷ୍ଟ୍ରେଲିଆ-ଆର୍ଜେଣ୍ଟନା ଗୁରୁତ୍ୱପୂର୍ଣ୍ଣ ମ୍ୟାଚ୍ ୩-୩ ଗୋଲରେ ଡ୍ର ରହିଛି। ଫଳରେ ଉଭୟ ଦଳ ଗୋଟିଏ ଲେଖାଏ ପଏଣ୍ଟ ଭାଗ କରିଛନ୍ତି। ବିଶ୍ୱର ନମ୍ବର ୱାନ୍ ଦଳ ଆରମ୍ଭରୁ ଗୋଲ ସ୍କୋର କରି ଆଗୁଆ ରହିଥିଲେ ହେଁ ଆର୍ଜେଣ୍ଟିନା କଡ଼ା ଟକ୍କର ଦେଇ ଏକଦା ବିଜୟୀ ହେବା ସ୍ଥିତି ସୃଷ୍ଟି କରିଥିଲା। ମାତ୍ର ଶେଷ ମୁହୂର୍ତ୍ତ ଗୋଲ ବଳରେ ଅଷ୍ଟ୍ରେଲିଆ ମ୍ୟାଚ୍କୁ ଡ୍ର ରଖିବାରେ ସକ୍ଷମ ହୋଇଥିଲା। ପୂରା ମ୍ୟାଚ୍ରେ ଆକର୍ଷଣୀୟ ପ୍ରଦର୍ଶନ କରିଥିବା ଆର୍ଜେଣ୍ଟିନାର ମାର୍ଟିନ ଫେରେରୋ ପ୍ଲେୟର ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି। ପୁଲ୍ ଏ’ରୁ କେଉଁ ଦଳ ସିଧାସଳଖ କ୍ୱାର୍ଟର ଫାଇନାଲରେ ପ୍ରବେଶ କରିବ ଏବଂ କେଉଁ ୨ ଦଳ କ୍ରସ୍ ଓଭର ଖେଳିବେ ତାହା ୨୦ ତାରିଖରେ ହେବାକୁଥିବା ଲିଗ୍ ମ୍ୟାଚ୍ ପରେ ସ୍ପଷ୍ଟ ହେବ। ଅଷ୍ଟ୍ରେଲିଆ ଓ ଆର୍ଜେଣ୍ଟିନା ୨ଟି ଲେଖାଏ ମ୍ୟାଚ୍ରୁ ୪ ପଏଣ୍ଟ ଲେଖାଏ ପାଇଛନ୍ତି। ତେବେ ଗୋଲ ବ୍ୟବଧାନରେ ଅଷ୍ଟ୍ରେଲିଆ ଶୀର୍ଷରେ ରହିଛି। ଫ୍ରାନ୍ସ ୩ ପଏଣ୍ଟ ପାଇ ତୃତୀୟ ସ୍ଥାନରେ ରହିଛି।
ବିଶ୍ୱର ନମ୍ବର ୱାନ୍ ଦଳ ଅଷ୍ଟ୍ରେଲିଆ ପାରମ୍ପରିକ ଷ୍ଟାଇଲରେ ଆରମ୍ଭରୁ ଆକ୍ରମଣ କରି ଖେଳିଥିଲା। ମାତ୍ର ୭ ନମ୍ବର ଦଳ ଆର୍ଜେଣ୍ଟିନା କଡ଼ା ଟକ୍କର ଦେଇଥିଲା। ଫଳରେ ୫ମ ମିନିଟରେ ଆର୍ଜେଣ୍ଟିନାକୁ ପ୍ରଥମେ ପେନାଲ୍ଟି କର୍ନର ମିଳିଥିଲା। ମାତ୍ର ଅଷ୍ଟ୍ରେଲିଆ ଡିଫେଣ୍ଡରମାନେ ଏହାର ସଫଳ ପ୍ରତିହତ କରିଥିଲେ। କାଉଣ୍ଟର ଆକ୍ରମଣ କରି ଫାଇଦାରେ ରହିଥିଲା ଟୁର୍ନାମେଣ୍ଟରେ ସର୍ବାଧିକ ପଦକ ହାସଲକାରୀ ଦଳ। ୧୦ମ ମିନିଟ୍ରେ ଦଳକୁ ମିଳିଥିବା ପେନାଲ୍ଟି କର୍ନରକୁ ଗୋଲରେ ପରିଣତ କରି ଜେରେମି ହେୱାର୍ଡ ଅଷ୍ଟ୍ରେଲିଆକୁ ଅଗ୍ରଣୀ କରାଇଥିଲେ। ଦ୍ୱିତୀୟ କ୍ୱାର୍ଟର ଆରମ୍ଭରୁ ଆର୍ଜେଣ୍ଟିନା ଗୋଲ ପରିଶୋଧ ପାଇଁ ଉଦ୍ୟମକୁ ଜୋର୍ଦାର କରିଥିଲା। ୧୯ତମ ମିନିଟ୍ରେ ଦଳ ଏକ ପେନାଲ୍ଟି କର୍ନର ହାସଲ କରିଥିଲା, ଯାହାର ସଦୁପଯୋଗ କରିଥିଲେ ଡୋମେନେ ଟୋମାସ। ସେ ଗୋଲଟି ପରିଶୋଧ କରିଦେବାରୁ ମ୍ୟାଚ୍ ୧-୧ ସ୍ଥିତିକୁ ଚାଲିଆସିଥିଲା। ମାତ୍ର ଏହାପରେ ଅଷ୍ଟ୍ରେଲିଆ ଘନ ଘନ ଆକ୍ରମଣ କରିଥିଲା। ପ୍ରଥମାର୍ଦ୍ଧ ଶେଷପର୍ଯ୍ୟନ୍ତ ବଲ୍ ପ୍ରାୟତଃ ଆର୍ଜେଣ୍ଟିନା ହାଫ୍ରେ ରହିଥିଲା। ୩୦ତମ ମିନିଟରେ ଆର୍ଜେଣ୍ଟିନା ଡି’ ଏରିଆ ମଧ୍ୟରେ ବଲ୍ ପାଇଁ ସଂଘର୍ଷ ଚାଲିଥିବାବେଳେ ୨୩ ନମ୍ବର ଖେଳାଳି ଡାନିଏଲ ବାଏଲ ଏକ ଫିଲ୍ଡ ଗୋଲ ଦେଇ ଅଷ୍ଟ୍ରେଲିଆକୁ ପୁଣି ଅଗ୍ରଣୀ କରାଇଥିଲେ। ପ୍ରଥମାର୍ଦ୍ଧ ଶେଷବେଳକୁ ଅଷ୍ଟ୍ରେଲିଆ ୨-୧ ଗୋଲରେ ଆଗୁଆ ରହିଥିଲା।
ଦ୍ୱିତୀୟାର୍ଦ୍ଧରୁ ଆରମ୍ଭ ହୋଇଥିଲା ଅସଲ ଖେଳ। ସହଜରେ ହାର୍ ମାନିବାକୁ ପ୍ରସ୍ତୁତ ନ ଥିଲା ଆର୍ଜେଣ୍ଟିନା। ୩୩ତମ ମିନିଟରେ ଏକ ଫିଲ୍ଡ ଗୋଲ ମାଧ୍ୟମରେ ଆର୍ଜେଣ୍ଟିନାର ମାଇକୋ କାସେଲା ମ୍ୟାଚ୍କୁ ସମାନ ୨-୨ ସ୍ଥିତିକୁ ନେଇ ଆସିଥିଲେ। ୪୭ତମ ମିନିଟ୍ରେ ଅଷ୍ଟ୍ରେଲିଆ କ୍ରମାଗତ ୨ଟି ପେନାଲ୍ଟି କର୍ନର ମିସ୍ କରିଥିବାବେଳେ ୪୯ତମ ମିନିଟରେ ବଲ୍ ପୋଜେଶନ ଅବସରରେ ନିଜକୁ ସମ୍ପୂର୍ଣ୍ଣ ନିୟନ୍ତ୍ରଣରେ ରଖି ଆର୍ଜେଣ୍ଟିନା ପକ୍ଷରୁ ବହୁ ମୂଲ୍ୟବାନ୍ ଗୋଲଟି ସ୍କୋର କରିଥିଲେ ମାର୍ଟିନ ଫେରେରୋ। ୫୮ତମ ମିନିଟରେ ଉଭୟ ଦଳର ଅଧିକାଂଶ ଖେଳାଳି ମଝି ପଡ଼ିଆରେ ଥିବାବେଳେ ଆର୍ଜେଣ୍ଟିନା ଡିଫେଣ୍ଡର ମାରିଥିବା ଶଟ୍କୁ ପାଖରେ ଥିବା ଅଷ୍ଟ୍ରେଲିଆର ବ୍ଲେକ୍ ଗୋଭର୍ସ ଅଟକାଇ ଦେଇଥିଲେ। ଆର୍ଜେଣ୍ଟିନା ଗୋଲପୋଷ୍ଟରେ ବଡ଼ ଗ୍ୟାପ୍ର ସୁଯୋଗ ନେଇ ସେ ବଲ୍କୁ ପୋଷ୍ଟ ମଧ୍ୟକୁ ପଠାଇବାରେ ସକ୍ଷମ ହୋଇଥିଲେ। ଫଳରେ ମ୍ୟାଚ୍ ପୁଣି ସମାନ ସ୍ତରକୁ ଅର୍ଥାତ୍ ୩-୩କୁ ଚାଲିଆସିଥିଲା।
