ମେଲବୋର୍ନ,୧୧ ।୧୨: ଅଷ୍ଟ୍ରେଲିଆରେ କରୋନା ମହାମାରୀକୁ ରୋକିବାକୁ ବିକଶିତ କରାଯାଇଥିବା ଏକ ଟିକାର କ୍ଲିନିକାଲ ଟ୍ରାଏଲକୁ ବନ୍ଦ କରି ଦିଆଯାଇଥିବା ସୂଚନା ମିଳିଛି । ଏହି ଟିକା ଦେବା ପରେ ଅଂଶଗ୍ରହଣକାରୀ ପରେ ଏଚ୍ଆଇଭିରେ ସଂକ୍ରମିତ ହୋଇଥିବା ଦେଖାଯିବାରୁ ଏହାକୁ ବନ୍ଦ କରି ଦିଆଯାଇଥିବା କୁହାଯାଉଛି । ହେଲେ ବାସ୍ତବରେ ସେ ଏଚ୍ଆଇଭିରେ ସଂକ୍ରମିତ ନ ଥିଲେ । କ୍ୱିନସଲ୍ୟାଣ୍ଡ ବିଶ୍ୱବିଦ୍ୟାଳୟ ଓ ବାୟୋଟେକ କମ୍ପାନୀ ସିଏସ୍ଏଲ ଦ୍ୱାରା ବିକଶିତ କରାଯାଇଥିବା କୋଭିଡ-୧୯ ଟିକାର ପ୍ରସ୍ତୁତିକୁ ବନ୍ଦ କରି ଦିଆଯାଇଛି । ସିଏସ୍ଏଲ ଅଷ୍ଟ୍ରେଲିଆ ଶେୟାର ବଜାରକୁ ଏହି ସମ୍ପର୍କରେ ସୂଚନା ଦେବା ସହ ଏହାର ପ୍ରସ୍ତୁତିକୁ ବନ୍ଦ କରି ଦେଇଥିବା କହିଛି । ତେବେ କମ୍ପାନୀ କହିଛି ଏହି ଟିକା ପ୍ରାୟ ୨୧୬ ଜଣଙ୍କୁ ଦିଆଯାଇଥିବା ବେଳେ ଏହାର କୌଣସି ପତିକୂଳ ପ୍ରଭାବ ଦେଖାଯାଇ ନାହିଁ କହିଲେ ଚଳେ । ଆହୁରି ମଧ୍ୟ କୁହାଯାଇଛି ଆଣ୍ଟିବଡି କାରଣରୁ ଟିକା ନେଇଥିବା ବ୍ୟକ୍ତିଙ୍କ ନିକଟରେ ଏଚ୍ଆଇଭି ସଂକ୍ରମଣର ଭୁଲ ତଥ୍ୟ ଆସିଛି । ପ୍ରଧାନମନ୍ତ୍ରୀ ସ୍କଟ ମରିଶନ କହିଛନ୍ତି ଏହାଦ୍ୱାରା ସ୍ପଷ୍ଟ ହୋଇଛି ଯେ ଅଷ୍ଟେଲିଆ ତରବର ହୋଇ କୌଣସି ପଦକ୍ଷେପ ନିଏ ନାହିଁ । ବରଂ ବୁଝିସୁଝି ଆମକୁ ଚାଲିବାକୁ ପଡିବ ।
