ରାଉରକେଲା,୧୫ା୨(ଦିନେଶ ମିଶ୍ର): ରାଉରକେଲା ବିର୍ସା ମୁଣ୍ଡା ଅନ୍ତର୍ଜାତୀୟ ହକି ଷ୍ଟାଡିୟମରେ ବୁଧବାର ଅନୁଷ୍ଠିତ ଏଫ୍ଆଇଏଚ୍ ମହିଳା ହକି ପ୍ରୋ ଲିଗ୍ରେ ଅଷ୍ଟ୍ରେଲିଆ ୨-୦ ଗୋଲରେ ଚାଇନାକୁ ପରାସ୍ତ କରିଛି। ପୂର୍ବ ମ୍ୟାଚରେ ଚାଇନା ୨-୧ ଗୋଲରେ ଭାରତକୁ ହରାଇ ଥିବାରୁ ଅଷ୍ଟ୍ରେଲିଆ ବିପକ୍ଷରେ କଡ଼ା ଟକ୍କର ଦେବ ବୋଲି ଦର୍ଶକ ଆଶା ରଖିଥିଲେ। ମାତ୍ର ତାହା ହୋଇ ନ ଥିଲା। ପ୍ରଥମ କ୍ୱାର୍ଟର ଗୋଲଶୂନ୍ୟ ରହିବା ପରେ ଦ୍ୱିତୀୟ କ୍ୱାର୍ଟରର ଅନ୍ତିମ ପର୍ଯ୍ୟାୟରେ ଅର୍ଥାତ୍ ୨୯ତମ ମିନିଟରେ ଗ୍ରେସ୍ ଷ୍ଟିଓ୍ବାର୍ଟଙ୍କ ପେନାଲ୍ଟି କର୍ନର ଗୋଲ ବଳରେ ଅଷ୍ଟ୍ରେଲିଆ ଅଗ୍ରଣୀ ହାସଲ କରିଥିଲା। ଗୋଲ ପରିଶୋଧ ପାଇଁ ଚାଇନା ସୁଯୋଗ ପାଇଥିଲେ ମଧ୍ୟ ଅଷ୍ଟ୍ରେଲିଆ ରକ୍ଷଣଭାଗ ଏହା ହେବାକୁ ଦେଇ ନ ଥିଲେ।
ଅନ୍ୟପକ୍ଷେ ଅଷ୍ଟ୍ରେଲିଆ ଦଳ ଆକ୍ରମଣାତ୍ମକ ରଣନୀତି ବଳବତ୍ତର ରଖି ୫୭ତମ ମିନିଟରେ ଷ୍ଟିଫାନି କେର୍ଶଙ୍କ ଫିଲ୍ଡ ଗୋଲ ବଳରେ ବିଜୟକୁ ନିଶ୍ଚିତ କରି ଦେଇଥିଲା। ଅଷ୍ଟ୍ରେଲିଆ ଦଳକୁ ମୋଟ ୮ଟି ପେନାଲ୍ଟି କର୍ନର ମିଳିଥିଲା। ଏଥିରୁ ଦଳ ଗୋଟିଏ ଗୋଲ କରିବାରେ ସକ୍ଷମ ହୋଇଥିଲା। ଅନ୍ୟପକ୍ଷରେ ଚାଇନା ୩ଟି ପେନାଲ୍ଟି କର୍ନର ପାଇଥିଲେ ହେଁ ଏଥିରୁ କୋଟିଏ ହେଲେ ଗୋଲ ସ୍କୋର କରିପାରି ନ ଥିଲା। ବିପଜ୍ଜନକ ଖେଳ ପାଇଁ ୪୪ତମ ମିନିଟରେ ଏହି ଦଳର ମା ନିଙ୍ଗ୍ ଗ୍ରୀନ୍ କାର୍ଡ ପାଇଥିଲେ। ଚଳିତ ସିଜନରେ ୬ ମ୍ୟାଚରୁ ଚାଇନାର ଏହାଥିଲା ଦ୍ୱିତୀୟ ପରାଜୟ ଏବଂ ଅଷ୍ଟ୍ରେଲିଆର ୫ ମ୍ୟାଚରୁ ତୃତୀୟ ବିଜୟ।
