ନୂଆଦିଲ୍ଲୀ,୨୫।୪ : ତାମିଲନାଡୁର ଏକ ମନ୍ଦିରରୁ ଚୋରି ହୋଇଥିବା ପ୍ରଭୁ ବଜରଙ୍ଗବାଲୀଙ୍କ ପ୍ରାୟ ୫୦୦ ବର୍ଷ ପୁରୁଣା ପ୍ରତିମାକୁ ଭାରତ ଫେରାଇ ଦେଇଛି। ଏହାକୁ ଅଷ୍ଟ୍ରେଲିଆରେ ଥିବା ଭାରତୀୟ ଦୂତାବାସକୁ ହସ୍ତାନ୍ତର କରାଯାଇଛି। ଏହି ସମ୍ପର୍କରେ ସଂସ୍କୃତି, ପର୍ଯ୍ୟଟନ ମନ୍ତ୍ରୀ କିଶାନ ରେଡ୍ଡୀ ଟୁଇଟ କରି ସୂଚନା ଦେଇ କହିଛନ୍ତି, ଭାରତ ସରକାର ଦେଶର ସମସ୍ତ ମୂଲ୍ୟବାନ ସାମଗ୍ରୀ ଫେରାଇ ଆଣିବା ଦିଗରେ କାର୍ଯ୍ୟ କରୁଛନ୍ତି। ଏହି ଟୁଇଟରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମଧ୍ୟ ଟ୍ୟାଗ କରିଛନ୍ତି।
ଚୋଳ ସମୟର ଚତୁର୍ଦ୍ଦଶ ଶତାବ୍ଦୀର ବିଷ୍ଣୁ ମନ୍ଦିରରୁ ଭଗବାନ ବଜରଙ୍ଗବାଲୀଙ୍କ ଧାତୁ ମୂର୍ତ୍ତି ଚୋରି ହୋଇଥିଲା। ସେ ଏହା ମଧ୍ୟ କହିଛନ୍ତି ,ବର୍ତ୍ତମାନ ପର୍ଯ୍ୟନ୍ତ ବିଭିନ୍ନ ଦେଶରୁ ୨୫୧ ପୁରାତନ ସାମଗ୍ରୀ ସ୍ବଦେଶ ଫେରାଇ ଅଣାଯାଇଛି। ପ୍ରଧାନମନ୍ତ୍ରୀ ମୋଦି ଏକ ଟୁଇଟରେ କହିଛନ୍ତି ଆମର ଅମୂଲ୍ୟ ଐତିହ୍ୟକୁ ଘରକୁ ଫେରାଇ ଆଣିବା ପାଇଁ ଆମେ ନିରନ୍ତର କାର୍ଯ୍ୟ କରୁଛୁ।
ଖବର ଅନୁଯାୟୀ, ୯ ଏପ୍ରିଲ ୨୦୧୨ରେ ଆରିୟାଲୁର ଜିଲାର ଭେଲୁର ଗାଁର ଭାରାଦାରାଜା ପେରୁମାଲ ମନ୍ଦିରରୁ ଶ୍ରୀଦେବୀ ଏବଂ ଭୂଦେବୀଙ୍କ ପ୍ରତିମା ସହିତ ଏହି ପ୍ରତିମା ଚୋରି ହୋଇଥିଲା। ମାର୍ଚ୍ଚ ୨୦୧୪ରେ ଏହି ପ୍ରତିମୂର୍ତ୍ତି ଅଷ୍ଟ୍ରେଲିଆର ଜଣେ କ୍ରେତାଙ୍କୁ ନିଲାମ କରାଯାଇଥିଲା। ଅନୁସନ୍ଧାନ ପରେ ମୂର୍ତ୍ତିର ପରିଚୟ ମିଳିଥିଲା। ଏହି ପ୍ରସଙ୍ଗରେ ଆମେରିକାର ହୋମଲ୍ୟାଣ୍ଡ ସୁରକ୍ଷା ଦ୍ୱାରା ତାମିଲନାଡୁ ଆଇଡଲ ୱିଙ୍ଗକୁ ସହାୟତା କରାଯାଇଥିଲା। ଏହି ପ୍ରତିମୂର୍ତ୍ତି ନ୍ୟୁୟର୍କରେ ଅବସ୍ଥିତ ନିଲାମ ହାଉସରେ ନିଲାମ କରାଯାଇଥିଲା। ଏହି ପ୍ରତିମୂର୍ତ୍ତି ଚୋରି ହେବା ବିଷୟରେ ସେମାନେ ଅବଗତ ନୁହଁନ୍ତି ବୋଲି ଅଷ୍ଟ୍ରେଲୀୟ କ୍ରେତାମାନେ ଦାବି କରିଛନ୍ତି।