ଆଡିଲେଡ୍,୧୯।୧୨: ଆଶେସ ସିରିଜ୍ର ଦ୍ୱିତୀୟ ତଥା ଦିବା-ରାତ୍ର ଟଷ୍ଟରେ ୪ର୍ଥ ଦିନ ସୁଦ୍ଧା ଅଷ୍ଟ୍ରେଲିଆ ତା’ର ବିଜୟ ନିଶ୍ଚିତ କରିଛି। ଅନ୍ତିମ ଦିନ ମ୍ୟାଚ୍ ଜିତିବା ପାଇଁ ଘରୋଇ ବୋଲରଙ୍କୁ ଇଂଲଣ୍ଡର ୬ ଉଇକେଟ ଦରକାର। ବର୍ତ୍ତମାନ ୪୬୯ ରନ୍ର ବିଶାଳ ଟାର୍ଗେଟ ପିଛା କରୁଥିବା ଇଂଲଣ୍ଡ ଦଳ ୪ ଉଇକେଟ ହରାଇ ୮୨ ରନ୍ କରିଛି। ଅଧିନାୟକ ଜୋ ରୁଟ୍ (୨୪)ଙ୍କ ଉଇକେଟ ପଡ଼ି ସାରିଥିବାରୁ ବଢ଼ିଯାଇଛି ଅଷ୍ଟ୍ରେଲିଆର ବିଜୟ ସମ୍ଭାବନା। ରବିବାର ମିଚେଲ ଷ୍ଟାର୍କ ଅନ୍ତିମ ବଲରେ ରୁଟ୍ଙ୍କୁ ଆଉଟ୍ କରି ଇଂଲଣ୍ଡକୁ ଠେଲି ଦେଇଛନ୍ତି ପରାଜୟ ଦ୍ୱାରକୁ।
ମ୍ୟାଚ୍ରେ ଇଂଲଣ୍ଡର ଭବିଷ୍ୟତ ସମ୍ପୂର୍ଣ୍ଣ ବେନ ଷ୍ଟୋକ୍ସ (୩)ଙ୍କ ଉପରେ ନିର୍ଭର କରେ। ୨ ବର୍ଷ ତଳେ ଇଂଲଣ୍ଡକୁ ଲିଡ୍ସରେ ରୋମାଞ୍ଚକ ବିଜୟ ଦେଇଥିବା ଏହି ଅଲରାଉଣ୍ଡର ଏବେ ୩ ରନ୍ରେ ଅପରାଜିତ ଅଛନ୍ତି। ତାଙ୍କୁ ସହଯୋଗ କରିବା ପାଇଁ ଅଛନ୍ତି ଜୋସ ବଟଲର ଓ କ୍ରିସ ଓ୍ବକ୍ସଙ୍କ ଭଳି ଦକ୍ଷ ବ୍ୟାଟର। ଏମାନେ ମ୍ୟାଚ୍କୁ ଡ୍ର’ ଆଡ଼କୁ ନେଇପାରନ୍ତି। ରୋରି ବର୍ନସ (୩୪), ହାସିମ ହାମିଦ (୦) ଓ ଦାଓ୍ବିଦ ମଲାନ (୨୦) ଆଉଟ୍ ହୋଇସାରିଛନ୍ତି।
ପୂର୍ବରୁ ପ୍ରଥମ ଇନିଂସରେ ଇଂଲଣ୍ଡକୁ ୨୩୬ ରନ୍ରେ ଅଲଆଉଟ୍ କରି ୨୩୭ ରନ୍ର ଅଗ୍ରଣୀ ହାସଲ କରିଥିଲା ଅଷ୍ଟ୍ରେଲିଆ (୪୩୭/୯)। ଦ୍ୱିତୀୟ ଇନିଂସରେ ଷ୍ଟିଭ ସ୍ମିଥଙ୍କ ନେତୃତ୍ୱାଧୀନ ଦଳ ୨୩୦ ରନ୍ରେ ୯ ଉଇକେଟ ହରାଇ ପରେ ବ୍ୟାଟିଂ ଛାଡ଼ିଥିଲା।