ମେଲବୋର୍ନ, ୪।୮(ପି.ଟି.): ଆସନ୍ତା ଅକ୍ଟୋବରରେ ଅଷ୍ଟ୍ରେଲିଆ- ଓ୍ବେଷ୍ଟଇଣ୍ଡିଜ୍ ମଧ୍ୟରେ ଖେଳାଯିବାକୁ ଥିବା ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜକୁ ସ୍ଥଗିତ ରଖାଯାଇଛି। ଏ ନେଇ କ୍ରିକେଟ ଅଷ୍ଟ୍ରେଲିଆ ମଙ୍ଗଳବାର ସୂଚନା ଦେଇଛି। ଟି୨୦ ବିଶ୍ୱକପ୍ ପୂର୍ବରୁ ଏହାକୁ ଏକ ଓ୍ବାର୍ମଅପ୍ ସିରିଜ ବୋଲି ବିବେଚନା କରାଯାଉଥିଲା। ତେବେ କୋଭିଡ୍-୧୯ ମହାମାରୀ କାରଣରୁ ଟି୨୦ ବିଶ୍ୱକପ୍କୁ ସ୍ଥଗିତ ରଖାଯାଇଛି। ଫଳରେ ଦୁଇ ଦେଶର ବୋର୍ଡ ଏହି ସିରିଜକୁ ମଧ୍ୟ ସ୍ଥଗିତ କରିବାକୁ ନିଷ୍ପତ୍ତି ନେଇଛନ୍ତି। ସିରିଜ୍ର ପ୍ରଥମ, ଦ୍ୱିତୀୟ ଓ ତୃତୀୟ ମ୍ୟାଚ୍ ଗୁଡିକ ଯଥାକ୍ରମେ ଅକ୍ଟୋବର ୪, ୬ ଓ ୯ ତାରିଖରେ ଟାଉନ୍ସଭିଲେ, କେନର୍ସ ଓ ଗୋଲ୍ଡ କୋଷ୍ଟରେ ଖେଳାଯିବାର କାର୍ଯ୍ୟକ୍ରମ ଥିଲା।
ସିରିଜ ସ୍ଥଗିତ ରଖିବା ନେଇ କ୍ରିକେଟ ଅଷ୍ଟ୍ରେଲିଆ ଟୁଇଟ୍ କରି ସୂଚନା ଦେଇଛି। ବର୍ତ୍ତମାନ ଏହି ସିରିଜ ୨୦୨୧ କିମ୍ବା ୨୦୨୨ରେ ଅଷ୍ଟ୍ରେଲିଆରେ ଆୟୋଜନ ହେବାକୁ ଥିବା ବିଶ୍ୱକପ୍ ପୂର୍ବରୁ ଖେଳାଯିବ। ଏବେ ଦୁଇ ଦେଶର ତାରକା ତଥା ଆଗଧାଡ଼ିର ଖେଳାଳିମାନେ ୟୁନାଇଟେଡ ଆରବ ଏମିରେଟ୍ସ (ୟୁଏଇ)ରେ ସେପ୍ଟେମ୍ବର ୧୯ ଓ ନଭେମ୍ବର ୧୦ ତାରିଖ ମଧ୍ୟରେ ଖେଳାଯିବାକୁ ଥିବା ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଅଂଶଗ୍ରହଣ କରିବେ।
ପୁଣି ରବିବାରଠାରୁ ଆରମ୍ଭ ହେବାକୁ ଥିବା ଜିମ୍ବାଓ୍ବେ ବିପକ୍ଷରେ ଅଷ୍ଟ୍ରେଲିଆର ଦିନିକିଆ ସିରିଜ୍କୁ ମଧ୍ୟ ଘୁଞ୍ଚାଇଦିଆଯାଇଛି। ସେପ୍ଟେମ୍ବରରେ ଅଷ୍ଟ୍ରେଲିଆ ଇଂଲଣ୍ଡ ଗସ୍ତରେ ଯାଇ ଏକ ସୀମିତ ଓଭର ସିରିଜ ଖେଳାଯିବାର କାର୍ଯ୍ୟକ୍ରମ ରହିଛି। ତେବେ ଏହା ଆୟୋଜନ ହେଉଛି କି ନା ତାହା ଦେଖିବାକୁ ବାକି ରହିଲା। ଗତ ସପ୍ତାହରେ ଆଇପିଏଲ୍କୁ ଦୃଷ୍ଟିରେ ରଖି ଦକ୍ଷିଣ ଆଫ୍ରିକା ତା’ର ଓ୍ବେଷ୍ଟଇଣ୍ଡିଜ୍ ଗସ୍ତକୁ ବାତିଲ କରିଥିଲା। ଏହି ଗସ୍ତରେ ଦକ୍ଷିଣ ଆଫ୍ରିକା ଓ୍ବେଷ୍ଟଇଣ୍ଡିଜ୍ରେ ୨ଟି ଟେଷ୍ଟ କିମ୍ବା ୫ଟି ୨୦ ମ୍ୟାଚ୍ ଖେଳିବାର କାର୍ଯ୍ୟକ୍ରମ ଥିଲା।