ଆଡିଲେଡ, ୨୦ା୧: ଅଷ୍ଟ୍ରେଲିଆ ଏବଂ ଓ୍ବେଷ୍ଟଇଣ୍ଡିଜ ମଧ୍ୟରେ ଅନୁଷ୍ଠିତ ପ୍ରଥମ କ୍ରିକେଟ ଟେଷ୍ଟ ୩ ଦିନରେ ଶେଷ ହୋଇଛି। ଏଥିରେ ଜୋସ୍ ହାଜେଲଉଡ୍ଙ୍କ ୫ଉଇକେଟ ସଫଳତା ଯୋଗୁ ଘରୋଇ ଦଳ ୧୦ ଉଇକେଟରେ ବିଜୟ ଲାଭ କରିଛି । ପୂର୍ବଦିନର ଅସମାପ୍ତ ଦ୍ୱିତୀୟ ଇନିଂସ ସ୍କୋର ୭୩/୬ରୁ ଖେଳ ଆରମ୍ଭ କରିଥିବା ଓ୍ବେଷ୍ଟଇଣ୍ଡିଜ ଶୁକ୍ରବାର ୧୨୦ ରନରେ ଅଲଆଉଟ ହୋଇଥିଲା। ମ୍ୟାଚ ଜିତିବା ଲାଗି ଘରୋଇ ଦଳ ମାତ୍ର ୨୬ ରନ ଆବଶ୍ୟକ କରୁଥିଲା । ଉସ୍ମାନ୍ ଖ୍ବାଜା (୯ରନ୍) ରିଟାର୍ଡହର୍ଟ ହୋଇଥିବା ବେଳେ ଷ୍ଟିଭେନ ସ୍ମିଥ୍ (୧୧ରନ୍) ଓ ମାର୍ନସ ଲବୁସେନ ଦଳକୁ ବିଜୟୀ କରାଇଥିଲେ।