ଲଣ୍ଡନ,୪।୧(ପି.ଟି.): କୋଭିଡ୍-୧୯ ସ୍ଥିତି ଓ ସ୍ବାସ୍ଥ୍ୟଗତ ନିରାପତ୍ତାକୁ ଦୃଷ୍ଟିରେ ରଖି ଅଷ୍ଟ୍ରେଲିଆ ତା’ର ଆଗାମୀ ଦକ୍ଷିଣ ଆଫ୍ରିକା ଗସ୍ତରୁ ଓହରିଯାଇଛି। କ୍ରିକେଟ ଅଷ୍ଟ୍ରେଲିଆ (ସିଏ)ର ଏହି ନିଷ୍ପତ୍ତି ଚିନ୍ତା ସୃଷ୍ଟି କରିଛି ବୋଲି ଇଂଲଣ୍ଡ ପୂର୍ବତନ ଅଧିନାୟକ ମାଇକେଲ ଭନ ଓ କେଭିନ୍ ପିଟରସନ କହିଛନ୍ତି। ଏହା ଦ୍ୱାରା ଅଷ୍ଟ୍ରେଲିଆ ଖରାପ ଉଦାହରଣ ସୃଷ୍ଟି କରିଛି ବୋଲି ଭନ୍ କହିଛନ୍ତି। ଏହା କ୍ରିକେଟ ପାଇଁ ଚିନ୍ତା ସୃଷ୍ଟି କରିଛି। ଭାରତ ଭଳି କ୍ରିକେଟ ପାଓ୍ବାର ହାଉସ୍ ଗସ୍ତରୁ ସମାନ ପରିସ୍ଥିତିରେ ଅଷ୍ଟ୍ରେଲିଆ ଓହରିଥାନ୍ତା କି ବୋଲି ଭନ ପ୍ରଶ୍ନ ପଚାରିଛନ୍ତି। ଭାରତ, ଇଂଲଣ୍ଡ ଓ ଅଷ୍ଟ୍ରେଲିଆ ଭଳି ବିଗ୍ ଥ୍ରି କ୍ରିକେଟ ନେଶନ ଅନ୍ୟ ଦେଶର ବୋର୍ଡଗୁଡିକୁ ସାହାଯ୍ୟ କରିବା ଉଚିତ। କରୋନା ଦ୍ୱାରା ଅନ୍ୟ ଦେଶର ବୋର୍ଡଗୁଡିକ ସାଂଘାତିକ ଭାବେ କ୍ଷତି ସହିଛନ୍ତି।
ଅନ୍ୟପଟେ ଅଷ୍ଟ୍ରେଲିଆର ଏହି ନିଷ୍ପତ୍ତିକୁ ପିଟରସନ ସମାଲୋଚନା କରିଛନ୍ତି। ଏହା କ୍ରିକେଟରେ କଳା ଅଧ୍ୟାୟ ସୃଷ୍ଟି କରିଛି। କୌଣସି ପ୍ରକାର ପରିସ୍ଥିତିରେ ଅଷ୍ଟ୍ରେଲିଆ ଏଭଳି ସ୍ଥିତିରେ ଭାରତ ଗସ୍ତରୁ ଓହରି ନ ଥାନ୍ତା। ସେହିପରି ମଙ୍ଗଳବାର ମଧ୍ୟ ସିଏର ଏହି ନିଷ୍ପତ୍ତିକୁ କ୍ରିକେଟ ସାଉଥ୍ ଆଫ୍ରିକା (ସିଏସ୍ଏ) କଡ଼ା ସମାଲୋଚନା କରିଛି। ସିଏର ଏହି ନିଷ୍ପତ୍ତି ଦ୍ୱାରା ଆମେ ନିରାଶ ହୋଇଛୁ ବୋଲି ସିଏସ୍ଏ ଡାଇରେକ୍ଟର ଅଫ୍ କ୍ରିକେଟ ଗେମ୍ ସ୍ମିଥ୍ କହିଛନ୍ତି। ଗସ୍ତରୁ ଓହରିଯାଇଥିବାରୁ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲରେ ପ୍ରବେଶ କରିବାକୁ ଅଷ୍ଟ୍ରେଲିଆ ସମସ୍ୟାର ସମ୍ମୁଖୀନ ହେବ। ଭାରତ ଓ ଇଂଲଣ୍ଡ ମଧ୍ୟରେ ଆୟୋଜନ ହେବାକୁ ଥିବା ଟେଷ୍ଟ ସିରିଜର ଫଳାଫଳ ଉପରେ ସବୁ କିଛି ନିର୍ଭର କରୁଛି। ଫାଇନାଲରେ ନ୍ୟୁଜିଲାଣ୍ଡ ସହିତ କେଉଁ ଦଳ ଭେଟିବ ତାହା ଏହି ସିରିଜ ନିର୍ଣ୍ଣୟ କରିବ। ଓ୍ବେଷ୍ଟଇଣ୍ଡିଜ କ୍ରିକେଟ ଲିଜେଣ୍ଡ ଇଆନ ବିଶପ ମଧ୍ୟ ଅଷ୍ଟ୍ରେଲିଆକୁ ଏ ନେଇ ସମାଲୋଚନା କରିବା ସହ ଦକ୍ଷିଣ ଆଫ୍ରିକାକୁ ସମବେଦନା ଜଣାଇଛନ୍ତି।
