ଅଷ୍ଟ୍ରେଲିଆନ ଅଭିନେତ୍ରୀ, ଲେଖିକା, କମେଡିଆନ ଏବଂ ପ୍ରଯୋଜିକା ରେବେଲ ବିଲ୍ସନ ନିଜର ଦମ୍ଦାର ଅଭିନୟ ଏବଂ ଇନ୍ଷ୍ଟାଗ୍ରାମରେ ମଜାଳିଆ ପୋଷ୍ଟ ପାଇଁ ହଲିଉଡ୍ରେ ବେଶ୍ ଲୋକପ୍ରିୟ। ମାତ୍ର ତାଙ୍କ ଜୀବନରେ ଏମିତି ଏକ ଘଟଣା ଘଟିଥିଲା ଯାହା ଖୁବ୍ କମ୍ ଲୋକ ଜାଣିଥିବେ।
ଏନେଇ ଅଭିନେତ୍ରୀ ଜଣକ ଏକ ସାକ୍ଷାତକାରରେ କହିଛନ୍ତି। ସେ କହିଛନ୍ତି, ଥରେ ମୋତେ ବନ୍ଧୁକ ମୁନରେ ଆଫ୍ରିକାରେ ଅପହରଣ କରି ନିଆଯାଇଥିଲା। ଏହି ସମୟରେ ମୁଁ ମୋଜାମ୍ବିକ୍ୟୁର ଏକ ଗ୍ରାମୀଣ ଅଞ୍ଚଳରେ ଥିଲି। ମୁଁ କିଛି ବନ୍ଧୁଙ୍କ ସହ ଟ୍ରକ୍ରେ ବସିଥିଲି। ଦେଖିଲି ଆଉ ଏକ ଟ୍ରକରେ କିଛି ଲୋକ ବନ୍ଧୁକ ଧରି ଆମ ଆଡ଼କୁ ଆସୁଛନ୍ତି। ଆମେ ଭୟରେ ଥରି ଉଠିଥିଲୁ। ସେମାନେ ଆସି କହିଲେ, ଟ୍ରକ୍ରୁ ଓହ୍ଲାଅ। ଆମେ ସମସ୍ତେ ଡରି ତାଙ୍କ କଥା ମାନିନେଲୁ। ପରେ ସେମାନେ ଆମକୁ ଏକ ଘରକୁ ନେଇଗଲେ। ଏହି ସମୟରେ ରେବେଲଙ୍କ ମୁଣ୍ଡରେ ନାନା ଉପାୟ ଚାଲୁଥିଲା। ପରେ ଅପହରଣକାରୀମାନେ ରେବେଲ ଏବଂ ତାଙ୍କ ସାଥୀମାନଙ୍କୁ ତଳେ ବସାଇଦେଲେ।
ରେବେଲ ସେମାନଙ୍କୁ ଅନୁରୋଧ କରି କହିଲେ, ଆମେ ସମସ୍ତେ ସମସ୍ତଙ୍କ ହାତ ଧରିବୁ। ଆମକୁ ଲାଗୁଥିଲା ସେମାନେ ବୋଧେ ଆମକୁ ବଳାତ୍କାର ପାଇଁ କେଉଁଆଡ଼େ ନେଉଛନ୍ତି। ମାତ୍ର ରେବେଲଙ୍କ ଭାଗ୍ୟ ବହୁତ ଭଲ ଥିଲା। ଅପହରଣକାରୀମାନେ ତାଙ୍କର କୌଣସି କ୍ଷତି କଲେ ନାହିଁ। ସକାଳ ହେବା ପରେ ରେବେଲ ଏବଂ ତାଙ୍କ ବନ୍ଧୁମାନଙ୍କୁ ନେଇ ଟ୍ରକ୍ ନିକଟରେ ଛାଡ଼ିଦେଇ ଆସିଲେ। ଆଫ୍ରିକା ସୀମା ପାର ହେବା ପରେ ସେମାନେ ଶାନ୍ତିରେ ନିଃଶ୍ୱାସ ମାରିଲେ। ତେବେ ଅପହରଣକାରୀଙ୍କ ଉଦ୍ଦେଶ୍ୟ କ’ଣ ଥିଲା ଏବେ ସୁଦ୍ଧା ଆମେ ଦ୍ୱନ୍ଦ୍ୱରେ।