ଭୁବନେଶ୍ୱର,୩୦ା୯ (ବ୍ୟୁରୋ): ଯାଜପୁର ଅଞ୍ଚଳକୁ ଚୋରା ଚାଲାଣବେଳେ ଭଦ୍ରକ ଜିଲା ଧୁଷୁରୀ ଥାନାଞ୍ଚଳରୁ ବିପୁଳ ପରିମାଣର ଅଷ୍ଟ୍ରେଲିଆନ କୋଇଲା ସହ ଟ୍ରକକୁ ଜବତ କରିଛି କ୍ରାଇମ୍ବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍)। ଏଥିସହ ଟ୍ରକ ଡ୍ରାଇଭରଙ୍କୁ ମଧ୍ୟ ଗିରଫ କରାଯାଇଛି। ସେ ହେଲେ କଟକ ଜିଲା ନିଆଳି ଅଞ୍ଚଳର ମଳୟ କୁମାର ମଲ୍ଲିକ। ଜବତ କୋଇଲା ପରିମାଣ ୩୧.୨୯୦ ଟନ ଓ ବଜାର ମୂଲ୍ୟ ପ୍ରାୟ ୧୩ ଲକ୍ଷ ଟଙ୍କା ହେବ। ଡ୍ରାଇଭର ଜଣକ ଜବତ କୋଇଲା ପରିବହନର କୌଣସି କାଗଜପତ୍ର ଦେଖାଇପାରି ନ ଥିଲେ। ଫଳରେ ବେଆଇନ ଭାବେ ଚାଲାଣ ଅଭିଯୋଗରେ ଏସ୍ଟିଏଫ୍ ଏହି ପଦକ୍ଷେପ ଗ୍ରହଣ କରିଛି। ଏନେଇ ଏକ ମାମଲା (ନଂ.୨୦/୨୦୨୨) ରୁଜୁ କରାଯାଇ ଡ୍ରାଇଭରଙ୍କୁ ପଚରାଉଚରା କରାଯାଇଥିଲା। ଉକ୍ତ କୋଇଲା କେଉଁଠାରୁ କେଉଁଠାକୁ ଯାଉଥିଲା ଓ ଚାଲାଣରେ ସମ୍ପୃକ୍ତ ଅନ୍ୟମାନଙ୍କ ସମ୍ପର୍କରେ ତଥ୍ୟ ହାସଲ ପରେ ଅଭିଯୁକ୍ତଙ୍କୁ ଧାମନଗର ଜେଏମ୍ଏଫ୍ସି କୋର୍ଟରେ ହାଜର କରାଯାଇଥିଲା। ଏହି କାରବାରରେ ବଡ଼ ର଼୍ୟାକେଟ କାମ କରୁଥିବା ଜଣାପଡିଛି।