ସିଡ୍ନୀ,୧୬।୧୧(ପି.ଟି.): ଆଗାମୀ ସିରିଜରେ ଭାରତୀୟ ଅଧିନାୟକ ବିରାଟ କୋହଲିଙ୍କୁ ଅଧିକ ଗୁରୁତ୍ୱ ଦେବାକୁ ଅଷ୍ଟ୍ରେଲିଆ ପ୍ରଶଂସକ ଚାହାନ୍ତି ନାହିଁ। ଏକଥା କହିଛନ୍ତି ଅଷ୍ଟ୍ରେଲିଆ ଅଧିନାୟକ ଟିମ୍ ପେନ୍। ଜଣେ ପ୍ରତିଦ୍ୱନ୍ଦ୍ୱୀ ଭାବେ କୋହଲିଙ୍କୁ ଅଷ୍ଟ୍ରେଲୀୟମାନେ ନାପସନ୍ଦ କରିବାକୁ ଭଲ ପାଆନ୍ତି। ତେବେ ପ୍ରଶଂସକ ଭାବେ କୋହଲିଙ୍କ ବ୍ୟାଟିଂକୁ ଅଷ୍ଟ୍ରେଲୀୟମାନେ ବେଶ୍ ଉପଭୋଗ କରିଥାନ୍ତି ବୋଲି ପେନ୍ କହିଛନ୍ତି।
ଭାରତ ଓ ଘରୋଇ ଅଷ୍ଟ୍ରେଲିଆ ମଧ୍ୟରେ ୪ ମ୍ୟାଚବିଶିଷ୍ଟ ଟେଷ୍ଟ ଖେଳାଯିବ। ଡିସେମ୍ବର ୧୭ରୁ ଆଡିଲେଡ୍ରେ ଦିବାରାତ୍ର ଟେଷ୍ଟ ସହ ଏହି ହାଇପ୍ରୋଫାଇଲ ସିରିଜ ଆରମ୍ଭ ହେବ। କୋହଲିଙ୍କ ବିଷୟରେ ମୋତେ ବହୁତ ପ୍ରଶ୍ନ ପଚାରାଯାଉଛି। ଅନ୍ୟମାନଙ୍କ ଭଳି ସେ ମୋ ପାଇଁ ଜଣେ ଖେଳାଳି। ତାଙ୍କ ସହିତ ମୋର କୌଣସି ଖାସ୍ ସମ୍ପର୍କ ମଧ୍ୟ ନାହିଁ। ଟସ୍ ପଡିବା ବେଳେ ତାଙ୍କୁ ଦେଖେ ଓ ତାଙ୍କ ବିକ୍ଷରେ ଖେଳିଥାଏ। କୋହଲିଙ୍କ ଖେଳ ଦେଖିବାକୁ ପସନ୍ଦ କରିଥାଉ। କିନ୍ତୁ ସେ ଅଧିକ ରନ୍ ସଂଗ୍ରହ କରିବା ଆମେ ଚାହୁନା ବୋଲି ପେନ୍ କହିଛନ୍ତି।
ଗତଥର ଉଭୟ ଅଧିନାୟକଙ୍କ ମଧ୍ୟରେ ଜବରଦସ୍ତ ପ୍ରତିଦ୍ୱନ୍ଦ୍ୱିତା ଦେଖିବାକୁ ମିଳିଥିଲା। ଅଷ୍ଟ୍ରେଲିଆ ଓ ଭାରତ ମଧ୍ୟରେ ସବୁବେଳେ କଡ଼ା ପ୍ରତିଦ୍ୱନ୍ଦ୍ୱିତା ଦେଖିବାକୁ ମିଳିଥାଏ। କୋହଲି ଓ ମୁଁ ଉଭୟେ ପ୍ରତିଦ୍ୱନ୍ଦ୍ୱିତା କରିବାକୁ ଭଲ ପାଇଥାଉ। ଆମ ମଧ୍ୟ ଏକାଧିକବାର କଥା କଟାକଟି ହୋଇଛି। ତେବେ ଏହା ନୂଆ କିଛି ନୁହେଁ। ଶ୍ରେଷ୍ଠ ଖେଳାଳିମାନଙ୍କ ମଧ୍ୟ ସବୁବେଳେ ଏଭଳି ଅଭାବନୀୟ ଘଟଣା ଘଟିଥାଏ। ଖେଳାଳି ଭଲ ହେଲେ ଏଭଳି ପରିସ୍ଥିତି ସୃଷ୍ଟି ହୋଇଥାଏ। ଇଂଲଣ୍ଡ ଜୋ ରୁଟ୍ ଓ ବେନ୍ ଷ୍ଟୋକ୍ସଙ୍କ ସହିତ ମଧ୍ୟ ଏଭଳି ମୁକାବିଲାମୂଳକ ସ୍ଥିତି ସୃଷ୍ଟି ହୋଇଥାଏ ବୋଲି ସେ କହିଛନ୍ତି। ଗତ ବର୍ଷ ଭାରତ ୨-୧ରେ ଘରୋଇ ଅଷ୍ଟ୍ରେଲିଆକୁ ଟେଷ୍ଟ ସିରିଜରେ ପରାସ୍ତ କରିଥିଲା। ଏଥିସହ ଭାରତ ଅଷ୍ଟ୍ରେଲିଆ ମାଟିରେ ପ୍ରଥମଥର ପାଇଁ ଟେଷ୍ଟ ସିରିଜ ଜିତି ଇତିହାସ ସୃଷ୍ଟି କରିଥିଲା। ଏହା ଏକ ବଡ଼ ସିରିଜ। ତେଣୁ ଏଥିରେ ଉଭୟ ଦଳ ଭଲ ପ୍ରଦର୍ଶନ କରିବାକୁ ଚେଷ୍ଟା କରିବେ। ଫଳରେ ଏଥର ସିରିଜ ନିଶ୍ଚିତ ଭାବେ ସଂଘର୍ଷପୂର୍ଣ୍ଣ ହେବ ବୋଲି ପେନ୍ କହିଛନ୍ତି।