ପୁରୀ ଅଫିସ, ୧୫।୯: ସାଧାରଣତଃ ଥଣ୍ଡା ଜଳବାୟୁ ପରିବେଶଭିତ୍ତିକ ଅଞ୍ଚଳରେ ଅଙ୍ଗୁର ଚାଷ କରାଯାଇଥାଏ। କିନ୍ତୁ ପୁରୀରେ ଏହାର ବ୍ୟତିକ୍ରମ ଦେଖିବାକୁ ମିଳିଛି। ସମୁଦ୍ର କୂଳିଆ ଅଞ୍ଚଳ ଏବଂ ଗରମ ପରିବେଶରେ ଫଳିଛି ପେନ୍ଥା ପେନ୍ଥା ଅଙ୍ଗୁର, ଯାହାକି ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ପେଣ୍ଠକଟା ଭୂଦାନ ନଗର ବେହେରା ସାହିସ୍ଥିତ ମତ୍ସ୍ୟଜୀବୀ ଘନଶ୍ୟାମ ବେହେରାଙ୍କ ବାଡ଼ିରେ ଏହି ଅଙ୍ଗୁର ଫଳିଛି। ଆକସ୍ମିକ ଭାବେ ଏକ ଅଙ୍ଗୁର ଗଛ ପାଇଥିବା ଘନଶ୍ୟାମ ଏହାର ଉପଯୁକ୍ତ ଯନତ୍ ନେଇ ଏଥିରେ ଫଳ ଫଳାଇବାରେ ସଫଳ ହୋଇଛନ୍ତି। ତାଙ୍କ ବାଡ଼ିରେ ଅଙ୍ଗୁର ଫଳିଥିବା ଜାଣିବା ପରେ ସାହିପଡ଼ିଶା ଲୋକେ ଏହାକୁ ଦେଖିବା ଲାଗି ଆସୁଛନ୍ତି। ଘନଶ୍ୟାମ ମଧ୍ୟ ଏହି ଅଙ୍ଗୁର ଆଖପାଖ ପିଲାଙ୍କୁ ଖାଇବାକୁ ଦେଉଛନ୍ତି।
ଘନଶ୍ୟାମ କହିଛନ୍ତି, ଏକ ପରିବାର ତାଙ୍କ ପଡ଼ିଶା ଘରେ ଭଡ଼ାରେ ରହୁଥିଲେ। ୨ବର୍ଷ ପୂର୍ବେ ସେମାନେ ଘର ଛାଡ଼ିି ଯିବାବେଳେ ତାଙ୍କୁ ଏହି ଅଙ୍ଗୁର ଗଛଟି ଦେଇଥିଲେ। ତାକୁ ସେ ଅତି ଯନତ୍ ସହକାରେ ବାଡ଼ିରେ ଲଗାଇଥିଲେ। ସେଥିରେ ଗୋବର ଖତ, ସାର ଦେଇ ତା’ ଲତାକୁ ଜାଲ ଓ କାଠିରେ ଆଶ୍ରା ଦେଇଥିଲେ। ଏବେ ସେଥିରେ ଅଙ୍ଗୁର ଫଳିଛି। ବର୍ତ୍ତମାନ ୨୦ ପେନ୍ଥା ଅଙ୍ଗୁର ଝୁଲୁଛି। ଏହି ଅଙ୍ଗୁର ପ୍ରଥମେ ସବୁଜ ରଙ୍ଗରେ ଫଳୁଛି। ଧୀରେ ଧୀରେ ଏହା କଳା ପଡ଼ି ସ୍ବାଭାବିକ ଭାବେ ପାଚିବା ପରେ ମିଠା ଲାଗୁଛି। ଏହାକୁ କେବଳ ପରୀକ୍ଷାମୂଳକ ଭାବେ ଚାଷ କରି ସେ ସଫଳତା ପାଇଛନ୍ତି। ଆଗକୁ ଅଙ୍ଗୁର ଚାଷ କରିବାକୁ ଲକ୍ଷ୍ୟ ରଖିଥିବା ଘନଶ୍ୟାମ କହିଛନ୍ତି।