ମେଲବୋର୍ନ,୧୭।୨: ଅଷ୍ଟ୍ରେଲିଆନ ଓପନ ଟେନିସ୍ ଟୁର୍ନାମେଣ୍ଟରେ ଅଭିଜ୍ଞ ଆମେରିକୀୟ ମହିଳା ଖେଳାଳି ସେରେନା ଓ୍ବିଲିୟମ୍ସ ପୁଣି ଥରେ ନିଜର ଯାଦୁ ଦେଖାଇଛନ୍ତି। ଟୁର୍ନାମେଣ୍ଟରେ ୧୦ତମ ସିଡ୍ ମାନ୍ୟତା ପାଇଥିବା ୩୯ ବର୍ଷୀୟ ସେରେନା ମହିଳା ସିଙ୍ଗଲ୍ସ ସେମିଫାଇନାଲରେ ପ୍ରବେଶ କରିଛନ୍ତି। ମଙ୍ଗଳବାର ଅନୁଷ୍ଠିତ କ୍ୱାର୍ଟର ଫାଇନାଲ ମୁକାବିଲାରେ ସେରେନା ସ୍ଥାନୀୟ ରୋଡ ଲାଭେର ଏରିନାରେ ବିଶ୍ୱର ୨ ନମ୍ବର ଖେଳାଳି ରୋମାନିଆର ସିମୋନା ହାଲେପଙ୍କୁ ୬-୩, ୬-୩ ସେଟ୍ରେ ଅତି ସହଜରେ ପରାସ୍ତ କରି ସେମିକୁ ଉଠିଛନ୍ତି। ସେମିରେ ସେ ଏବେ ତୃତୀୟ ସିଡ୍ ଜାପାନର ୨୩ ବର୍ଷୀୟ ଖେଳାଳି ତଥା ୩ଟି ଗ୍ରାଣ୍ଡସ୍ଲାମ ଟାଇଟଲ ବିଜୟିନୀ ନାଓମି ଓସାକାଙ୍କୁ ଭେଟିବେ। ଓସାକା ଅନ୍ୟ ଏକ କ୍ୱାର୍ଟର ଫାଇନାଲରେ ଚାଇନିଜ ତାଇପେର ଅଣସିଡ୍ ଅଭିଜ୍ଞ ଖେଳାଳି ସୁ- ଓ୍ବେଇ ସିହେଙ୍କୁ ମାତ୍ର ୬୬ ମିନିଟ୍ରେ ୬-୨, ୬-୨ ସେଟ୍ରେ ପରାସ୍ତ କରି ସେମିଫାଇନାଲ ଖେଳିବାକୁ ଯୋଗ୍ୟତା ଅର୍ଜନ କରିଛନ୍ତି। ବିଜୟୀ ହେବା ପାଇଁ ଓସାକାଙ୍କୁ ସେତେଟା କଷ୍ଟ କରିବାକୁ ପଡି ନ ଥିଲା। ଏହାପୂର୍ବରୁ ୨୦୧୮ ୟୁଏସ୍ ଓପନ୍ ଫାଇନାଲରେ ସେରେନା ଓ ଓସାକା ଶେଷଥର ପାଇଁ ପରସ୍ପରକୁ ଭେଟିଥିଲେ। ସେତେବେଳେ ଅମ୍ପାୟର କାର୍ଲୋସ ରାମୋସ୍ଙ୍କ ସହ ସେରେନାଙ୍କ ବିବାଦ ନେଇ ଚର୍ଚ୍ଚା ହୋଇଥିଲା।
ସେରେନା ଏଥିସହ କ୍ୟାରିୟରର ୪୦ତମ ଗ୍ରାଣ୍ଡସ୍ଲାମ ସେମିଫାଇନାଲ ଖେଳିବେ। ଏଥର ଅଷ୍ଟ୍ରେଲିଆନ ଓପନ୍ରେ ସଫଳ ହେଲେ ସେ ୨୪ଟି ଗ୍ରାଣ୍ଡସ୍ଲାମ ଟାଇଟଲ ଜିତି ମାର୍ଗାରେଟ କୋର୍ଟଙ୍କ ବିଶ୍ୱ ରେକର୍ଡର ସମକକ୍ଷ ହେବେ। ପାଖାପାଖି ୪ ବର୍ଷ ତଳେ ସେରେନା ଅଷ୍ଟ୍ରେଲିଆନ ଓପନ୍ରେ ଶେଷଥର ପାଇଁ ଗ୍ରାଣ୍ଡସ୍ଲାମ ଜିତିଥିଲେ। ଏଥର ତ୍ରୁଟି ସୁଧାରି ରେକର୍ଡ ସମକକ୍ଷ ହେବା ଲକ୍ଷ୍ୟରେ ସେରେନା ରହିଛନ୍ତି। ଅନ୍ୟପଟେ ହାଲେପ ଗତ ସଂସ୍କରଣର ସେମି ଫାଇନାଲରେ ପ୍ରବେଶ କରିଥିଲେ ଓ ୨୦୧୮ ଫାଇନାଲରେ ପରାସ୍ତ ହୋଇ ରନର୍ସ ଅପ୍ ହୋଇଥିଲେ। ଅନ୍ୟପଟେ ଓସାକା ୨୦୧୯ରେ ଅଷ୍ଟ୍ରେଲିଆନ ଓପନ ସିଙ୍ଗଲ୍ସ ଟାଇଟଲ ହାସଲ କରିଥିଲେ। ତେବେ ସେ ୨୦୧୮ ଓ ୨୦୨୦ରେ ୟୁଏସ୍ ଓପନରେ ଚାମ୍ପିୟନ ହେବାର ଗୌରବ ଅର୍ଜନ କରିଥିଲେ। ନିଜ ପ୍ରଦର୍ଶନରେ ସେରେନା ଓ ଓସାକା ଖୁସି ଜାହିର କରିଛନ୍ତି। ଓସାକାଙ୍କଠାରୁ ସେରେନା ୧୭ ବର୍ଷ ବଡ଼ ହୋଇଥିବାରୁ ସେମିଫାଇନାଲ ମୁକାବିଲା ବେଶ୍ ରୋମାଞ୍ଚକ ହେବ ବୋଲି ଆଶା କରାଯାଉଛି।