କାନ୍ବେରା,୧୭ା୨: ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ସ୍କଟ୍ ମୋରିସନ୍ ମଙ୍ଗଳବାର ଜଣେ ମହିଳାଙ୍କୁ କ୍ଷମା ମାଗିଛନ୍ତି, ଯାହାଙ୍କୁ ଦେଶର ପାର୍ଲାମେଣ୍ଟରେ ଜଣେ ସହକର୍ମୀ ବଳାତ୍କାର କରିଥିଲେ। ସରକାରୀ କାର୍ଯ୍ୟସ୍ଥଳରେ ବଳାତ୍କାର ସଂସ୍କୃତିର ପୁଙ୍ଖାନୁପୁଙ୍ଖ ତଦନ୍ତ ହେବ ବୋଲି ପ୍ରଧାନମନ୍ତ୍ରୀ ପୀଡ଼ିତାଙ୍କୁ ପ୍ରତିଶ୍ରୁତି ଦେଇଛନ୍ତି। ପୀଡ଼ିତା କହିଛନ୍ତି, ୨୦୧୯ ମାର୍ଚ୍ଚରେ ପ୍ରତିରକ୍ଷାମନ୍ତ୍ରୀ ଲିଣ୍ଡା ରେୟନୋଲଡ୍ସଙ୍କ ଅଫିସରେ କାମ କରୁଥିବାବେଳେ ସମ୍ପୃକ୍ତ ମହିଳାଙ୍କୁ ମୋରିସନ୍ଙ୍କ ଶାସକ ଲିବରାଲ ପାର୍ଟି ପାଇଁ କାମ କରୁଥିବା ଜଣେ ବ୍ୟକ୍ତି ବଳାତ୍କାର କରିଥିଲେ। ବଳାତ୍କାରର ଶିକାର ହେବା ପରେ ପୀଡ଼ିତା ଏନେଇ ସ୍ଥାନୀୟ ଗଣମାଧ୍ୟମକୁ ଜଣାଇଥିଲେ। ତେବେ ନିଜ କ୍ୟାରିୟର ପ୍ରତି ବିପଦ ଆଶଙ୍କା କରି ସେ ପୋଲିସରେ ଏତଲା ଦେଇ ନ ଥିଲେ। ସେ ଘଟଣା ସମ୍ପର୍କରେ ପ୍ରତିରକ୍ଷାମନ୍ତ୍ରୀଙ୍କ କାର୍ଯ୍ୟାଳୟର ବରିଷ୍ଠ ଅଧିକାରୀମାନଙ୍କୁ ଜଣାଇଥିଲେ। ସେମାନେ ତାଙ୍କୁ ବଳାତ୍କାର କରାଯାଇଥିବା ସ୍ଥାନରେ ଏକ ବୈଠକକୁ ଡାକିଥିଲେ।