ପ୍ୟାରିସ, ୫ା୭: ଅଷ୍ଟ୍ରେଲିଆର ବେନ୍ ଓ’ କୋନର ଟୁର୍ ଡି’ ଫ୍ରାନ୍ସ ସାଇକେଲ ରେସ୍ର ୯ମ ଷ୍ଟେଜ୍ ବିଜେତା ହୋଇଛନ୍ତି।
କ୍ଲସେସ୍ଠାରୁ ଟାଇଗ୍ନେସ ୧୪୪.୯ କିଲୋମିଟର ଦୂରତା ବିଶିଷ୍ଟ ଏହି ରେସ୍କୁ ସେ ୪ ଘଣ୍ଟା୨୬ ମିନିଟ୍ ୪୩ ସେକେଣ୍ଡ ଟାଇମିଂରେ ଶେଷ କରିଥିଲେ। ତାଙ୍କ ପଛକୁ ଯଥାକ୍ରମେ ଦ୍ୱିିତୀୟ ଓ ତୃତୀୟ ହୋଇଥିଲେ ଇଟାଲୀର ଦୁଇ ରାଇଡର ମାଟିଆ କାଟାନେଓ ଓ ସୋନି କଲବ୍ରେଲି। ୨୫ ବର୍ଷୀୟ କୋନର ଜେନେରାଲ କ୍ଲାସିଫିକେଶନରେ ଲିଡର ତଥା ୟେଲୋ ଜର୍ସି ବିଜେତା ଟାଡେଜ ପୋଗାକାରଙ୍କ ପଛକୁ ଦ୍ୱିତୀୟ ସ୍ଥାନରେ ରହିଛନ୍ତି।
ଟୁର୍ର ଦ୍ୱିତୀୟ ମାଉଣ୍ଟେନ ଷ୍ଟେଜ୍ ଆରମ୍ଭ ହେବା ପୂର୍ବରୁ ଗତ ବର୍ଷର ରନର୍ସଅପ୍ ପ୍ରିମୋଜ୍ ରଗ୍ଲିକ୍ ଓ ମାଥ୍ୟୁ ଭାନ୍ଡର୍ ପୋଏଲ୍ ରେସ୍ରୁ ଓହରିଯାଇଥିଲେ। ଗତ ସୋମବାର ଓ୍ବେଷ୍ଟର୍ନ ବ୍ରିଟାନି ଅଞ୍ଚଳରେ ଦୁର୍ଘଟଣାରେ ରଗ୍ଲିକ୍ ଆହତ ହୋଇଥିଲେ। ସେହିଦିନଠାରୁ ସେ ପ୍ରତିଯୋଗିତାରେ ସଂଘର୍ଷ କରି ଆସୁଛନ୍ତି। ତେଣୁ ଜୁମ୍ବୋ-ଭିଷ୍ମା ଟିମ୍ ସ୍ଲୋଭେନିଆର ଏହି ଡ୍ରାଇଭରଙ୍କୁ ପ୍ରତ୍ୟାହାର କରିନେବାକୁ ନିଷ୍ପତ୍ତି ନେଇଥିଲା।