ନୂଆଦିଲ୍ଲୀ, ୨ା୧୨: ଆଇପିଏଲ ଖେଳାଳି ନିଲାମ ଲାଗି ଅଷ୍ଟ୍ରେଲିଆର ବିଶ୍ୱକପ୍ ହିରୋ ଟ୍ରାଭିସ୍ ହେଡ୍, ପ୍ୟାଟ କମିନ୍ସ ଓ ମିଚେଲ ଷ୍ଟାର୍କଙ୍କ ସମେତ ଆଉଟ ଅଫ୍ ଫେଭର ଭାରତ ପେସ୍ ବୋଲର ହର୍ଶଲ ପଟେଲ ସର୍ବୋଚ୍ଚ ବେସ୍ ପ୍ରାଇସ୍ ତାଲିକାଭୁକ୍ତ ହୋଇଛନ୍ତି। ସେମାନଙ୍କ ବେସ୍ ପ୍ରାଇସ୍ ୨ କୋଟି ଟଙ୍କା ରଖାଯାଇଛି।
ଖବର ଅନୁସାରେ ଫ୍ରାଞ୍ଚାଇଜ୍ଗୁଡ଼ିକୁ ନିଲାମ ପାଇଁ ପଞ୍ଜୀକୃତ ହୋଇଥିବା ୧୧୬୬ ଖେଳାଳିଙ୍କର ଏକ ତାଲିକା ପଠାଯାଇଛି। ସେମାନଙ୍କ ମଧ୍ୟରୁ ୩୦ ବିଦେଶୀ ଖେଳାଳିଙ୍କ ସମେତ ୭୭ ଜଣଙ୍କୁ ନିଆଯିବ। ଟି୨୦ ଲିଗ୍ରେ ଭାଗ ନେଉଥିବା ୧୦ଟି ଦଳ ଖେଳାଳିଙ୍କୁ କ୍ରୟ କରିବାରେ ମୋଟ ୨୬୨.୯୫ କୋଟି ଟଙ୍କା ବ୍ୟୟ କରିବେ। ବିଶ୍ୱକପ୍ରେ ଚମତ୍କାର ବ୍ୟାଟିଂ କରି ଅନ୍ୟମାନଙ୍କ ଦୃଷ୍ଟି ଆକର୍ଷଣ କରିଥିବା ନ୍ୟୁଜିଲାଣ୍ଡର ରାଚିନ ରବୀନ୍ଦ୍ରଙ୍କ ବେସ୍ ପ୍ରାଇସ୍ ୫୦ଲକ୍ଷ ଟଙ୍କା ରଖାଯାଇଥିଲେ ମଧ୍ୟରେ ସେ ବହୁ ମୂଲ୍ୟରେ ବିକ୍ରି ହେବେ ବୋଲି ଆଶା କରାଯାଉଛି। ଆଶ୍ଚର୍ଯ୍ୟର କଥା ପୂର୍ବତନ ଭାରତୀୟ ବ୍ୟାଟର କେଦାର ଯାଦବ ଓ ଉମେଶ ଯାଦବଙ୍କ ବେସ୍ ପ୍ରାଇସ୍ ୨କୋଟି ଟଙ୍କା ରଖାଯାଇଛି। ସେହିପରି ନିକଟରେ ଭାରତ ବିପକ୍ଷରେ ତାଙ୍କର ପ୍ରଥମ ଟି୨୦ ଶତକ ହାସଲ କରିଥିବା ଜୋସ ଇଂଲିଶ, ପୂର୍ବତନ ଅଧିନାୟକ ଷ୍ଟିଭ ସ୍ମିଥ୍ ଏବଂ ପେସ୍ ବୋଲର ଜୋସ୍ ହାଜେଲଉଡ ପ୍ରମୁଖ ଏହି କାଟେଗୋରିରେ ରହିଛନ୍ତି।