ଢେଙ୍କାନାଳ ଅଫିସ, ୪।୧୨-ଢେଙ୍କାନାଳ ସହର ସାଇକୃପା ଆବାସିକ ମହାବିଦ୍ୟାଳୟରେ କରୋନା ବିସ୍ଫୋରଣ ପ୍ରଶାସନର ଚିନ୍ତା ବଢ଼ାଇଛି। ସଂକ୍ରମିତ ଛାତ୍ରୀଛାତ୍ରମାନେ ଘରକୁ ପଳାଇଥିବାବେଳେ ସ୍ଥାନୀୟ ଅଞ୍ଚଳରେ ସଂକ୍ରମଣ ବଢ଼ିବା ଆଶଙ୍କା ରହିଛି। ସ୍ଥିତି ବିଗିଡ଼ିବା ଆଗରୁ ସଂକ୍ରମଣ ନିୟନ୍ତ୍ରଣ କରିବା ଲାଗି ପ୍ରଶାସନିକସ୍ତରରେ ତତ୍ପରତା ପ୍ରକାଶ ପାଇଛି। ଶୁକ୍ରବାର ପୂର୍ବାହ୍ନରେ ଜିଲା କାର୍ଯ୍ୟାଳୟ ଓସ୍ୱାନ ହଲ୍ରେ ଅନୁଷ୍ଠିତ ପ୍ରଶାସନ-ପୋଲିସ ସମନ୍ବୟ ବୈଠକରେ ଜିଲାପାଳ ସରୋଜ କୁମାର ସେଠୀ ଅଧ୍ୟକ୍ଷତା କରି ଯାଞ୍ଚ କଡ଼ାକଡ଼ି କରିବାକୁ କଡ଼ା ନିର୍ଦ୍ଦେଶ ଦେଇଛନ୍ତି।
କରୋନାର ନୂଆ ଭାରିଆଣ୍ଟ ଓମିକ୍ରନ୍ ଦେଶରେ ସ୍ଥିତି ଜାହିର କରିଛି। ଏହାପରେ ତୃତୀୟ ଲହର ଆଶଙ୍କା ବଢ଼ିଛି। ଏହାର ମୁକାବିଲା ଲାଗି ପ୍ରସ୍ତୁତ ରହିବାକୁ ଜିଲାପାଳ ବିଭାଗୀୟ ଅଧିକାରୀଙ୍କୁ କହିଛନ୍ତି। ଘରୋଇ ଶିକ୍ଷାନୁଷ୍ଠାନ, ଆବାସିକ ହଷ୍ଟେଲଗୁଡ଼ିକ ଉପରେ କଡ଼ା ନଜର ରଖାଯାଇଛି। ଅପରାହ୍ନରେ ଜିଲାର ସମସ୍ତ ଘରୋଇ ଶିକ୍ଷାନୁଷ୍ଠାନ କର୍ମକର୍ତ୍ତାଙ୍କ ସହିତ ଜିଲାପାଳ ଆଲୋଚନା କରିଛନ୍ତି। ଛାତ୍ରାବାସ ପରିସର ସାନିଟାଇଜ କରିବା, ଅନ୍ତେବାସୀ ଓ କର୍ମଚାରୀ ମାସ୍କ ପରିଧାନ, ସାମାଜିକ ଦୂରତ୍ୱ ରକ୍ଷା, ସାନିଟାଇଜର ବ୍ୟବହାର ଉପରେ ଗୁରୁତ୍ୱାରୋପ କରାଯାଇଛି। କୌଣସି ଛାତ୍ରୀଛାତ୍ର ଅସୁସ୍ଥ ହେଲେ ପ୍ରଶାସନକୁ ଅବଗତ କରାଇବାକୁ କୁହାଯାଇଛି। ଏଥିରେ ବ୍ୟତିକ୍ରମ ହେଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲାପାଳ ଚେତାବନୀ ଦେଇଛନ୍ତି।
ସେହିପରି ସର୍ବସାଧାରଣ ସ୍ଥାନରେ କଟକଣା ଉଲ୍ଲଂଘନକାରୀଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଯାଞ୍ଚ ପ୍ରକ୍ରିୟା କଡ଼ାକଡ଼ି କରିବାକୁ ପୋଲିସ ବିଭାଗ ଏବଂ ଏନ୍ଫୋର୍ସମେଣ୍ଟ ଦଳକୁ ନିର୍ଦ୍ଦେଶ ଦିଆଯାଇଛି। ବିଶେଷ କରି ବ୍ୟବସାୟିକ ପ୍ରତିଷ୍ଠାନ, ମଲ୍ଗୁଡ଼ିକ ପ୍ରଶାସନ ସ୍କାନରରେ ରହିବ। ସାମାଜିକ ଦୂରତ୍ୱ ନିୟମ ଭଙ୍ଗ ହେଉଥିଲେ କିମ୍ବା ଗ୍ରାହକ ମାସ୍କ ପରିଧାନ କରି ନ ଥିଲେ ଜରିମାନା ଆଦାୟ ହେବ। ଲୋକଙ୍କୁ ସଚେତନ କରିବାକୁ ଦିନକୁ ଦୁଇଥର ଡାକବାଜି ଯନ୍ତ୍ରରେ ପ୍ରଚାର କରାଯିବ। ଜିଲାରେ ସଂକ୍ରମଣ ବଢୁଥିବାରୁ ମେଳା, ସାଂସ୍କୃତିକ ବନ୍ଦ ରଖାଯାଇଛି। ବିବାହ, ବ୍ରତ ଭଳି କାର୍ଯ୍ୟ ୧୦୦ ଜଣଙ୍କ ମଧ୍ୟରେ ସୀମିତ ରହିବ। ରାତ୍ରକାଳୀନ କର୍ଫ୍ୟୁ କଡାକଡି କରିବା ପାଇଁ ଜିଲାପାଳ ପୋଲିସ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି।
ବୈଠକରେ ଅତିରିକ୍ତ ଜିଲାପାଳ ଶଶାଙ୍କ ଶେଖର ଦାଶ, ଅତିରିକ୍ତ ଏସ୍ପି ଶିଶୁ ରଞ୍ଜନ ମହାପାତ୍ର, ଢେଙ୍କାନାଳ ଉପଜିଲାପାଳ ସ୍ନିଗ୍ଧାରାଣୀ ଧଳ, ଜିଲା ମୁଖ୍ୟ ଚିକିତ୍ସାଧିକାରୀ ଡା. ସୁଜାତାରାଣୀ ମିଶ୍ର, ସଦର ଏସ୍ଡିପିଓ ବିକାଶ ରଞ୍ଜନ ବେଉରା, ଟାଉନ ଥାନାଧିକାରୀ ସୌଭାଗ୍ୟ କୁମାର ସ୍ବାଇଁ, ସଦର ଥାନାଧିକାରୀ ଅଭିନବ ଡାଳୁଆ, ପୌର ନିର୍ବାହୀ ଅଧିକାରୀ ଅତନୁ କୁମାର ସାମନ୍ତ, ସ୍ବାସ୍ଥ୍ୟ ମିଶନ ପରିଚାଳିକା ସୋନାଲି ପ୍ରିୟଦର୍ଶିନୀ, ବିଭାଗୀୟ ଅଧିକାରୀ ଓ ଘରୋଇ ଶିକ୍ଷାନୁଷ୍ଠାନର କର୍ମକର୍ତ୍ତାମାନେ ଉପସ୍ଥିତ ଥିଲେ।