ବ୍ରହ୍ମପୁର ଅଫିସ,୧୫।୧୧: ପାଣିରେ ଭାସି ଯାଉଥିବା ବେଳେ ଅଟୋକୁ ଉଦ୍ଧାର କରାଯାଇଛି। ଏଭଳି ଏକ ଘଟଣା ଦେଖିବାକୁ ରମିଳିଛି ଗଞ୍ଜାମ ଜିଲା ନାରାୟଣପୁର-ହରିପୁର ରାସ୍ତାରେ। ଅଟୋରେ ଜଣେ ମହିଳା ଓ ଦୁଇଜଣ ଶିଶୁ କାଳିପଲ୍ଲୀ ଯିବା ନିମନ୍ତେ ଉକ୍ତ ରାସ୍ତାରେ ଯାଉଥିବା ସମୟରେ ଅଚାନକ ପାଣି ସ୍ରୋତରେ ଅଟୋଟି ଭାସି ଯିବାକୁ ଲାଗିଥିଲା। କିନ୍ତୁ ସେହି ସମୟରେ ଉକ୍ତ ସ୍ଥାନରେ ଥିବା କିଛି ଯୁବକ ସଙ୍ଗେ ସଙ୍ଗେ ପାଣିରୁ ପସି ଅଟୋକୁ ଟାଣି ରାସ୍ତା ପାରି କରାଇଥିଲେ। ଯୁବକମାନଙ୍କ ଯୋଗୁ ଏକ ନିଶ୍ଚିତ ଦୁର୍ଘଟଣାରୁ ଅଟୋ ଡ୍ରାଇଭର ସମେତ ସେଥିରେ ଯାତ୍ରା କରୁଥିବା ୩ ଜଣ ଅଳ୍ପକେ ବର୍ତ୍ତି ଯାଇଥିଲେ। ଏଣୁ ବିଭାଗୀୟ କର୍ତ୍ତୃପକ୍ଷ ତୁରନ୍ତ ଉକ୍ତ ବ୍ରିଜ ନିର୍ମାଣ କାର୍ଯ୍ୟ ସାରିବା ସହ ବ୍ରିଜ କଡରେ ନିର୍ମିତ ହୋଇଥିବା ଡାଇଭର୍ସନ ରୋଡକୁ ଉଚ୍ଚ କରିବାକୁ ସାଧାରଣରେ ଦାବି ହେଉଛି।
ସୂଚନାଯୋଗ୍ୟ, ଗତ ଦୁଇ ବର୍ଷ ଧରି ଗଞ୍ଜାମ ଜିଲା ନାରାୟଣପୁର-ହରିପୁର ରାସ୍ତାରେ ନିର୍ମିତ ବ୍ରିଜ କାର୍ଯ୍ୟ ଅଧାପନ୍ତରିଆ ଭାବେ ପଡିରହିଛି। ଲଗାଣ ବର୍ଷା ହେଲେ ଉକ୍ତ ରାସ୍ତାରେ ପାଣି ପ୍ରବାହିତ ଯୋଗୁ ରାସ୍ତାରେ ଯାଆସ ବିପଦସଙ୍କୁଳ ପାଲଟିଛି। ଏହି କ୍ରମରେ ଗତ ଦୁଇ ଦିନ ଲଘୁଚାପ ଜନିତ ଲଗାଣ ବର୍ଷା ଯୋଗୁ ଉକ୍ତ ରାସ୍ତା ଦୁଇଫୁଟ ଉଚ୍ଚର ପାଣି ପ୍ରବାହିତ ହେବା ଯୋଗୁ ଆଖପାଖ ଅଞ୍ଚଳର ପ୍ରାୟ ୯ଟି ଗାଁର ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ କରିଛନ୍ତି।
