କାମାକ୍ଷାନଗର,୨୮।୮(ଡି.ଏନ୍.ଏ.): ଢେଙ୍କାନାଳ ଜିଲା କାମାକ୍ଷାନଗର ଥାନା ପଥରଖମ୍ବ ଛକରେ ରବିବାର ଭୋର ସମୟରେ ଏକ ଦୁର୍ଘଟଣା ଘଟିଛି। ଅଟୋ-ଟ୍ରକ ମୁହାଁମୁହିଁ ଧକ୍କା ହେବା ଫଳରେ ଅଟୋ ଡ୍ରାଇଭରଙ୍କ ସମେତ ୫ ଜଣଙ୍କ ମୃତ୍ୟୁ ଘଟିଛି। ସମସ୍ତ ମୃତକଙ୍କ ଘର କାମାକ୍ଷାନଗର ଥାନା ବାଙ୍ଗୁରା ଗ୍ରାମରେ ବୋଲି ଜଣାପଡିଛି।
ସୂଚନାଯୋଗ୍ୟ, (ଏବି୦୬ ଏଫ୍ ୯୫୯୦)ନଂ. ଏକ ଅଟୋରେ ବାଙ୍ଗୁରା ଗ୍ରାମର ଆଦିକନ୍ଦ ସାମଲ, ତାଙ୍କ ଭାଇ ଭେଲୁ ସାମଲ ଓ ଭେଲୁଙ୍କ ପୁଅ ପିଣ୍ଟୁ ସାମଲ, ପହଲି ସାମଲ ଟୋଲ ପେଷାଇବାପାଇଁ ବଣ୍ଟି ସାମଲଙ୍କ ଅଟୋରେ ମୁକ୍ତାପଶି ଗ୍ରାମକୁ ଜାତୀୟ ରାଜପଥ ୫୩ ଦେଇ ଯାଉଥିଲେ। ସେହି ସମୟରେ ବିପରୀତ ଦିଗରୁ ଆସୁଥିବା (ଏଡି୦୫ଏଚ୦୮୨୫) ନଂ. ଏକ କୋଇଲା ବୋଝେଇ ଟ୍ରକ ସହ ଅଟୋ ମୁହାଁମୁହିଁ ହୋଇଥିଲା। ଏଥିରେ ଅଟୋ ଡ୍ରାଇଭର ବଣ୍ଟିଙ୍କ ସମେତ ସମସ୍ତ ଯାତ୍ରୀଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି। ତେବେ ଟ୍ରକ୍ ଡ୍ରାଇଭର ଓ ହେଲ୍ପର ଘଟଣାସ୍ଥଳରୁ ଫେରାର ହୋଇଯାଇଛନ୍ତି। ଖବରପାଇ କାମାକ୍ଷାନଗର ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି। ଘଟଣାସ୍ଥଳରେ ଚପା ଉତ୍ତେଜନା ଦେଖାଦେଇଛି।