ପୁରୀ ଅଫିସ,୧୧।୬: ଆସନ୍ତା ୨୦ତାରିଖରୁ ଘୋଷଯାତ୍ରା ଅନୁଷ୍ଠିତ ହେବାକୁ ଯାଉଛି। ଏ ନେଇ ସମସ୍ତ ପ୍ରସ୍ତୁତି ଜୋରସୋର ଚାଲିଥିବା ବେଳେ ଶନିବାର ଟ୍ରାଫିକ ପୋଲିସ ଏବଂ ଶ୍ରୀକ୍ଷେତ୍ର ଅଟୋ ଚାଳକ ସଂଘ ଓ ଅଟୋ ଚାଳକ ମହାସଂଘ ମଧ୍ୟରେ ଏକ ସମନ୍ବୟ ବୈଠକ ଅନୁଷ୍ଠିତ ହୋଇଛି। ବୈଠକରେ ଅତିରିକ୍ତ ଏସ୍ପି ପୂଣ୍ଣଚନ୍ଦ୍ର ଶବର, ଟ୍ରାଫିକ ଡିଏସ୍ପି ନିରଞ୍ଜନ ସବର, ଟ୍ରାଫିକ ଥାନା ଅଧିକାରୀ ସଙ୍ଗୀତା ଦାସ ଏବଂ ପରିବହନ ଅଧିକାରୀ ରବନୀ ପଟ୍ଟନାୟକ ଏବଂ ଅଟୋ ସଂଘ, ମହାସଂଘ ସଭାପତି ଏବଂ ସମ୍ପାଦକମାନେ ଯୋଗଦେଇଥିଲେ। ବୈଠକରେ ମହାପ୍ରଭୁଙ୍କ ଘୋଷଯାତ୍ରା ସମୟରେ ଅଟୋ ଚାଳକମାନେ ଭକ୍ତ ଏବଂ ଯାତ୍ରୀମାନଙ୍କୁ କିପରି ସେବା ଯୋଗାଇ ଦେବେ ସେ ସମ୍ପର୍କରେ ବିସ୍ତୁତ ଆଲୋଚନା କରାଯାଇଥିଲା। ବୈଠକରେ ନିଷ୍ପତ୍ତି ଅନୁଯାୟୀ ତାଳବଣିଆ ଏବଂ ମାଳତିପାଟପୁରଠାରେ ଦୁଇଟି ସ୍ଥାନରେ ଘୋଷଯାତ୍ରା ସମୟରେ ଅଟୋ ରଖିବା ପାଇଁ ବ୍ୟବସ୍ଥା କରାଯାଇଛି। ମାଳତିପାଟପୁରଠାରୁ ଅଟୋ ଚାଳକମାନେ ଯାତ୍ରୀଙ୍କୁ ଜାତୀୟ ରାଜପଥ ଦେଇ ଅଠରନଳାସ୍ଥିତ ବାନାମ୍ବର ମନ୍ଦିର ନିକଟକୁ ଆସିବେ। ସେଠାରେ ଯାତ୍ରୀଙ୍କୁ ଓହ୍ଲାଇ ପୁଣି ମାଳତିପାଟପୁରସ୍ଥିତ ବସଷ୍ଟାଣ୍ଡକୁ ଯିବେ। ସେହିପରି ତାଳବଣିଆଠାରୁ ଯାତ୍ରୀଙ୍କୁ ନେଇ ଆସୁଥିବା ଅଟୋ ଚାଳକମାନେ ପେଣ୍ଠକଟା ସିଟି ରୋଡ ଦେଇ ଅର୍ବାନ ହାଟ ହୋଇ ଜିଲା ସ୍କୁଲରେ ଯାତ୍ରୀଙ୍କୁ ଛାଡିବ। ଅପରପକ୍ଷେ ଫେରିଲା ବେଳେ ଘୋଡା ବଜାର ଦେଇ ଶ୍ରୀକ୍ଷେତ୍ର କଲୋନୀ ଦେଇ ତାଳବଣିଆକୁ ଫେରିବେ। ତେବେ କିଛି ଅଟୋ ଚାଳକ ରହି ଭକ୍ତଙ୍କୁ ସେବା ଯୋଗାଇବେ। ତେବେ ଅଟୋ ଚାଳକଙ୍କ ପାଇଁ ଏହି ନିୟମ ରଥଯାତ୍ରା, ବାହୁଡା ଏବଂ ସୁନାବେଶ ଦିନ ଲାଗୁ ହେବ। ତେବେ ଅନ୍ୟଦିନରେ ଚାଳକଙ୍କ ପାଇଁ ସ୍ବତନ୍ତ୍ର ବ୍ୟବସ୍ଥା ଲାଗୁ କରାଯିବ ବୋଲି ବୈଠକରେ ନିଷ୍ପତ୍ତି ହୋଇଛି। ଅପରପକ୍ଷେ ରଥଯାତ୍ରା, ବାହୁଡା ଏବଂ ସୁନାବେଶ ଦିନରେ ଅଟୋଗୁଡିକୁ ଟାଉନ ତଥା ବଡ଼ଦାଣ୍ଡ ଓ ବିଭିନ୍ନ ସାହି ଗଳିରେ ପ୍ରବେଶ ପାଇଁ ବାରଣ କରାଯାଇଛି। ସେହିପରି ଅଟୋଚାଳକଙ୍କ ପେଟ ପାଟଣାକୁ ନଜରରେ ରଖି ଘୋଷଯାତ୍ରାର ଅନ୍ୟ ଦିନରେ କିପରି ବ୍ୟବସାୟ କରିବେ ସେନେଇ ପରବର୍ତ୍ତୀ ସମୟରେ ଏକ ବୈଠକ କରାଯାଇ ସ୍ବତନ୍ତ୍ର ବ୍ୟବସ୍ଥା କରାଯିବ ବୋଲି ବୈଠକରେ ନିଷ୍ପତ୍ତି ହୋଇଛି। ସେହିପରି କୌଣସି ଅଟୋ ଚାଳକ ନିଶା ସେବକ କରି ଗାଡି ଚଳାଇବେ ନାହିଁ। ଭକ୍ତମଙ୍କଠାରୁ ନିର୍ଦ୍ଧାରିତ ମୂଲ୍ୟଠାରୁ ଅଧିକ ଟଙ୍କା ନେବେ ନାହିଁ। ଓଭର ଲୋଡିଂ କରିବେ ନାହିଁ ବୋଲି ନିର୍ଦ୍ଦେଶ ଦିଆଯାଇଛି।