କୋରୁକୋଣ୍ଡା ୧୩।୩(ଡି.ଏନ.ଏ.): ବାଲିମେଳା ନଗରରେ ଥିବା ମୁଖ୍ୟ ରାସ୍ତା ପ୍ରଶସ୍ତିକରଣ ଓ ସୌନ୍ଦର୍ଯ୍ୟକରଣ ନିମନ୍ତେ ରାସ୍ତା ପାର୍ଶ୍ୱରେ ଥିବା ସରକାରୀ ଜମିରେ ଦୋକାନ ଗୃହ ଗୁଡିକ ଉଚ୍ଛେଦ କରାଯାଇଛି। ସୂଚନାନୁସାରେ, ବାଲିମେଳା ନଗରରେ ଥିବା ମୁଖ୍ୟ ରାସ୍ତାକଡରେ କିଛି ବ୍ୟବସାୟୀ ଦୀର୍ଘ ବର୍ଷ ଧରି ଉଠା ଦୋକାନ କରି ନିଜ ପରିବାର ପୋଷଣ କରୁଥିଲେ। ମାତ୍ର ପ୍ରଶାସନ ପକ୍ଷରୁ ପ୍ରଶସ୍ତିକରଣ ଓ ମୁକ୍ତା ଯୋଜନାରେ ସୌନ୍ଦର୍ଯ୍ୟକରଣ ନିମନ୍ତେ ମୁଖ୍ୟ ରାସ୍ତାକଡରେ ଉଠା ଦୋକାନୀମାନଙ୍କୁ ଉଚ୍ଛେଦ କରାଯାଇଛି। ପ୍ରଥମ ପର୍ଯ୍ୟାୟରେ ବାଲିମେଳା ସହରରେ ଥିବା କାଳିଛକ ନିକଟରେ ନୂତନ ଭାବେ ନିର୍ମାଣ ହୋଇଥିବା ଭେଣ୍ଡିଙ୍ଗ ଜୋନ ସମ୍ମୁଖରେ ଥିବା ଦୋକାନ ଗୃହଗୁଡିକ ହଟାଯାଇଛି। ଖବରପାଇ ନଗର ବଣିକ ସଙ୍ଘ ସଭାପତି ରାଜେନ୍ଦ୍ର କୁଳଦୀପ ଓ କାଳୀ ଛକ ବଣିକ ସଙ୍ଘ ସଭାପତି ବିଜୟ କ୍ରିଷ୍ଣା ଦାସ ଘଟଣାସ୍ଥଳରେ ପହଞ୍ଚି ପ୍ରଶାସନ ଆଲୋଚନା କରିବା ସହ ଉଠା ଦୋକାନୀମାନଙ୍କୁ ଥଇଥାନ ବ୍ୟବସ୍ଥା କରିବାକୁ ଆଲୋଚନା କରିଥିଲେ। ଆଲୋଚନା ପରେ ପ୍ରଶାସନ ପକ୍ଷରୁ କୁହାଯାଇଛି ଯେ, ଉଠା ଦୋକାନୀ ବ୍ୟବସାୟୀମାନଙ୍କୁ ସରକାରଙ୍କ ତରଫରୁ ମୁକ୍ତା ଯୋଜନାରେ ନିର୍ମାଣ ହୋଇଥିବା ଷ୍ଟଲ ଗୁଡିକ ବିନା ମୂଲ୍ୟରେ ପ୍ରଦାନ କରାଯିବ। ଏହି ଜବର ଦଖଲ ଉଚ୍ଛେଦ ସମୟରେ ବାଲିମେଳା ଏନ୍ଏସି ନିର୍ବାହୀ ଅଧିକାରୀ କୃଷ୍ଣ ଚନ୍ଦ୍ର ରଥ ଓ କର୍ମଚାରୀ ଉପସ୍ଥିତ ଥିଲେ।