ଡେରାଡୁନ,୪।୧୦ : ଉତ୍ତରାଖଣ୍ଡର ଉତ୍ତରକାଶୀ ଜିଲାର ଡୋକ୍ରାନି ବମାକ ଗ୍ଳାସିୟରରେ ମଙ୍ଗଳବାର ହିମସ୍ଖଳନ ଘଟିଛି। ସୂଚନାନୁସାରେ, ନେହେରୁ ପର୍ବତାରୋହଣ ପ୍ରତିଷ୍ଠାନ (ଏନଆଇଏମ)ର ୩୪ ଜଣ ପର୍ବତାରୋହୀ ଏବଂ ୭ ଜଣ ପ୍ରଶିକ୍ଷକ ସେଠାରେ ଖରାପ ପାଗ ଯୋଗୁ ଫସି ରହିଛନ୍ତି। ଏନଆଇଏମ କଲୋନେଲ ଅଜୟ ବିଷ୍ଟ କହିଛନ୍ତି ଯେ ଏହି ସମୟ ମଧ୍ୟରେ ୯ ଜଣ ପର୍ବତାରୋହୀଙ୍କ ମୃତଦେହ ଉଦ୍ଧାର କରାଯାଇଛି। ସେଥି ମଧ୍ୟରେ ଜଣେ ପ୍ରଶିକ୍ଷକଙ୍କ ମୃତଦେହ ରହିଛି। ଏଥିସହିତ ୨୩ ଜଣ ପର୍ବତାରୋହୀ ନିଖୋଜ ଅଛନ୍ତି। ଡିଏମ ଅଭିଷେକ ରୁହେଲା କହିଛନ୍ତି ଯେ ଖରାପ ପାଗ ଯୋଗୁଁ ଉଦ୍ଧାର କାର୍ଯ୍ୟ ବନ୍ଦ ହୋଇଯାଇଛି। ପାଗ ଭଲ ହେଲେ ପୁନର୍ବାର ଉଦ୍ଧାର କାର୍ଯ୍ୟ ଆରମ୍ଭ ହେବ।
ଡିଜି ଏସଡିଆରଏଫ ରିଦ୍ଧିମ ଅଗ୍ରୱାଲ କହିଛନ୍ତି ଯେ ସରକାର ବାୟୁସେନା ସହିତ ଯୋଗାଯୋଗ କରିଛନ୍ତି। ତିନୋଟି ହେଲିକପ୍ଟର ସମଗ୍ର ଅଞ୍ଚଳର ଏକ ରେକି କରି ଅନ୍ୟମାନଙ୍କ ସନ୍ଧାନ କରିବେ। ଏସଡିଆରଏଫ କମାଣ୍ଡାଣ୍ଟ ମାଣିକାନ୍ତ ମିଶ୍ର କହିଛନ୍ତି ଯେ ଏସଡିଆରଏଫର ପାଞ୍ଚଟି ଟିମ ସାହସ୍ତ୍ରଧାରା ହେଲିପ୍ୟାଡରୁ ଯାତ୍ରା ଆରମ୍ଭ କରିଛନ୍ତି। ତିନୋଟି ଦଳକୁ ରିଜର୍ଭରେ ରଖାଯାଇଛି। ଆବଶ୍ୟକ ହେଲେ ଏହି ଦଳଗୁଡିକ ମଧ୍ୟ ପଠାଯିବ ।
ନେହେରୁ ପର୍ବତାରୋହୀ ପ୍ରତିଷ୍ଠାନର ମୌଳିକ ଏବଂ ଉନ୍ନତ ପ୍ରଶିକ୍ଷଣ ୨୨ ସେପ୍ଟେମ୍ବରରୁ ଡୋକ୍ରାନି ବମାକ ଗ୍ଲାସିଅରର ଦ୍ରୌପଦୀ ଦାଣ୍ଡା -୨ପାହାଡରେ ଚାଲିଥିଲା। ଯେଉଁଥିରେ ମୌଳିକ ତାଲିମ ପାଇଁ ୯୭ ପ୍ରଶିକ୍ଷାର୍ଥୀ, ୨୪ ପ୍ରଶିକ୍ଷକ ଏବଂ ନିମର ଜଣେ ଅଧିକାରୀଙ୍କ ସମେତ ସମୁଦାୟ ୧୨୨ ଜଣ ବ୍ୟକ୍ତି ସାମିଲ ହୋଇଥିଲେ । ଅପରପକ୍ଷରେ ଉନ୍ନତ ପାଠ୍ୟକ୍ରମରେ ୪୪ ଜଣ ପ୍ରଶିକ୍ଷାର୍ଥୀ ଏବଂ ନଅ ଜଣ ପ୍ରଶିକ୍ଷକଙ୍କ ସମେତ ମୋଟ ୫୩ ଜଣ ଯୋଗ ଦେଇଥିଲେ।
ଜିଲା ବିପର୍ଯ୍ୟୟ ପରିଚାଳନା ଅଧିକାରୀ ଦେବେନ୍ଦ୍ର ପାଟୱାଲ କହିଛନ୍ତି ଯେ ଫସି ରହିଥିବା ଲୋକଙ୍କୁ ଉଦ୍ଧାର କରିବା ପାଇଁ ଏନଆଇଏମ ଦ୍ୱାରା ଉଦ୍ଧାର କାର୍ଯ୍ୟ ଚାଲିଛି। ଘଟଣାସ୍ଥଳରେ ପ୍ରତିଷ୍ଠାନର ଦୁଇଟି ସାଟେଲାଇଟ ଫୋନ ଅଛି। ଉଦ୍ଧାର କାର୍ଯ୍ୟ ପାଇଁ ଏନଆଇଏମର ଅଧିକାରୀଙ୍କ ସହ ନିରନ୍ତର ସମନ୍ବୟ ରକ୍ଷା କରାଯାଉଛି।
୍
ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ଟୁଇଟରେ ଏସମ୍ପର୍କରେ ସୂଚନା ଦେଇ ଏହି ପ୍ରସଙ୍ଗରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ସହ କଥା ହୋଇଛନ୍ତି। ସେ ଲେଖିଛନ୍ତି ଯେ ଉଦ୍ଧାର କାର୍ଯ୍ୟକୁ ତ୍ୱରାନ୍ବିତ କରିବା ପାଇଁ ସେନାର ସାହାଯ୍ୟ ନେବାକୁ ଏକ ଅନୁରୋଧ କରାଯାଇଛି। କନ୍ଦ୍ର ସରକାରଙ୍କ ତରଫରୁ ସମସ୍ତ ସାହାଯ୍ୟ କରିବାକୁ ନିର୍ଭର ପ୍ରତିଶ୍ରୁତି ଦିଆ ଯାଇଥିବା ସେ କହିଛନ୍ତି।