ନୂଆଦିଲ୍ଲୀ,୧୦।୫: (ପି.ଟି.):ପ୍ରୋଟିନ୍ ପାଉଡର ଓ ଅନ୍ୟାନ୍ୟ ପ୍ରୋଟିନ୍ ସପ୍ଲିମେଣ୍ଟଗୁଡ଼ିକଠାରୁ ଦୂରେଇ ରହିବାକୁ ଭାରତୀୟ ଭେଷଜ ଗବେଷଣା ପରିଷଦ (ଆଇସିଏମ୍ଆର୍) ପରାମର୍ଶ ଦେଇଛି। ଲୁଣ ଖାଇବାରେ କଟକଣା ସମେତ ଚିନି ଏବଂ ପ୍ରକ୍ରିୟାକୃତ ଖାଦ୍ୟ କମ୍ ଖାଇବାକୁ ଆଇସିଏମ୍ଆର୍ ସୁପାରିସ୍ କରିଛି। ସୁସ୍ଥ ଖାଦ୍ୟ ଚୟନ ଲାଗି ପ୍ୟାକେଟ୍ଗୁଡ଼ିକରେ ଲାଗିଥିବା ଲେବଲ୍ର ସୂଚନାକୁ ପଢ଼ିବା ପାଇଁ ପରାମର୍ଶ ଦିଆଯାଇଛି। ଅଧିକ ପରିମାଣରେ ପ୍ରୋଟିନ୍ ପାଉଡର କିମ୍ବା ପ୍ରୋଟିନ୍ ସପ୍ଲିମେଣ୍ଟ ଦୀର୍ଘଦିନ ଯାଏ ସେବନ କରିବା ବିପଜ୍ଜନକ ହୋଇପାରେ। ଏହାଦ୍ୱାରା ବୋନ୍ ମିନେରାଲ କ୍ଷୟ ହେବା ସହ କିଡ୍ନୀ ନଷ୍ଟ ହେବା ସମ୍ଭାବନା ରହିଛି। ସେହିପରି ଆମେ ଯେତିକି ଶକ୍ତି ଗ୍ରହଣ କରୁଛେ, ତା’ର ୫ ପ୍ରତିଶତରୁ କମ୍ ଚିନି ରହିବା ଆବଶ୍ୟକ। ଏକ ସନ୍ତୁଳିତ ଆହାରରେ ଖାଦ୍ୟଶସ୍ୟ ୪୫ କ୍ୟାଲୋରିରୁ ଅଧିକ ପ୍ରଦାନ କରିବା ଉଚିତ ନୁହେଁ। ସେହିପରି ଡାଲି ଓ ମଞ୍ଜିଜାତୀୟ ଖାଦ୍ୟ ଏବଂ ମାଂସରୁ ୧୫ ପ୍ରତିଶତ ପର୍ଯ୍ୟନ୍ତ କ୍ୟାଲୋରି ମିଳିବା ଆବଶ୍ୟକ। ଅବଶିଷ୍ଟ କ୍ୟାଲୋରି ଛୁଇଁ, ପନିପରିବା, ଫଳ ଓ କ୍ଷୀରରୁ ଆସିବା ଦରକାର। ମୋଟ ଚର୍ବିଜାତୀୟ ଖାଦ୍ୟରୁ ୩୦ ପ୍ରତିଶତ ବା ତା’ଠାରୁ କମ୍ ଶକ୍ତି ମିଳିବା ଆବଶ୍ୟକ ବୋଲି ଗାଇଡ୍ଲାଇନରେ କୁହାଯାଇଛି।
ଆଇସିଏମ୍ଆର୍ ଅଧୀନରେ ଥିବା ହାଇଦ୍ରାବାଦର ନ୍ୟାଶନାଲ ଇନ୍ଷ୍ଟିଚ୍ୟୁଟ୍ ଅଫ୍ ନ୍ୟୁଟ୍ରିଶନ (ଏନ୍ଆଇଏନ୍) ପକ୍ଷରୁ ଭାରତୀୟଙ୍କ ପାଇଁ ବୁଧବାର ଏକ ସଂଶୋଧିତ ଆହାର ଗାଇଡ୍ଲାଇନ ଜାରି ହୋଇଛି। ଜରୁରୀ ପୋଷଣ ଆବଶ୍ୟକତା ପୂରଣ କରିବା ଏବଂ ଅଣସଂକ୍ରାମକ ରୋଗ (ଏନ୍ସିଡି)ରୁ ରକ୍ଷା ପାଇଁ ଏହି ଦିଶାନିର୍ଦ୍ଦେଶ ଜାରି କରାଯାଇଛି। ଆଇସିଏମ୍ଆର୍-ଏନ୍ଆଇଏନ୍ର ନିର୍ଦ୍ଦେଶକ ଡ. ହେମଲତା ଆର୍.ଙ୍କ ନେତୃତ୍ୱରେ ବିଭିନ୍ନ ବିଭାଗର ବିଶେଷଜ୍ଞମାନଙ୍କ ଏକ କମିଟି ଉକ୍ତ ଗାଇଡ୍ଲାଇନ ପ୍ରସ୍ତୁତ କରିଥିବାବେଳେ ଏହାର ଏକାଧିକ ବୈଜ୍ଞାନିକ ସମୀକ୍ଷା ହୋଇଛି।