ନୂଆଦିଲ୍ଲୀ,୧।୩: ଦେଶର ପ୍ରମୁଖ ସିପିଏସ୍ଇ ‘ପାଓ୍ବାର ଗ୍ରୀଡ୍ କର୍ପୋରେଶନ ଅଫ୍ ଇଣ୍ଡିଆ ଲିମିଟେଡ୍’(ପିଜିସିଆଇଏଲ୍) ପକ୍ଷରୁ ଏକ ୩ ଦିନିଆ ସଚେତନତା କାର୍ଯ୍ୟକ୍ରମ ବୁଧବାରଠାରୁ ଆନୁଷ୍ଠାନିକ ଭାବେ ଆରମ୍ଭ ହେଉଛି। ଏପରିକି କେନ୍ଦ୍ର ସରକାରଙ୍କ ଶକ୍ତି ମନ୍ତ୍ରଣାଳୟ ଅଧୀନରେ ଥିବା ମହାରତ୍ନା ସିପିଏସ୍ଇ ପାଓ୍ବାର ଗ୍ରୀଡ୍ ଚଳିତ ବର୍ଷ ମାର୍ଚ୍ଚ ୧ରୁ ୩ ତାରିଖ ପର୍ଯ୍ୟନ୍ତ ବିଭିନ୍ନ କାର୍ଯ୍ୟକ୍ରମର ଆୟୋଜନ କରୁଥିବା ଜଣାପଡ଼ିଛି। ବିଶେଷ କରି କେନ୍ଦ୍ରୀୟ ଭିଜିଲାନ୍ସ କମିଶନଙ୍କ ନିର୍ଦ୍ଦେଶରେ ଜି-୨୦ ଫୋରମର ଆଗାମୀ ବୈଠକ ମାର୍ଚ୍ଚ ୧ରୁ ୩ ପର୍ଯ୍ୟନ୍ତ ଗୁରୁଗ୍ରାମଠାରେ ଆୟୋଜିତ ହେବ। ଏପରିକି ଦୁର୍ନୀତି ନିବାରଣ କାର୍ଯ୍ୟ ଗୋଷ୍ଠୀ (ଏସିଡବ୍ଲ୍ୟୁଜି)ର ଆଗାମୀ ବୈଠକ ପର୍ଯ୍ୟନ୍ତ କମ୍ପାନୀ ଅନେକ ଜନସଚେତନତା ସୃଷ୍ଟି କରିବ। ଅପରପକ୍ଷରେ ଗୁରୁଗ୍ରାମ ଏବଂ ଦିଲ୍ଲୀର ବିଭିନ୍ନ ସରକାରୀ ଶିକ୍ଷାନୁଷ୍ଠାନରେ ବିତର୍କ, କୁଇଜ୍, ପ୍ରବନ୍ଧ, ପୋଷ୍ଟରମେକିଂ ଭଳି ପ୍ରତିଯୋଗିତା ଆୟୋଜନ ହେବ। ସେହିଭଳି ଜନସଚେତନତା ସୃଷ୍ଟି କରିବା ପାଇଁ ପାଓ୍ବାର ଗ୍ରୀଡ ମଧ୍ୟ ଗୁରୁଗ୍ରାମର ପ୍ରମୁଖ ସ୍ଥାନରେ ଷ୍ଟ୍ରିଟ୍ ପ୍ଲେ ମାଧ୍ୟମରେ ସାଧାରଣ ଜନତାଙ୍କ ପାଇଁ ସଚେତନତା କାର୍ଯ୍ୟକ୍ରମର ଆୟୋଜନ କରୁଛି।