ବାଲେଶ୍ୱର ଅଫିସ, ୭ା୭: ବାଲେଶ୍ୱର ଜିଲାର କେତେକ ଛାତ୍ରୀଛାତ୍ରଙ୍କ ଦ୍ୱାରା ପ୍ରସ୍ତୁତ ସଚେତନତାଧର୍ମୀ କ୍ଷୁଦ୍ର ଫିଲ୍ମ ‘ରାକ୍ଷୀ’ ଜାତୀୟସ୍ତରରେ ପୁରସ୍କୃତ ହୋଇଛି। ପୁରସ୍କାର ସ୍ବରୂପ ଉକ୍ତ ଟିମ୍କୁ ଟ୍ରଫି ସହ ୧ଲକ୍ଷ ଟଙ୍କା ମିଳିଛି। ଏହି ପୁରସ୍କାର ଗ୍ରହଣ କରି ଓଡ଼ିଶା ତଥା ବାଲେଶ୍ୱର ପାଇଁ ଗର୍ବ ଆଣିଛନ୍ତି ‘ରାକ୍ଷୀ’ ଫିଲ୍ମର ଲେଖକ, ନିର୍ଦ୍ଦେଶକ ତଥା ଅଭିନେତା ମନ୍ମୟ ଦେ ଓ ତାଙ୍କ ଟିମ୍।
ରାଜ୍ୟ ଟ୍ରାନ୍ସପୋର୍ଟ ଅଥରିଟି ପକ୍ଷରୁ ପୁରୀ ଟାଉନ୍ ହଲରେ ଜାତୀୟ ସଡ଼କ ସୁରକ୍ଷା କ୍ଷୁଦ୍ର ଚଳଚ୍ଚିତ୍ର ଉତ୍ସବ ଆୟୋଜିତ ହୋଇଥିଲା। ଏଥିରେ ସାରା ଭାରତର ୮ଟି ରାଜ୍ୟର ୬ଟି ଭାଷାର ୨୪୦ଟି କ୍ଷୁଦ୍ର ଚଳଚ୍ଚିତ୍ର ଅଂଶଗ୍ରହଣ କରିଥିଲା। ବିଶେଷ କରି ଓଡ଼ିଆ ଓ ଅଣଓଡ଼ିଆ ବିଭାଗ ଅଲଗା ରହିଥିଲା। ତେବେ ଓଡ଼ିଆ ଭାଷା ତଥା ବିଭାଗରେ ୧୭୦ଟି କ୍ଷୁଦ୍ର ଚଳଚ୍ଚିତ୍ର ମଧ୍ୟରୁ ‘ରାକ୍ଷୀ’ ଫିଲ୍ମ ଜାତୀୟସ୍ତରରେ ପୁରସ୍କୃତ ହୋଇଛି।
ଦିନେ କିଛି ସାଙ୍ଗ ମିଶି ଏକ ୟୁଟ୍ୟୁବ ଚ୍ୟାନେଲ କରି ସେଥିରେ କମେଡି ଭିଡ଼ିଓ ସହ କିଛି ସଚେତନତାମୂଳକ ବାର୍ତ୍ତା ପ୍ରଦର୍ଶନ କରୁଥିଲେ। ସେମାନଙ୍କ ଏପରି ଉଦ୍ୟମ ଦେଇଛି ଏକ ସ୍ବତନ୍ତ୍ର ପରିଚୟ। ସରକାରଙ୍କ ସଡ଼କ ସୁରକ୍ଷା ସମ୍ପର୍କିତ ଏକ ଜାତୀୟସ୍ତରୀୟ ପ୍ରତିଯୋଗିତା ଆୟୋଜିତ ହେବା ଜାଣିବା ପରେ ବାଲେଶ୍ୱର ସହର ଚୂନଭାଟିରେ ରହୁଥିବା ଅଭିନେତା ମନ୍ମୟ ଦେ ନିଜ ଟିମ୍କୁ ନେଇ କାମ ଆରମ୍ଭ କରି ଦେଇଥିଲେ। ୨ମିନିଟ୍ର ଏହି ଭିଡ଼ିଓରେ ସଡ଼କ ସୁରକ୍ଷା ବାର୍ତ୍ତା ଦିଆଯାଇଛି। ଗାଡ଼ି ଚଳାଇବା ସମୟରେ ହେଲମେଟ୍ ବ୍ୟବହାର କେତେ ଗୁରୁତ୍ୱପୂର୍ଣ୍ଣ ତାର ଏକ ସୁନ୍ଦର ଉଦାହରଣ ଦେଇଛନ୍ତି ଏହି କଳାକାରମାନେ। ସେହିପରି ମହିଳାମାନଙ୍କ ମାସିକ ଋତୁସ୍ରାବ ସମୟରେ ସ୍ବଚ୍ଛତା କେତେ ଗୁରୁତ୍ୱପୂର୍ଣ୍ଣ, କପଡ଼ା ବଦଳରେ ସାନିଟାରୀ ନାପକିନ୍ ବ୍ୟବହାର ଫଳରେ ମହିଳା ବା ଝିଅମାନେ ସୁସ୍ଥତା ବଜାୟ ରଖିପାରିବେ ବୋଲି ଏହି କ୍ଷୁଦ୍ର ଚଳଚ୍ଚିତ୍ରରେ ଦର୍ଶାଯାଇଛି। ‘ରାକ୍ଷୀ’ ଫିଲ୍ମରେ ଭାଇ ଭୂମିକାରେ ମନ୍ମୟ ଅଭିନୟ କରିଥିବା ବେଳେ ଅନନ୍ୟା ପରିଡ଼ା ଭଉଣୀ ଭୂମିକାରେ ଅଭିନୟ କରିଛନ୍ତି। ସେମାନଙ୍କୁ ସହଯୋଗ କରିଥିଲେ ତାଙ୍କ ଟିମ୍।
