ଅପସ୍ମାର ହେଉଛି ଏକ ଅଣ-ସଂକ୍ରାମକ ମସ୍ତିଷ୍କ ସମସ୍ୟା। ଏହା ଆଂଶିକ ଭାବେ ଶରୀରର ଏକ ଅଂଶ କିମ୍ବା ସମଗ୍ର ଶରୀରକୁ ପ୍ରଭାବିତ କରିଥାଏ। ଏହା ଯୋଗୁ ବେଳେବେଳେ ଚେତନା ହରାଇବା ଭଳି ସ୍ଥିତି ସୃଷ୍ଟି ହୋଇଥାଏ। ନ୍ୟୁରନ କିମ୍ବା ମସ୍ତିଷ୍କ କୋଷିକାରେ ହଠାତ୍, ଅତ୍ୟଧି ବୈଦୁତିକ ଶକ୍ତି ପ୍ରବାହ ଯୋଗୁ ଏଭଳି ଅବସ୍ଥା ସୃଷ୍ଟି ହୋଇଥାଏ। ଅପସ୍ମାର ଯେ କୌଣସି ବୟସରେ ଲୋକଙ୍କୁ ପ୍ରଭାବିତ କରିପାରେ। ତେଣୁ ଏନେଇ ସଚେତନ ରହିଲେ ଏହାର ଉପଚାର ସମ୍ଭବ ହୋଇପାରିଥାଏ। ଏହି ସମସ୍ୟା ସମ୍ପର୍କରେ ଅଜ୍ଞାନତା ହେତୁ ବହୁ ସମସ୍ୟା ଦେଖାଦେଇଥାଏ।
ତେଣୁ ଅପସ୍ମାର, ଏହାର ଲକ୍ଷଣ ଏବଂ ଚିକିତ୍ସା ବିଷୟରେ ଲୋକମାନଙ୍କ ମଧ୍ୟରେ ସଚେତନତା ସୃଷ୍ଟି କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏହାକୁ ଦୃଷ୍ଟିରେ ରଖି ପ୍ରତିବର୍ଷ ନଭେମ୍ବର ୧୭ରେ ଜାତୀୟ ଏପିଲେପ୍ସି ଦିବସ( ଜାତୀୟ ଅପସ୍ମାର ଦିବସ) ପାଳନ କରାଯାଇଥାଏ।
ଜାତୀୟ ଏପିଲେପ୍ସି ଦିବସ ହେଉଛି ଏକ ଜାତୀୟ ସ୍ତରର ଅଭିଯାନ ଯାହାକି ଏପିଲେପ୍ସି ଫାଉଣ୍ଡେସନ ଅଫ ଇଣ୍ଡିଆ ଦ୍ୱାରା ଭାରତରେ ଏହି ସମସ୍ୟା ହ୍ରାସ କରିବାକୁ ଲକ୍ଷ୍ୟ ନେଇ ଆରମ୍ଭ କରାଯାଇଥିଲା। ମହାରାଷ୍ଟ୍ରର ମୁମ୍ବାଇରେ ଥିବା ଏପିଲେପ୍ସି ଫାଉଣ୍ଡେସନ ଡାକ୍ତର ନିର୍ମଳ ସୂର୍ଯ୍ୟଙ୍କ ଦ୍ୱାରା ୨୦୦୯ରେ ପ୍ରତିଷ୍ଠିତ ହୋଇଥିଲା। ଏହା ସହିତ ଏହି ସ୍ବାସ୍ଥ୍ୟଗତ ସମସ୍ୟା ସମ୍ପର୍କରେ ସଚେତନତା ସୃଷ୍ଟି ଲାଗି ପ୍ରତିବର୍ଷ ନଭେମ୍ବର ୧୭ରେ
ଜାତୀୟ ଅପସ୍ମାର ଦିବସ ପାଳନ କରାଯିବା ଲାଗି ନିଷ୍ପତ୍ତି ଗ୍ରହଣ କରାଯାଇଥିଲା। ଏପିଲେପ୍ସି ଫାଉଣ୍ଡେସନ ଅଫ ଇଣ୍ଡିଆ ଦେଶରେ ଏହି ରୋଗର ପ୍ରାଦୁର୍ଭାବ ହ୍ରାସ କରିବା ପାଇଁ ଦେଶବ୍ୟାପୀ ଅଭିଯାନ ଆରମ୍ଭ କରଥାଏ।
ବିଶ୍ୱ ସ୍ବାସ୍ଥ୍ୟ ସଂଗଠନ ଅନୁଯାୟୀ, ସମ୍ପ୍ରତି ୫୦ ନିୟୁତ ଲୋକ ଅପସ୍ମାର ସମସ୍ୟା ଭୋଗୁଛନ୍ତି। ଫଳରେ ଏହା ବିଶ୍ୱବ୍ୟାପି ଏକ ସାଧାରଣ ସ୍ନାୟୁଗତ ସମସ୍ୟାରେ ପରିଣତ ହୋଇଛି। ନିମ୍ନ ଏବଂ ମଧ୍ୟମ ଆର୍ଥିକ ବର୍ଗ ଦେଶରେ ଅପସ୍ମାର ସମସ୍ୟା ପ୍ରାୟ ୮୦ ପ୍ରତିଶତ ଲୋକଙ୍କଠାରେ ଦୃଷ୍ଟି ଗୋଚର ହୋଇଥାଏ। ତେଣୁ ଲୋକଙ୍କୁ ଅବସ୍ଥା ବିଷୟରେ ଅବଗତ କରାଇବା ଏବଂ ପ୍ରଭାବିତ ଲୋକଙ୍କ ସଂଖ୍ୟା ହ୍ରାସ କରିବା ଲାଗି ପ୍ରତିବର୍ଷ ଏହି ଦିବସ ପାଳନ କରାଯାଉଛି।