ତେହରାନ/ବ୍ରସେଲ୍ସ,୧୮ା୧୦: ଗାଜା ଉପରେ ଇସ୍ରାଏଲ୍ ବୋମାମାଡ଼ ବନ୍ଦ ନ କଲେ ଏହାକୁ ବିରୋଧ କରୁଥିବା ଶକ୍ତିକୁ କେହି ଅଟକାଇପାରିବେ ନାହିଁ ବୋଲି ମଙ୍ଗଳବାର ଇରାନର ସୁପ୍ରିମ୍ ଲିଡର ଆୟାତୋଲ୍ଲା ଅଲି ଖୋମିନି ଚେତାବନୀ ଦେଇଛନ୍ତି। ହମାସ୍ ଆତଙ୍କବାଦୀମାନେ ଗାଜା ସୀମା ଅତିକ୍ରମ କରି ଇସ୍ରାଏଲ୍ରେ ଅତର୍କିତ ଆକ୍ରମଣ କରିବା ସହ ୧,୪୦୦ରୁ ଊର୍ଦ୍ଧ୍ୱ ଲୋକଙ୍କୁ ହତ୍ୟା କରିଥିଲେ। ଏହାର ଜବାବରେ ଇସ୍ରାଏଲ୍ ଗାଜା ଷ୍ଟ୍ରିପ୍ ଉପରେ ଆକାଶମାର୍ଗରୁ ବୋମାମାଡ଼ ଜାରି ରଖିଛି। ଯୁଦ୍ଧ ବନ୍ଦ କରିବା ଲାଗି ଇସ୍ଲାମିକ୍ ରିପବ୍ଲିକ୍ ଉକ୍ତ ଅଞ୍ଚଳର ସମସ୍ତ ସହଯୋଗୀମାନଙ୍କ ସହ ଯୋଗାଯୋଗ ଜାରି ରଖିଛି। ହମାସ୍ ନିୟନ୍ତ୍ରିତ ଗାଜା ଷ୍ଟ୍ରିପ୍ରେ ଇସ୍ରାଏଲ୍ର ବୋମା ଓ ରକେଟ ଆକ୍ରମଣରେ ୨,୭୫୦ରୁ ଅଧିକ ପାଲେଷ୍ଟିନୀୟଙ୍କ ମୃତ୍ୟୁ ହେଲାଣି, ଯେଉଁଥିରୁ ଅଧିକାଂଶ ହେଉଛନ୍ତି ସାଧାରଣ ନାଗରିକ। ଏଭଳି ଜାରି ରହିଲେ ମୁସଲମାନ ଏବଂ ପ୍ରତିରୋଧୀ ଶକ୍ତି ଧାର୍ଯ୍ୟ ହରାଇବେ ଏବଂ ସେମାନଙ୍କୁ କେହି ଅଟକାଇପାରିବେ ନାହିଁ ବୋଲି ଆୟାତୋଲ୍ଲା କହିଛନ୍ତି।
ଯୁଦ୍ଧ ପରିପ୍ରେକ୍ଷୀରେ କେତେକ ରାଷ୍ଟ୍ର ଇସ୍ରାଏଲ୍କୁ ସମର୍ଥନ କରୁଥିବାବେଳେ ଅନ୍ୟମାନେ ପାଲେଷ୍ଟାଇନ୍କୁ ସମର୍ଥନ ଜଣାଇଛନ୍ତି। ଏଭଳି କୋଳାହଳ ଜାରି ରହିଥିବାବେଳେ ବ୍ରସେଲ୍ସ ୟୁରୋପୀୟ ୟୁନିୟନ(ଇୟୁ)ର ନେତାମାନଙ୍କ ଏକ ଭର୍ଚୁଆଲ ବୈଠକ ଅନୁଷ୍ଠିତ ହୋଇ ସଦ୍ଭାବନା ସ୍ଥାପନ ଲାଗି ଆହ୍ବାନ ଦିଆଯାଇଛି। ଏ ଦିଗରେ ବୈଶ୍ୱିକ ସ୍ତରରେ ଏକ ବଡ଼ କୂଟନୈତିକ ପ୍ରଭାବ ପକାଇବା ପାଇଁ ସେମାନେ ଉଦ୍ୟମ କରୁଛନ୍ତି। ସୋମବାର ରାତିରେ ବ୍ରସେଲ୍ସରେ ଆକ୍ରମଣ ହୋଇ ୨ ସୁଇଡେନ୍ ନାଗରିକଙ୍କ ମୃତ୍ୟୁ ଘଟିଥିବାରୁ ବିପଦକୁ ସମ୍ମୁଖୀନ ହେବା ଲାଗି ଏକାଠି ହେବାକୁ ଇୟୁ ନେତାମାନେ ଆହ୍ବାନ ଦେଇଛନ୍ତି। ଇୟୁ କମିଶନ ଅଧ୍ୟକ୍ଷ ଉର୍ସୁଲା ଭନ୍ ଡେର୍ ଲେୟେନ ଶୁକ୍ରବାର ଇସ୍ରାଏଲ୍ ଯାଇ ସମସ୍ୟା ସମାଧାନ ଲାଗି ଉଦ୍ୟମ କରିବାକୁ ଅଧିକାଂଶ ସଦସ୍ୟ ରାଷ୍ଟ୍ର ଅନୁଭବ କରୁଛନ୍ତି।
