ଲକ୍ଷ୍ନୌ,୯।୧: ଅଯୋଧ୍ୟାରେ ନିର୍ମିତ ଭବ୍ୟ ରାମ ମନ୍ଦିରରେ ରାମଲଲାଙ୍କ ପ୍ରାଣ ପ୍ରତିଷ୍ଠା ସମାରୋହ ପୂର୍ବରୁ ଜାନୁଆରୀ ୧୭ରେ ପ୍ରସ୍ତାବିତ ଦେବ ବିଗ୍ରହଙ୍କ ନଗର ଭ୍ରମଣ କାର୍ଯ୍ୟକ୍ରମକୁ ମନ୍ଦିର ଟ୍ରଷ୍ଟ ରଦ୍ଦ କରିଦେଇଛି।
ସୋମବାର ଟ୍ରଷ୍ଟର ଜଣେ ଅଧିକାରୀ କହିଛନ୍ତି , ସମଗ୍ର ଅଯୋଧ୍ୟା ନଗରରେ ପ୍ରତିମୂର୍ତ୍ତି ବୁଲେଇବା କାର୍ଯ୍ୟକ୍ରମ ରଦ୍ଦ କରାଯାଇଛି। ଏହା ବଦଳରେ ଟ୍ରଷ୍ଟ ସେହି ଦିନ (ଜାନୁଆରୀ ୧୭) ରାମ ଜନ୍ମଭୂମି ମନ୍ଦିର ପରିସରର ଭିତରେ ଥିବା ପ୍ରତିମୂର୍ତ୍ତିର ଭ୍ରମଣର ବ୍ୟବସ୍ଥା କରିବ।
ସେ କହିଛନ୍ତି , ସୁରକ୍ଷା ଏଜେନ୍ସିଙ୍କ ପରାମର୍ଶ କ୍ରମେ ସୁରକ୍ଷା କାରଣରୁ ଟ୍ରଷ୍ଟ ଏହି ପ୍ରସ୍ତାବିତ କାର୍ଯ୍ୟକ୍ରମକୁ ବାତିଲ କରିଦେଇଛି। ଅଯୋଧ୍ୟା ପ୍ରଶାସନ ଅନୁଯାୟୀ, ରାମଲଲାଙ୍କ ନୂତନ ପ୍ରତିମା ନଗରକୁ ନିଆଯିବା ପରେ ଭକ୍ତ ଓ ତୀର୍ଥଯାତ୍ରୀମାନେ ଦର୍ଶନ ପାଇଁ ଭିଡ଼ ଜମାଇବେ ଏବଂ ଭିଡ଼କୁ ନିୟନ୍ତ୍ରଣ କରିବା ପ୍ରଶାସନ ପାଇଁ କଷ୍ଟକର ହେବ ବୋଲି ଟ୍ରଷ୍ଟ ବୈଠକରେ ଆଲୋଚନା କରାଯାଇଥିଲା।