ନୂଆଦିଲ୍ଲୀ,୧୬।୮: ଦିଲ୍ଲୀ ଆଜାଦପୁର ମଣ୍ଡିରେ ପନିପରିବା ବିକ୍ରେତା ରାମେଶ୍ୱରଙ୍କ ଭାଇରାଲ ଭିଡିଓ ସୋସିଆଲ ମିଡିଆରେ ଅନେକଙ୍କୁ ପ୍ରଭାବିତ କରିଥିଲା। ଏହାପରେ ଜାତୀୟ ଗଣମାଧ୍ୟମର ଏକ ସ୍ବତନ୍ତ୍ର ସାକ୍ଷାତକାରରେ ସେ ରାହୁଲ ଗାନ୍ଧୀଙ୍କୁ ଭେଟିବାର ଇଚ୍ଛା ବିଷୟରେ କହିଥିଲେ। ରାହୁଲ ତାଙ୍କୁ ଭେଟି ତାଙ୍କ ସୁବିଧା ଅସୁବିଧା ପଚାରି ବୁଝିଥିଲେ। ତେବେ ସାକ୍ଷାତକାରରେ ରାମେଶ୍ୱର ଦରବୃଦ୍ଧି ଚାପରେ ସେ କିପରି ଚାପି ହୋଇଯାଇଛନ୍ତି ସେ ବିଷୟରେ ପ୍ରକାଶ କରିଥିଲେ।
ସାକ୍ଷାତକାରର ୪୮ଘଣ୍ଟା ନ ପୂରୁଣୁ ଭାଜପାର ଆଇଟି ସେଲ ମୁଖ୍ୟ ଅମିତ ମାଲଭିଆ ରମେଶ୍ୱରଙ୍କ ଏକ ଭିଡିଓ କ୍ଲିପ ସେୟାର କରିଛନ୍ତି। ଯାହାକୁ ନେଇ ଜାତୀୟ ରାଜନୀତି ସରଗରମ ହେବାରେ ଲାଗିଛି। ଭିଡିଓରେ ରାମେଶ୍ୱର କହିଛନ୍ତି, ପ୍ରଧାନମନ୍ତ୍ରୀ ମୋଦିଙ୍କ ଉଜ୍ଜଳା ଯୋଜନାରେ ତାଙ୍କୁ ମାଗଣା ଗ୍ୟାସ ସିଲିଣ୍ଡର ମିଳିଛି।
ମାଲଭିଆ ଟ୍ବିଟ୍ କରି କହିଛନ୍ତି, ଉଜ୍ଜଳା ଯୋଜନାରେ ରମେଶ୍ୱର ମାଗଣା ଗ୍ୟାସ ସିଲିଣ୍ଡର ପାଇଛନ୍ତି। କିନ୍ତୁ କେଜରିଓ୍ବାଲ ସରକାରଙ୍କ ମାଗଣା ବିଦ୍ୟୁତ ଓ ପାଣି ସେବା ତାଙ୍କୁ ମିଳିପାରିନାହିଁ। ଏସବୁ ଭିତରେ କେବଳ ରାହୁଲ ଗାନ୍ଧୀ ନିଜର ରାଜନୈତିକ ଲାଭ ପାଇଁ ଦାରିଦ୍ର୍ୟର ସୁଯୋଗ ଲାଭ ଉଠାଇଛନ୍ତି। ସେଥିପାଇଁ ତ ଗାନ୍ଧୀ ପରିବାରର ଚାରି ପିଢି କ୍ଷମତାରେ ରହିଛନ୍ତି।