ରାମପୁର ,୨୨।୧୦ : ଦୁଇଟି ଜନ୍ମ ପ୍ରମାଣପତ୍ର ମାମଲାରେ କୋର୍ଟ ସାତ ବର୍ଷ ଦଣ୍ଡାଦେଶ କରିବା ପରେ ଜେଲ ପଠାଯାଇଥିବା ଆଜାମ ଖାନ ଏବଂ ଅବଦୁଲ୍ଲା ଆଜମଙ୍କୁ ଅନ୍ୟ ଜିଲାକୁ ସ୍ଥାନାନ୍ତର କରାଯାଇଛି। ଆଜମ ଖାନଙ୍କୁ ରବିବାର ସୀତାପୁର ଏବଂ ଅବଦୁଲ୍ଲା ଆଜମଙ୍କୁ ହର୍ଦୋଇ ଜେଲକୁ ପଠାଯାଇଛି। ରାମପୁର ଜେଲରୁ ସ୍ଥାନାନ୍ତରିତ ହେବା ପୂର୍ବରୁ ଉଭୟଙ୍କର ମେଡିକାଲରେ ପରୀକ୍ଷା କରାଯାଇଥିଲା।
ଏହା ପରେ ସେମାନଙ୍କୁ କଡା ସୁରକ୍ଷା ସହ ଅଲଗା ଗାଡିରେ ସୀତାପୁର ଏବଂ ହର୍ଦୋଇ ଜେଲକୁ ନିଆଯାଇଥିଲା। ଉଭୟ ନେତାଙ୍କୁ ଅତିରିକ୍ତ ପୋଲିସ ଫୋର୍ସ ସହିତ ପଠାଯାଇଛି। ସୁରକ୍ଷା ମଧ୍ୟରେ ଉଭୟଙ୍କୁ ରାମପୁର ଜେଲରୁ ପ୍ରାୟ ପାଞ୍ଚଟା ବେଳେ ବାହାରକୁ ନିଆଯାଇଥିଲା। ଜେଲରୁ ବାହାରିବାବେଳେ ଆଜମ କହିଛନ୍ତି ତାଙ୍କୁ ଏନକାଉଣ୍ଟର କରାଯାଇପାରେ।
ଭୋରରେ ଜେଲରୁ ସ୍ଥାନାନ୍ତରଣ ହେବାର ଅର୍ଥ କ’ଣ ବୋଲି ସେ ପ୍ରଶ୍ନ କରିଛନ୍ତି। ଦୀର୍ଘ ଦିନ ଧରି ତାଙ୍କ ପରିବାରକୁ ହଇରାଣ କରାଯାଉଛି। ଏନକାଉଣ୍ଟର ଭୟରେ ଆଜମ ପୋଲିସ ଗାଡିରେ ବସିବାକୁ ମନା କରିଦେଇଥିଲେ। ଏହି କାରଣରୁ ଘଟଣାସ୍ଥଳରେ ଉପସ୍ଥିତ ଥିବା ପୋଲିସ କର୍ମଚାରୀମାନେ ମଧ୍ୟ କିଛି ସମୟ ଆଶ୍ଚର୍ଯ୍ୟ ହୋଇଯାଇଥିଲେ।
ଏହା ପୂର୍ବରୁ ମଧ୍ୟ ଆଜମ ତାଙ୍କ ଜୀବନ ପ୍ରତି ବିପଦ ପ୍ରକାଶ କରିଥିଲେ। ଶନିବାର ବଡ ପୁଅ ଆଦିବ ଆଜମ ରାମପୁର ଜେଲରେ ପହଞ୍ଚି ପିତା ଆଜମ ଖାନ, ମାତା ତାଜିନ ଫାତମା ଏବଂ ଭାଇ ଅବଦୁଲ୍ଲା ଆଜମଙ୍କୁ ଭେଟିଥିଲେ। ବର୍ତ୍ତମାନ ରାମପୁରର ମହିଳା ବ୍ୟାରେଜରେ ତାଜିନ ଫାତିମା ଏକୁଟିଆ ଅଛନ୍ତି।