ଲକ୍ଷ୍ନୌ,୨୮।୧୦: ହେଟ ସ୍ପିଚ୍ ମାମଲାରେ ସମାଜବାଦୀ ପାର୍ଟି ନେତା ଆଜମ ଖାଁଙ୍କ ବିଧାନସଭା ସଦସ୍ୟ ପଦ ରଦ୍ଦ କରିଦିଆଇଛି। ଗୁରୁବାର ରାମପୁର କୋର୍ଟ ଏହି ମାମଲାରେ ତାଙ୍କୁ ୩ ବର୍ଷର କାରାଦଣ୍ଡରେ ଦଣ୍ଡିତ କରିଥିଲେ। ଏଥିନେଇ ତାଙ୍କର ସଦସ୍ୟତା ରଦ୍ଦ କରିଦିଆଯାଇପାରେ ବୋଲି ଅନୁମାନ କରାଯାଉଥିଲା। ଶେଷରେ ତାହା ହୋଇଛି। ଉତ୍ତରପ୍ରଦେଶ ବିଧାନସଭା ବାଚସ୍ପତି ତାଙ୍କ ସଦସ୍ୟପଦକୁ ରଦ୍ଦ କରିଛନ୍ତି।
୨୦୧୯ ଲୋକ ସଭା ନିର୍ବାଚନ ସମୟରେ ଆଜମ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଟାର୍ଗେଟ କରି ଆପତ୍ତିଜନକ ଭାଷଣ ଦେଇଥିଲେ। ଏହାକୁ ନେଇ ଭାଜପା ନେତା ଆକାଶ ସକ୍ସେନା ଅଭିଯୋଗ କରିବା ପରେ ତାଙ୍କ ବିରୋଧରେ ମାମଲା ରୁଜୁ ହୋଇଥିଲା। ଏହି ମାମଲାରେ ରାମପୁରର ସ୍ବତନ୍ତ୍ର ଏମ୍ପି/ଏମ୍ଏଲ୍ଏ କୋର୍ଟ ଅକ୍ଟୋବର ୨୭ରେ ଶୁଣାଣି କରି ତାଙ୍କୁ ୩ ବର୍ଷ କାରାଦଣ୍ଡରେ ଦଣ୍ଡିତ କରିଥିଲେ।
ପୂର୍ବରୁ ଜମି ଦୁର୍ନୀତି ମାମଲାରେ ଆଜମ ୨ ବର୍ଷ ଜେଲ୍ରେ ରହିଛନ୍ତି। ଚଳିତ ବର୍ଷ ମେ’ରେ ସୁପ୍ରିମକୋର୍ଟ ଆଜମଙ୍କୁ ଅନ୍ତରୀଣ ଜାମିନ ଦେଇଥିଲେ। ଏବେ ସେ ୯ ବର୍ଷ ଯାଏ ନିର୍ବାଚନ ଲଢ଼ି ପାରିବେ ନାହିଁ।