ବମ୍ବେ: ‘ବାହୁବଲୀ’ ସିରିଜର ଫିଲ୍ମ ପରେ ଦର୍ଶକଙ୍କ ହୃଦୟରେ ରାଜ୍ କରିଥିଲେ ଦକ୍ଷିଣ ଭାରତୀୟ ଅଭିନେତା ପ୍ରଭାସ। ମହାରାଜାଙ୍କ ଭଳି ଠାଣି ସାଙ୍ଗକୁ ତାଙ୍କର ନିଖୁଣ ଅଭିନୟ ସମସ୍ତଙ୍କ ମନ ଜିଣିିଥିଲା। ଲୋକପ୍ରିୟତା ବୃଦ୍ଧି ପାଇଥିବା ଦୃଷ୍ଟିରୁ ଏବେ ଅଭିନେତା ଭାବେ ସବୁଠାରୁ ଅଧିକ ପାଉଣା ନେଉଛନ୍ତି ସେ। ତେବେ ଖାଲି ଯେ ପରଦା ଉପରେ ତାହା ନୁହେଁ ବ୍ୟକ୍ତିଗତ ଜୀବନରେ ମଧ୍ୟ ପ୍ରଭାସଙ୍କ ଜୀବନଶୈଳୀ କୌଣସି ମହାରାଜାଙ୍କଠାରୁ କମ୍ ନୁହେଁ।
ବିରାଟକାୟ ବଙ୍ଗଳାରେ ରୁହନ୍ତି ପ୍ରଭାସ। ହାଇଦ୍ରାବାଦର ପୋଶ ଅଞ୍ଚଳରେ ଅଭିନେତାଙ୍କ ଏହି ଘର ରହିଛି। ୨୦୧୪ରେ ସେ ଏହାକୁ କିଣିଥିଲେ। ଏହି ବଙ୍ଗଳାର ଦାମ ୬୦ କୋଟି। ଘରେ ସୁଇମିଂପୁଲ୍ଠାରୁ ଆରମ୍ଭ କରି ଭଲ ଜିମ୍ ପର୍ଯ୍ୟନ୍ତ ସବୁକିଛି ରହିଛି। ଜିମ୍ରେ ୧.୫ କୋଟି ଟଙ୍କାର ବିଭିନ୍ନ ସାମଗ୍ରୀ ରହିଛି। ଘର ବାହାରେ ସୁନ୍ଦର ବଗିଚା ରହିଛି। ସେଠାରେ ସମୟ ବିତାଇବାକୁ ପ୍ରଭାସ ପସନ୍ଦ କରିଥାନ୍ତି।
ମୋଟ ସମ୍ପତ୍ତି ବିଷୟରେ କଥା ହେଲେ ପ୍ରଭାସ ୧୬୦ କୋଟି ଟଙ୍କା ସମ୍ପତ୍ତିର ମାଲିକ। ଅନେକ କମ୍ପାନୀର ବ୍ରାଣ୍ଡ ଆମ୍ବାସଡର ସେ ଅଛନ୍ତି। ଏଥିପାଇଁ ମୋଟା ଅଙ୍କର ପାଉଣା ସେ ପାଉଛନ୍ତି। ୨୦୧୭ରେ ଅଭିନେତାଙ୍କୁ ଫୋବ୍ସର ଶୀର୍ଷ ୧୦୦ ସେଲିବ୍ରିଟି ତାଲିକାରେ ସ୍ଥାନ ମିଳିଥିଲା। ସେ ୨୨ତମ ସ୍ଥାନରେ ଥିଲେ। ଏକମାତ୍ର ତେଲୁଗୁ ସୁପରଷ୍ଟାର ଭାବେ ସେ ଏହି ସୂଚୀରେ ସ୍ଥାନ ପାଇଥିଲେ।
କହିରଖୁଛୁ, ପ୍ରଭାସ ୨୦୦୨ରେ ଫିଲ୍ମ ‘ଈଶ୍ୱର’ରେ ନିଜର ଡେବ୍ୟୁ କରିଥିଲେ। ୨୦୦୩ରେ ଫିଲ୍ମ ରାଘବେନ୍ଦ୍ର, ୨୦୦୪ରେ ଫିଲ୍ମ ‘ବର୍ଦ୍ଧନ’ରେ ସେ ନଜର ଆସିଥିଲେ। ହେଲେ ୨୦୦୫ରେ ବାହୁବଲୀ ନିର୍ଦ୍ଦେଶକ ଏସ୍ଏସ୍ ରାଜାମୌଲୀଙ୍କ ଫିଲ୍ମ ‘ଛତ୍ରପତି’ରେ ତାଙ୍କ ଅଭିନୟ ଚହଳ ପକାଇଥିଲା। ଫିଲ୍ମଟି ୫୦ରୁ ଅଧିକ ସିନେମାହଲ୍ରେ ୧୦୦ ଦିନ ପର୍ଯ୍ୟନ୍ତ ଚାଲିଥିଲା।