କଟକ ଅଫିସ,୧୦ା୪: ପୋଲିସ ଆଖିରେ ଧୂଳି ଦେଇ ଖସି ବୁଲୁଥିଲେ ହତ୍ୟା ଅଭିଯୁକ୍ତ। ଗିରଫଦାରିରୁ ବର୍ତ୍ତିବା ପାଇଁ ବାବା ବେଶରେ ରହୁଥିଲେ। ଦାଢ଼ି ରଖୁଥିଲେ ଆଉ ଗେରୁଆ ବସ୍ତ୍ର ପିନ୍ଧୁଥିଲେ। ନିଜକୁ ମହିମା ଅଲେଖ ଧାର୍ମିକ ଅନୁଷ୍ଠାନର ଜଣେ ସନ୍ଥ ଭାବେ ଲୋକଙ୍କୁ ପରିଚୟ ଦେଉଥିଲେ। ଏଭଳି ଜଣେ ବାବା ବେଶଧାରୀ ହତ୍ୟା ଅଭିଯୁକ୍ତଙ୍କୁ ବିଡ଼ାନାସୀ ପୋଲିସ ଢେଙ୍କାନାଳ ହିନ୍ଦୋଳ ଥାନା ଅଞ୍ଚଳରୁ ଗିରଫ କରି ରବିବାର କୋର୍ଟ ଚାଲାଣ କରିଛି। ସେ ହେଲେ ବିଡ଼ାନାସୀ ଥାନା ଅନ୍ତର୍ଗତ ଶିବାଜୀ ନଗରର ଦୀପକ ମଲ୍ଲିକ (୪୦)।
ପୋଲିସ ସୂଚନା ଅନୁଯାୟୀ, ଲାଲବାଗ ଥାନା ଅନ୍ତର୍ଗତ ଅଲିଶାବଜାର ଭୂତିଆସାହିର ହାଡ଼ିଆ ଓରଫ ପ୍ରକାଶ ବେହେରାଙ୍କୁ ୨୦୨୦ ସେପ୍ଟେମ୍ବର ୨ ତାରିଖରେ ହତ୍ୟା କରାଯାଇଥିବା ନେଇ ତାଙ୍କ ସ୍ତ୍ରୀ ପୁଷ୍ପଲତା ବିଡ଼ାନାସୀ ଥାନାରେ ଅଭିଯୋଗ କରିଥିଲେ। ସେ ଏତଲାରେ ଦର୍ଶାଇଥିଲେ, ତାଙ୍କର ଜଣେ କର୍ମଚାରୀ ମୁକେଶ ଆହତ ହୋଇ ସେହି ରାତିରେ ତାଙ୍କ ଘରେ ପହଞ୍ଚତ୍ଥିଲେ। ପୁଷ୍ପଲତାଙ୍କ ସ୍ବାମୀଙ୍କୁ ତାଙ୍କ ସାହିର ଦୀପକ ଓ ଶାନ୍ତନୁ ଅନ୍ୟ ୧୦ ଜଣ ସହଯୋଗୀଙ୍କ ଦ୍ୱାରା ଧାରୁଆ ଅସ୍ତ୍ରରେ ଆକ୍ରମଣ କରିଥିଲେ। ମୁକେଶ ସେମାନଙ୍କୁ ବାଧା ଦେବାରୁ ସେମାନେ ତାଙ୍କୁ ବି ଆକ୍ରମଣ କରିଥିଲେ। ଏଭଳି କଥା ଶୁଣିବା ପରେ ପୁଷ୍ପଲତା ନିଜ ସମ୍ପର୍କୀୟଙ୍କୁ ସାଙ୍ଗରେ ନେଇ ସ୍ବାମୀଙ୍କୁ ଖୋଜିବାକୁ ଯାଇଥିଲେ। ତାଙ୍କ ସ୍ବାମୀ ଇପ୍ସାର କଲେଜ ଗଡ଼ା ନିକଟରେ ରକ୍ତ ଜୁଡୁବୁଡୁ ଅବସ୍ଥାରେ ପଡ଼ିଥିବା ଦେଖିଥିଲେ। ତାଙ୍କୁ ତୁରନ୍ତ ନିକଟସ୍ଥ ଏକ ଘରୋଇ ମେଡିକାଲରେ ଭର୍ତ୍ତି କରିଥିଲେ। ଅବସ୍ଥା ସଙ୍କଟାପନ୍ନ ହେବାରୁ ଏସ୍ସିବି ମେଡିକାଲକୁ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏନେଇ ପୁଷ୍ପଲତା ବିଡ଼ାନାସୀ ଥାନାରେ ଅଭିଯୋଗ କରିବା ପରେ ପୋଲିସ ଏକ ମାମଲା (ନଂ.୧୮୯/୨୦) ରୁଜୁ କରିଥିଲା। ଏହି ଘଟଣାରେ ଶିବାଜୀ ନଗରର ଶାନ୍ତନୁ ଓରଫ କୃଷ୍ଣଚନ୍ଦ୍ର ମଲ୍ଲିକଙ୍କୁ ୨୦୨୧ ଫେବୃୟାରୀ ୨୪ରେ ଗିରଫ କରାଯାଇଥିଲା। ମାମଲାର ଚାର୍ଜଶିଟ୍ ୨୦୨୧ ଜୁନ୍ ୨୨ରେ କୋର୍ଟରେ ଦାଖଲ ହୋଇଥିବାବେଳେ ଅଭିଯୁକ୍ତ ଦୀପକ ଫେରାର ଥିଲେ। ପରେ ପୋଲିସ ବୈଷୟିକ ଜ୍ଞାନକୌଶଳ ଉପଯୋଗ କରି ଦୀପକଙ୍କୁ ଶନିବାର ଗିରଫ କରିଥିଲା। ପୂର୍ବରୁ ତାଙ୍କ ନଁାରେ ବିଡ଼ାନାସୀ ଓ ମର୍କତନଗର ଥାନାରେ ୫ଟି ମାମଲା ରହିଥିବା ତଦନ୍ତବେଳେ ପୋଲିସ ଜାଣିବାକୁ ପାଇଛି।
