ଦୁବାଇ,୧୦।୯: ବର୍ତ୍ତମାନ ଭଲ ଫର୍ମରେ ଅଛି ପାକିସ୍ତାନ କ୍ରିକେଟ ଟିମ୍। ଦମ୍ଦାର ପ୍ରଦର୍ଶନ ଯୋଗୁ ଏସିଆ କପ୍ ୨୦୨୨ ସିଜନ ଫାଇନାଲରେ ଦଳ ସ୍ଥାନ ପକ୍କା କରିଛି। ଏଥିରେ ଶ୍ରୀଲଙ୍କା ସହ ଦଳର ମୁକାବିଲା ହେବ। ତେବେ ଏହା ପୂର୍ବରୁ ପାକିସ୍ତାନର ସୁପର-୪ ପର୍ଯ୍ୟାୟର ଶେଷ ମୁକାବିଲା ଶ୍ରୀଲଙ୍କା ବିପକ୍ଷରେ ଦଳ ଖେଳିଥିଲା। ଏହି ମ୍ୟାଚ୍ରେ ଏକ ଅଜବ ଦୃଶ୍ୟ ଦେଖିବାକୁ ମିଳିଥିଲା, ଯାହାକି ଏବେ ଚର୍ଚ୍ଚାର ବିଷୟ ପାଲଟିଛି।
ଶ୍ରୀଲଙ୍କା ବ୍ୟାଟିଂ ସମୟରେ ପାକିସ୍ତାନୀ ଉଇକେଟକିପର ମହମ୍ମଦ ରିଜଓ୍ବାନ ଏବଂ ମଇଦାନରେ ଥିବା ଅମ୍ପାୟାର ଏଭଳି କାମ କରିଥିଲେ, ଯାହା ପରେ ଅଧିନାୟକ ବାବର ଆଜମ ‘ମୁଁ ଦଳର ଅଧିନାୟକ’ ବୋଲି କହିବାକୁ ବାଧ୍ୟ ହୋଇଥିଲେ। ଏହି ଘଟଣା କ୍ୟାମେରାରେ କଏଦ ହୋଇଥିବା ବେଳେ ଭିଡିଓ ବେଶ ଭାଇରାଲ ହେଉଛି।
ଶ୍ରୀଲଙ୍କା ଇନିଂସର ୧୬ତମ ଓଭରରେ ଏହି ଘଟଣା ଘଟିଛି। ଦ୍ରୁତ ବୋଲର ଅସନ ଅଲିଙ୍କ ଦ୍ୱିତୀୟ ବଲ୍ରେ ଦାସୁନ ସନାକା ଏକ ଶର୍ଟ ମାରିବାକୁ ଚେଷ୍ଟା କରିଥିଲେ, ହେଲେ ବଲ୍ ରିଜଓ୍ବାନଙ୍କ ହାତକୁ ଯାଇଥିଲା। ରିଜଓ୍ବାନ ଭାବିଥିଲେ ବ୍ୟାଟ୍ରେ ବଲ୍ ବାଜିଛି। ଏଣୁ ସେ ଅପିଲ କରିଥିଲେ। ମାତ୍ର ଫିଲ୍ଡ ଅମ୍ପାୟାର ଅନିଲ ଚୌଧୁରୀ ନଟ୍ଆଉଟ୍ ବୋଲି କହିଥିଲେ। ଏହାପରେ ରିଜଓ୍ବାନ ଡିଆର୍ଏସ୍ ନେବାକୁ କହିଥିଲେ। ଅମ୍ପାୟାର ତାକୁ ମାନି ଡିଆର୍ଏସ୍ ଦେଇଦେଇଥିଲେ। ଏହା ଦେଖି ଅଧିନାୟକ ବାବର ରାଗି ଯାଇଥିଲେ। କାରଣ ଅମ୍ପାୟାର ତାଙ୍କୁ ପଚାରି ନ ଥିଲେ। ନିୟମ ଅନୁସାରେ ଅଧିନାୟକ କହିବା ପରେ ଅମ୍ପାୟାର ଡିଆର୍ଏସ୍ ମଞ୍ଜୁର କରେ। ହେଲେ ଏଠାରେ ଓଲଟା ହୋଇଥିଲା। ଏମିତିରେ ବାବର ସମସ୍ତଙ୍କୁ ମନେ ପକାଇ କହିଥିଲେ ‘ଅଧିନାୟକ ମୁଁ’। ଏହାର ଭିଡିଓ ଏବେ ବେଶ ଭାଇରାଲ ହେଉଛି।