କରାଚୀ,୧।୪: ଅଷ୍ଟ୍ରେଲିଆ ବିପକ୍ଷ ସିରିଜ୍ ପାକିସ୍ତାନ ଅଧିନାୟକ ବାବର ଆଜାମଙ୍କ ପାଇଁ ରେକର୍ଡ ବ୍ରେକିଂ ସାବ୍ୟସ୍ତ ହୋଇଛି। ପ୍ରଥମ ଦିନିକିଆରେ ଦ୍ରୁତତମ ବ୍ୟାଟର ଭାବେ ୪ ହଜାର ରନ୍ ପୂରଣ କରିଥିବା ବାବର ଦ୍ୱିତୀୟ ମ୍ୟାଚ୍ରେ ମଧ୍ୟ ଖେଳିଛନ୍ତି ଶତକୀୟ ଇନିଂସ। ଏଥିସହିତ ସେ ଆଧୁନିକ କ୍ରିକେଟ କିମ୍ବଦନ୍ତୀ ହାଶିମ ଆମଲା ଏବଂ ବିରାଟ କୋହଲିଙ୍କୁ ଅତିକ୍ରମ କରିଛନ୍ତି। ଦ୍ୱିତୀୟ ମ୍ୟାଚ୍ରେ ବାବର ୮୩ ବଲରେ ୧୧୪ ରନ୍ର ଇନିଂସ ଯୋଗୁ ପାକିସ୍ତାନ ୩୪୯ ରନ୍ର ଟାର୍ଗେଟକୁ ସଫଳତାର ସହ ପିଛା କରି ବିଜୟ ହାସଲ କରିଛି। ତାଙ୍କ ପାଳିରେ ୧୧ ଚୌକା ଏବଂ ୧ ଛକା ସାମିଲ ଥିଲା।
ଏହି ଶତକ ସେ ବିଶ୍ୱର ଦ୍ରୁତତମ କ୍ରିକେଟର ଭାବେ ୧୫ତମ ଦିନିକିଆ ଶତକ ହାସଲ କରିଛନ୍ତି। କ୍ୟାରିୟରର ୮୩ ତମ ଇନିଂସରେ ଏହି ମାଇଲଷ୍ଟୋନକୁ ସ୍ପର୍ଶ କରିଛନ୍ତି ୨୭ ବର୍ଷୀୟ ବ୍ୟାଟର। ତେବେ କୋହଲିଙ୍କୁ ୧୫ ଶତକ କରିବା ପାଇଁ ୧୦୬ ଇନିଂସ ଲାଗିଥିଲା। ବାବରଙ୍କ ପୂର୍ବରୁ ଏହି ରେକର୍ଡ ଥିଲା ପୂର୍ବତନ ଦକ୍ଷିଣ ଆଫ୍ରିକୀୟ ବ୍ୟାଟର ହାଶିମ ଆମଲାଙ୍କ ନାମରେ। ସେ ୮୬ତମ ଇନିଂସରେ ଏହି ସଫଳତା ପାଇଥିଲେ। ଡେଭିଡ୍ ଓ୍ବାର୍ନର ଏବଂ ଶିଖର ଧାଓ୍ବନ ୧୦୮ତମ ଇନିଂସରେ ୧୫ତମ ଶତକ ହାସଲ କରିଥିଲେ।
