କରାଚୀ,୩।୭(ପି.ଟି.): ଭାରତୀୟ ଅଧିନାୟକ ବିରାଟ କୋହଳିଙ୍କ ସହ ତାଙ୍କୁ ତୁଳନା କରାଯାଉଥିବାରୁ ପାକିସ୍ତାନ ସୀମିତ ଓଭର ଅଧିନାୟକ ବାବର ଆଜମ ନାପସନ୍ଦ କରିଛନ୍ତି। କୋହଲିଙ୍କ ସହ ମୋତେ ବାରମ୍ବାର ତୁଳନା କରାଯାଉଛି। ଏ ନେଇ ବାବର ଆପତ୍ତି ଉଠାଇଛନ୍ତି। ବରଂ ନିଜ ଦେଶର ପୂର୍ବତନ ବ୍ୟାଟ୍ସମ୍ୟାନଙ୍କ ସହ ତୁଳନା କଲେ ଭଲ ହୁଅନ୍ତା ବୋଲି ସେ କହିଛନ୍ତି।
କୋହଲିଙ୍କଠାରୁ ବାବର ୬ ବର୍ଷ ଛୋଟ। ୩ଟି ଯାକ ଫର୍ମାଟ୍ରେ କୋହଲିଙ୍କ ସହ ସମକକ୍ଷ ହେବାକୁ ତାଙ୍କୁ ଆହୁରି ବହୁତ ବାଟ ଯିବାକୁ ଅଛି। କୋହଲି ଏପର୍ଯ୍ୟନ୍ତ ୩ଟି ଫର୍ମାଟରେ ୭୦ଟି ଅନ୍ତର୍ଜାତୀୟ ଶତକ ହାସଲ କରିଛନ୍ତି ୫୦ରୁ ଊର୍ଦ୍ଧ୍ୱ ରନ୍ ହାରରେ। କୋହଲିଙ୍କ ବଦଳରେ ଯଦି ମୋତେ ଜାଭେଦ୍ ମିଆଁଦାଦ, ମହମ୍ମଦ ୟୁସୁଫ କିମ୍ବା ୟୁନିସ୍ ଖାନଙ୍କ ସହ ତୁଳନା କରାଯାଆନ୍ତା ତା’ହେଲେ ଅଧିକ ଖୁସୀ ହୁଅନ୍ତି ବୋଲି ୨୫ ବର୍ଷୀୟ ବାବର କହିଛନ୍ତି। ମୋତେ କୋହଲି କିମ୍ବା ଭାରତୀୟ ଖେଳାଳିଙ୍କ ସହ କାହିଁକି ତୁଳନା କରାଯାଉଛି ବୋଲି ସେ ପ୍ରଶ୍ନ କରିଛନ୍ତି। ବାବର ଏବେ ପାକିସ୍ତାନ ଦଳ ସହ ଇଂଲଣ୍ଡରେ ଅଛନ୍ତି। ବାବର ଏବେ ୧୬ଟି ଅନ୍ତର୍ଜାତୀୟ ଶତକ ଅର୍ଜନ କରିଛନ୍ତି। ସେ ଦିନିକିଆ ଓ ଟି୨୦ରେ ୫୦ରୁ ଊର୍ଦ୍ଧରନ ହାରରେ ରନ ସଂଗଅହ କରିଛନ୍ତି। ତେବେ ଟେଷ୍ଟ ଫର୍ମାଟ୍ରେ ସେ ୪୫.୧୨ ରନ ହାରରେ ୧୮୫୦ ରନ ସଂଗ୍ରହ କରିଛନ୍ତି। ଆଗାମୀ ସିରିଜରେ ସେ କୌଣସି ଇଂଲଣ୍ଡ ବୋଲରଙ୍କୁ ଟାର୍ଗେଟ କରିନାହାନ୍ତି ବୋଲି ସେ ସ୍ପଷ୍ଟ କରିଛନ୍ତି। ଇଂଲଣ୍ଡର ବୋଲିଂ ଉଚ୍ଚକୋଟୀର। ଘରୋଇ ପରିବେଶ ଇଂଲଣ୍ଡ ପାଇଁ ଅନୁକୂଳ ପରିବେଶ ସୃଷ୍ଟି କରିଛି। ଏହି ସିରିଜରେ ଆମ ପାଇଁ ଏକାଧିକ ଚ୍ୟାଲେଞ୍ଜ ରହିଛି ଓ ରନ୍ ସଂଗ୍ରହ କରିବାକୁ ଚାହୁଛି। ସ୍ବାଭାବିକ୍ ଭାବେ ଖେଳିବା ଉପରେ ଧ୍ୟାନ ଦେବି ବୋଲି ସେ କହିଛନ୍ତି।
