ଦୁବାଇ, ୧୧।୫(ପି.ଟି.):ପାକିସ୍ତାନ ଅଧିନାୟକ ବାବର ଆଜମ ଏବଂ ଅଷ୍ଟ୍ରେଲିଆ ମହିଳା କ୍ରିକେଟ ଦଳର ଉଇକେଟ କିପର ଆଲିସା ହିଲି ଆଇସିସି ପ୍ଲେୟର ଅଫ୍ ଦି ମନ୍ଥ ବିବେଚିତ ହୋଇଛନ୍ତି। ଏପ୍ରିଲରେ ଚମତ୍କାର ପ୍ରଦର୍ଶନ ପାଇଁ ସେ ଏହି ସୌଭାଗ୍ୟ ପାଇଛନ୍ତି। ନିକଟରେ ଅନୁଷ୍ଠିତ ଦକ୍ଷିଣ ଆଫ୍ରିକା ବିପକ୍ଷ ସିରିଜର ସମସ୍ତ ଫର୍ମାଟରେ ସ୍ଥିର ଏବଂ ଆକର୍ଷଣୀୟ ପ୍ରଦର୍ଶନ ପାଇଁ ବାବର ପ୍ରଶଂସକ ଏବଂ ଆଇସିସି ଭୋଟିଂ ଏକାଡେମୀର ପ୍ରଥମ ପସନ୍ଦ ହୋଇଛନ୍ତି। ଦକ୍ଷିଣ ଆଫ୍ରିକା ବିପକ୍ଷ ତୃତୀୟ ଦିନିକିଆରେ ମ୍ୟାଚ ବିଜୟୀ ୯୪(୮୨ ବଲ) ଇନିଂସ ଯୋଗୁ ସେ ୧୩ ରେଟିଂ ପଏଣ୍ଟ ଲାଭ କରିଥିଲେ। ଫଳରେ ତାଙ୍କ ପଏଣ୍ଟ କ୍ୟାରିୟର ଶ୍ରେଷ୍ଠ ୮୬୫ରେ ପହଞ୍ଚତ୍ ଯାଇଥିଲା। ଏହା ବ୍ୟତୀତ ସମାନ ପ୍ରତିଦ୍ୱନ୍ଦ୍ୱୀ ଦଳ ବିପକ୍ଷରେ ଟି୨୦ ସିରିଜର ତୃତୀୟ ମ୍ୟାଚରେ ପାକିସ୍ତାନର ରନ୍ ଚେଜ୍ ସମୟରେ ସେ ୫୯ ବଲ୍ରୁ ୧୨୨ ରନ ସଂଗ୍ରହ କରିଥିଲେ। ”ସୀମିତ ଓଭର କ୍ରିକେଟରେ ଏବେ ଦୁଇ ଉପାୟରେ ବ୍ୟାଟ୍ସମ୍ୟାନ ପ୍ରସିଦ୍ଧି ଅର୍ଜନ କରୁଛନ୍ତି। ଗୋଟିଏ ହେଲା ବିସ୍ଫୋରକ, ଆକ୍ରମଣାତ୍ମକ ଏବଂ ଶକ୍ତିଶାଳୀ ପ୍ରହାର ମାଧ୍ୟମରେ। ଅନ୍ୟଟି ହେଲା ବାବର ଆଜମଙ୍କ ପଥ। ଏହା ହେଲା ତାଳମେଳ ରକ୍ଷା କରି ପଞ୍ଚ୍, କୌଶଳ ଏବଂ ସାହସିକ ବ୍ୟାଟିଂ। ପ୍ରଦର୍ଶନ ମାଧ୍ୟମରେ ସେ ଏହି ପୁରସ୍କାର ପାଇବାର ହକ୍ଦାର ହୋଇ ଯାଇଥିଲେ ବୋଲି ଆଇସିସି ଭୋଟିଂ ଏକାଡେମୀ ପକ୍ଷରୁ ପ୍ରତିନିଧିତ୍ୱ କରୁଥିବା ରମିଜ ରାଜା ପ୍ରକାଶ କରିଛନ୍ତି।
ନିକଟରେ ଅନୁଷ୍ଠିତ ନ୍ୟୁଜିଲାଣ୍ଡ ବିପକ୍ଷ ସିରିଜରେ ସମସ୍ତ ପ୍ରକାର ବୋଲିଂ ବିପକ୍ଷରେ ପ୍ରଭାବୀ ପ୍ରଦର୍ଶନ କରି ସଦର୍ନ ଷ୍ଟାର ହିଲି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ। ସେ ନ୍ୟୁଜିଲାଣ୍ଡ ବିପକ୍ଷରେ ୩ଟି ଦିନିକିଆ ଖେଳି ୫୧.୬୬ ଆଭରେଜ ଏବଂ ୯୮.୭୨ ଆଭରେଜରେ ୧୫୫ ରନ କରିଥିଲେ। ନ୍ୟୁଜିଲାଣ୍ଡ ବିପକ୍ଷରେ ଅଷ୍ଟ୍ରେଲିଆର ସିରିଜ ବିଜୟରେ ସେ ଅଗ୍ରଣୀ ସ୍କୋରର ଥିଲେ। ତାଙ୍କ ପ୍ରଦର୍ଶନ ମାଧ୍ୟମରେ ନ୍ୟୁଜିଲାଣ୍ଡ ବିପକ୍ଷରେ ଅଷ୍ଟ୍ରେଲିଆ ରେକର୍ଡ ୨୪ତମ ବିଜୟ ହାସଲ କରିଥିଲା।
