ଜମ୍ମୁ,୪।୫ : କୋଭିଡ୍-୧୯ ଯୋଗୁ ଦେଶରେ ସୃଷ୍ଟି ହୋଇଛି ସାଙ୍ଘାତିକ ପରିସ୍ଥିତି। ମହାମାରୀ ଭୟରେ ଲୋକେ ଭୁଲିଗଲେଣି ମାନବିକତା। ଏହାର ଉଦାହରଣ ଦେଖିବାକୁ ମିଳିଛି ଜମ୍ମୁ-କଶ୍ମୀରର ଏକ ହସ୍ପିଟାଲରେ। ଦୁଇ ମାସର ଏକ ଶିଶୁପୁତ୍ରକୁ ସ୍ବାସ୍ଥ୍ୟଜନିତ ସମସ୍ୟା କାରଣରୁ ହସ୍ପିଟାଲରେ ଭର୍ତ୍ତି କରିଥିଲେ ବାପା ଓ ମା’। କିନ୍ତୁ କୋଭିଡ୍-୧୯ରେ ଆକ୍ରାନ୍ତ ଜଣାପଡ଼ିବା ପରେ ସେମାନେ କେଉଁ ଆଡ଼େ ଚାଲିଯାଇଥିଲେ। ଉକ୍ତ ଶିଶୁପୁତ୍ରର ମୃତ୍ୟୁ ପରେ ବାପା ଓ ମା’ଙ୍କୁ ଯୋଗାଯୋଗ କରିବାରେ ବିଫଳ ହୋଇଥିଲେ ହସ୍ପିଟାଲ କତ୍ତୃପକ୍ଷ। ଏହା ପରେ ସ୍ବାସ୍ଥ୍ୟ ଅଧିକାରୀ ଏହି ଦମ୍ପତିଙ୍କୁ ଟ୍ରାକ ଡାଉନ କରିିବାକୁ ଉଦ୍ୟମ ଚଳାଇଛନ୍ତି।
ହୃଦୟ ସମତେ ବିଭିନ୍ନ ସ୍ବାସ୍ଥ୍ୟଜନିତ ସମସ୍ୟା ସମ୍ମୁଖୀନ ହେଉଥିବା ଏକ ଦୁଇ ମାସର ଶିଶୁକୁ ସୋମବାର ସକାଳେ ହସ୍ପିଟାଲରେ ଭର୍ତ୍ତି କରାଯାଇଥିଲା। ରାତି ୮ଟା.୧୨ରେ ଉକ୍ତ ଶିଶୁପୁତ୍ରର ମୃତ୍ୟୁ ଘଟିଥିଲା। ଆମେ ତା’ର କୋଭିଡ୍ ଟେଷ୍ଟ କରାଇଥିଲୁ, ଯାହା ପଜିଟିଭ ଆସିଥିଲା ବୋଲି ଜମ୍ମୁର ଶ୍ରୀ ମହାରାଜ ଗୁଲାବ ସିଂ ହସ୍ପିଟାଲର ମେଡିକାଲ ସୁପ୍ରିଟେଣ୍ଡେଣ୍ଟ ଡ. ଦାରା ସିଂ କହିଛନ୍ତି। ଆମେ ଉକ୍ତ ଶିଶୁର ବାପା ଓ ମା’ଙ୍କୁ କୋଭିଡ୍ ଟେଷ୍ଟ କରିବାକୁ ଅନୁରୋଧ କରିଥିଲୁ। ସେମାନେ ରାଜି ମଧ୍ୟ ହୋଇଥିଲେ। କିନ୍ତୁ ପରେ କେଉଁ ଆଡ଼େ ଚାଲି ଯାଇଥିଲେ।
ଉକ୍ତ ଶିଶୁପୁତ୍ରର ମୃତୁଦେହ ହସ୍ପିଟାଲର ମର୍ଚରିରେ ଅଛି। ଜିଲା ପ୍ରଶାସନଠାରୁ ଅନୁମତି ମିଳିବା ପରେ ତା’ର ଶବ ସତ୍କାର କରାଯିବ ବୋଲି ସିଂ କହିଛନ୍ତି।