ବଲାଙ୍ଗୀର ଅଫିସ, ୧୪ା୧୦: ବଲାଙ୍ଗୀର ଜିଲା ପାଟଣାଗଡ଼ ବ୍ଲକ ଅନ୍ତର୍ଗତ ବାଲିପଟା ଓ ସାନକଲଙ୍ଗାପାଲି ଗଁାରେ ଗୁରୁବାର ବୁଲା କୁକୁର ଆତଙ୍କରେ ଅଭାବନୀୟ ପରିସ୍ଥିତି ସୃଷ୍ଟି ହୋଇଥିଲା। ବୁଲା କୁକୁର ଉଭୟ ଗଁାର ୧୩ ଜଣଙ୍କୁ କାମୁଡ଼ି ଗୁରୁତର କରିଦେଇଥିଲା। ସବୁଠୁ ହୃଦୟ ବିଦାରକ ଥିଲା ପରିବାର ସଦସ୍ୟଙ୍କ ସମ୍ମୁଖରେ ଜଣେ ତିନିବର୍ଷର ଶିଶୁକନ୍ୟାକୁ ବୁଲା କୁକୁରଟି ଝୁଣି ଦେବାରୁ ତାର ମୃତ୍ୟୁ ହୋଇଯାଇଥିଲା। ମୃତ ଶିଶୁକନ୍ୟା ଗୁଦା ମୁଣ୍ଡାଙ୍କ ଝିଅ ଦୀପା। ଏହି ଘଟଣା ପରେ ଉଭୟ ଗଁାରେ ଆତଙ୍କ ଖେଳିଯାଇଥିଲା। ଏହାପରେ ଉତ୍ତ୍ୟକ୍ତ ଲୋକେ ଉକ୍ତ କୁକୁରକୁ ମାରି ଦେଇଛନ୍ତି। ମିଳିଥିବା ସୂଚନା ମୁତାବକ, ସକାଳେ ସାନକଲଙ୍ଗାପାଲି ଗଁାରେ ଚନ୍ଦ୍ରକାନ୍ତି ସାହୁ(୫୦) ନାମ୍ନୀ ମହିଳା ମୁଢ଼ି କିଣିବାକୁ ଯାଉଥିବାବେଳେ ଏକ ବୁଲା କୁକୁର ତାଙ୍କୁ କାମୁଡ଼ି ଦେଇଥିଲା। ଏହାପରେ ଗଁାର ଅନ୍ୟ କେତେକଙ୍କୁ କାମୁଡ଼ି ଦେଇ ସେଠାରୁ ନିକଟସ୍ଥ ବାଲିପଟା ଗଁାକୁ ଚାଲିଯାଇଥିଲା। ଘର ସମ୍ମୁଖରେ ଶିଶୁକନ୍ୟା ଦୀପା ଖେଳୁଥିବାବେଳେ ହଠାତ୍ କୁକୁରଟି ସେଠାକୁ ଆସି ତାଙ୍କ ମୁଣ୍ଡକୁ କାମୁଡ଼ି ଦେଇଥିଲା। ଚିତ୍କାର ଶୁଣି ପରିବାର ଲୋକେ ସେଠାରେ ପହଞ୍ଚି କୁକୁରକୁ ଘଉଡାଇବା ପରେ ସେଠାରୁ ଚାଲିଯାଇଥିଲା। ସଙ୍କଟାପନ୍ନ ଅବସ୍ଥାରେ ପରିବାର ଲୋକେ ଶିଶୁକୁ ପାଟଣାଗଡ଼ ଉପଖଣ୍ଡ ହସ୍ପିଟାଲ ନେଇଥିଲେ। ହେଲେ ସେଠାରେ ଡାକ୍ତର ଶିଶୁକୁ ମୃତ ଘୋଷଣା କରିଥିଲେ। ପାଗଳ ହୋଇଯାଇଥିବା ବୁଲା କୁକୁର ଉଭୟ ଗଁାର ୧୩ଜଣଙ୍କୁ କାମୁଡି ଥିବା ଖବର ପ୍ରଚାରିତ ହେବା ପରେ ଆତଙ୍କ ଖେଳିଯାଇଥିଲା। ଲୋକେ ଭୟରେ ଘରୁ ବାହାରି ନ ଥିଲେ। ତେବେ କେତେକ ଯୁବକ କୁକୁରକୁ ଘେରିଯାଇ ମାରି ଦେଇଥିଲେ। ପାଟଣାଗଡ ହସ୍ପିଟାଲରେ କୁକୁର କାମୁଡାରେ ଗୁରୁତର ୬ଜଣ ଚିକିତ୍ସିତ ହେଉଛନ୍ତି। ଅନ୍ୟମାନେ ଜଡିବୁଟି ଚିକିତ୍ସା କରିଥିବା ଜଣାପଡିଛି। ଏତେବଡ଼ ଘଟଣା ଘଟିଥିଲେ ମଧ୍ୟ ଜିଲା ସ୍ବାସ୍ଥ୍ୟ ବିଭାଗର କୌଣସି ଟିମ୍ ଉକ୍ତ ଗଁାରେ ପହଞ୍ଚତ୍ ନ ଥିବାରୁ ଜନସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ଶିଶୁକନ୍ୟା ମୃତଦେହ ବ୍ୟବଚ୍ଛେଦ ପରେ ପରିବାରବର୍ଗଙ୍କୁ ହସ୍ତାନ୍ତର କରାଯାଇଛି।
