ଧର୍ମଶାଳା,୩୧ା୧(ଡି.ଏନ.ଏ.): ଯାଜପୁର ଜିଲା ଧର୍ମଶାଳା ଥାନା କୋତପୁର ପଞ୍ଚାୟତ ସାନରାଏପଡ଼ା ଗ୍ରାମରେ ଶିଶୁକନ୍ୟା ବିକ୍ରି ଘଟଣାରେ ପୋଲିସ ଜଣେ ଅଙ୍ଗନୱାଡି କର୍ମୀଙ୍କ ସମେତ ମୋଟ୍ ୫ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ହେଲେ ଶିଶୁକନ୍ୟାକୁ କିଣିଥିବା ପାରାଦୀପ ରଙ୍ଗିଆଗଡ଼ା ଅଞ୍ଚଳର ଦମ୍ପତି ସସ୍ମିତା ବାରିକ ଓ କୈଳାସ ବାରିକ, ଶିଶୁ ବିକ୍ରିରେ ମଧ୍ୟସ୍ଥତା କରିଥିବା ବାଲିଚନ୍ଦ୍ରପୁର ଥାନା ଭରତପୁର ଗ୍ରାମର ଅଙ୍ଗନୱାଡି କର୍ମୀ ପ୍ରଭାସିନୀ ଦାସ, ତାଙ୍କ ଭାଇ ସାନରଏପଡ଼ା ଗ୍ରାମର ଦୀପକ ଦାସ ଏବଂ ଶିଶୁକନ୍ୟା ବାପା ନଟବର ବେହେରା।
ସୂଚନା ମୁତାବକ, ସାନରାଏପଡ଼ା ଗ୍ରାମର ନଟବରଙ୍କ ସ୍ତ୍ରୀ କାଞ୍ଚନଙ୍କ ୨୭ ତାରିଖରେ ଧର୍ମଶାଳା ଡାକ୍ତରଖାନାରେ ଏକ ଶିଶୁକନ୍ୟା ଜନ୍ମ ହୋଇଥିଲା। ତେବେ ଦାରିଦ୍ର୍ୟର କଷାଘାତରେ ଚଳୁଥିବା ଏହି ପରିବାର ୨୮ତାରିଖରେ କେନ୍ଦ୍ରାପଡ଼ା ଜିଲା ମହାକାଳପଡ଼ାରେ ଶ୍ୱଶୁରଘରେ ରହୁଥିବା ପାରାଦୀପ ଅଞ୍ଚଳର ଉପରୋକ୍ତ ଦମ୍ପତିଙ୍କୁ ୧୨ ହଜାର ଟଙ୍କାରେ ଶିଶୁକନ୍ୟାକୁ ବିକ୍ରି କରି ଦେଇଥିଲେ। ଶନିବାର ଏହି ଘଟଣା ପ୍ରଘଟ ହେବା ପରେ ଜିଲା ଶିଶୁ ସୁରକ୍ଷା ଅଧିକାରୀ ନିରଞ୍ଜନ କର ସେଠାରେ ପହଞ୍ଚତ୍ ଘଟଣା ସମ୍ପର୍କରେ ଅବଗତ ହେବା ସହ ଧର୍ମଶାଳା ଥାନା ଅଧୀନ କୋତପୁର ଫାଣ୍ଡିରେ ଅଭିଯୋଗ କରିଥିଲେ। ତେବେ ଘଟଣା ପ୍ରଘଟ ପରେ ଦମ୍ପତି ଅତି ଚତୁରତାର ସହ ଶିଶୁକୁ ଆଣି ତାଙ୍କ ମା’କୁ ଦେଇ ଫେରାର ହୋଇ ଯାଇଥିଲେ। ଜିଲା ଶିଶୁ ସୁରକ୍ଷା ଅଧିକାରୀଙ୍କ ଅଭିଯୋଗକ୍ରମେ ପୋଲିସ ନଂ.୫୦/୨୨ରେ ଏକ ମାମଲା ରୁଜୁ କରି ତଦନ୍ତ ଚଳାଇଥିବାବେଳେ ସନ୍ଧ୍ୟାରେ ଶିଶୁକନ୍ୟାକୁ ଉଦ୍ଧାର କରିଥିଲା। ରାତିରେ ମହାକାଳପଡ଼ାରେ ପୋଲିସ ଚଢ଼ାଉ କରି ଶିଶୁକୁ କିଣିଥିବା ଦମ୍ପତିଙ୍କୁ ଗିରଫ କରିଥିଲା। ଏହାପରେ ମଧ୍ୟସ୍ଥତା କରିଥିବା ଅଙ୍ଗନୱାଡି କର୍ମୀ, ତାଙ୍କ ଭାଇ ଓ ଶିଶୁ କନ୍ୟାର ବାପାଙ୍କୁ ଗିରଫ କରିଥିଲା। ଉଦ୍ଧାର ଶିଶୁକନ୍ୟାକୁ ପୋଲିସ ଜିଲା ଶିଶୁ ମଙ୍ଗଳ ଅଧିକାରୀଙ୍କ ନିକଟରେ ହାଜର କରିବା ପରେ ଶିଶୁଟିକୁ ବାଳାଶ୍ରମସ୍ଥିତ ପୋଷ୍ୟ ସନ୍ତାନ ଗୃହରେ ରଖାଯାଇଛି। ତେବେ ରବିବାର ଶିଶୁକନ୍ୟାର ବାପାଙ୍କୁ ବ୍ୟକ୍ତିଗତ ମୁଚାଲିକାରେ ଛଡ଼ା ଯାଇଥିବା ବେଳେ ଅନ୍ୟ ୪ ଅଭିଯୁକ୍ତଙ୍କୁ ଚଣ୍ଡିଖୋଲ କୋର୍ଟଚାଲାଣ କରାଯାଇଥିବା ଫାଣ୍ଡି ଅଧିକାରୀ ନିରଞ୍ଜନ ବେହୁରା ସୂଚନା ଦେଇଛନ୍ତି।
