ଟିକିରି,୨୩ା୧୦(ଡି.ଏନ୍.ଏ.): ଭୁଲ୍ ଔଷଧ ଦେବାରୁ ୧୪ ମାସର ଶିଶୁପୁତ୍ରର ମୃତ୍ୟୁ ଘଟିଥିବା ଅଭିଯୋଗ ହୋଇଛି। ଏଥିପାଇଁ ଏଏନ୍ଏମ୍ କର୍ମୀଙ୍କ ଦାୟିତ୍ୱହୀନତାକୁ ଦାୟୀ କରାଯାଇଛି। ରାୟଗଡ଼ା ଜିଲା କାଶୀପୁର ବ୍ଲକ କୋଡ଼ିପାରି ପଞ୍ଚାୟତ ଅନ୍ତର୍ଗତ ସାନକୁମୁଲି ଧାଙ୍ଗଡ଼ିସିଲ ଗ୍ରାମର ମହାନନ୍ଦ ନାୟକ ଏଭଳି ଅଭିଯୋଗ କରିଛନ୍ତି। ସୂଚନା ଅନୁଯାୟୀ, ପୁଅ ରସିତକୁ ଜ୍ୱର ହେବାରୁ ମହାନନ୍ଦ ଏବଂ ସ୍ତ୍ରୀ ଲଳିତା ତାକୁ ନେଇ ସମ୍ପର୍କୀୟ ଘର ବଦଳିଝରଣ ଗାଁକୁ ଯାଇଥିଲେ। ସେଠାରେ ପଡ଼ୋଶୀ ପାଟିଆସିଲ ଗ୍ରାମରେ ରହୁଥିବା ଏଏନ୍ଏମ୍ ସାରାଣୀ ପଣ୍ଡାଙ୍କ ପାଖକୁ ଚିକିତ୍ସା ପାଇଁ ନେଇଥିଲେ। ଏଏନ୍ଏମ୍ କର୍ମୀ ମ୍ୟାଲେରିଆ କିଟ୍ ଦ୍ୱାରା ଶିଶୁଟିର ରକ୍ତ ପରୀକ୍ଷା କରାଇଥିଲେ। ମ୍ୟାଲେରିଆ ନେଗେଟିଭ ଥିବା କହି ସେ ଶିଶୁଟିକୁ ବିନା ପାଣିରେ ୨ଟି ବଟିକା ଏକାଥରକେ ଖୁଆଇଥିଲେ। ଏହାପରେ ହଠାତ୍ ଶିଶୁଟି ପାଟି କରିବା ସହ ନିଃଶ୍ୱାସ ବନ୍ଦ ହୋଇଯାଇଥିଲା। କ’ଣ ହେଲା ବୋଲି ଏଏନ୍ଏମ୍ଙ୍କୁ ପଚାରିବାରୁ ଅଳ୍ପ ସମୟ ପରେ ଠିକ୍ ହୋଇଯିବ ବୋଲି କହିଥିଲେ। ହେଲେ ସ୍ବାସ୍ଥ୍ୟରେ ପରିବର୍ତ୍ତନ ନ ଆସିବାରୁ ପୁଅକୁ ଅଟୋ ଯୋଗେ ଡଙ୍ଗାସିଲ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ସେଠାରେ ଡାକ୍ତର ନିରଞ୍ଜନ ରଇତ ଶିଶୁଟିକୁ ମୃତ ଘୋଷଣା କରିବା ସହ ଡଙ୍ଗାସିଲ ଫାଣ୍ଡିକୁ ସୂଚନା ଦେଇଥିଲେ। କିନ୍ତୁ ମୃତ୍ୟୁର କାରଣ ସେ କହିପାରିନାହାନ୍ତି। ତେବେ ପୁଅର ମୃତ୍ୟୁ ପାଇଁ ଏଏନ୍ଏମ୍ କର୍ମୀ ସନ୍ଧ୍ୟାରାଣୀ ହିଁ ଦାୟୀ ବୋଲି ମହାନନ୍ଦ କହିଛନ୍ତି। ଘଟଣାର ତଦନ୍ତକରି ଏଏନ୍ଏମ୍ଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ସହ କ୍ଷତିପୂରଣ ନିମନ୍ତେ ସେ ଦାବି କରିଛନ୍ତି। ଅନ୍ୟପକ୍ଷରେ ଘଟଣାକୁ ନେଇ ସନ୍ଧ୍ୟାରାଣୀଙ୍କ ପ୍ରତିକ୍ରିୟା ନେବାରୁ, ରକ୍ତ ପରୀକ୍ଷା କରି ଦୁଇଟି ବଟିକା ଦେଇଥିବା ଗଣମାଧ୍ୟମ ନିକଟରେ ସ୍ବୀକାର କରିଛନ୍ତି। କିନ୍ତୁ ଉକ୍ତ ବଟିକା କ୍ଷତିକାରକ ନୁହେଁ ବୋଲି ସେ କହିଛନ୍ତି। ତେବେ ସେ କେଉଁ ବଟିକା ଦେଇଥିଲେ ଏବଂ ଶିଶୁଟିର ମୃତ୍ୟୁର କାରଣ କ’ଣ ତାହାର ତଦନ୍ତ ନିମନ୍ତେ ଦାବି ହୋଇଛି। ଡଙ୍ଗାସିଲ ଫାଣ୍ଡି ପୋଲିସ ଶିଶୁଟିର ମୃତଦେହ ଜବତକରି ବ୍ୟବଚ୍ଛେଦ ପାଇଁ ପଠାଇଛି।