ବିଷମକଟକ,୨୮।୧୨(ଡି.ଏନ୍.ଏ.): ବିଷମକଟକରେ ଓପନ ଜିମ୍ ପାଇଁ ଆସିଥିବା ବିଭିନ୍ନ ସାମଗ୍ରୀ ମଙ୍ଗଳବାର ଫେରିଯାଇଛି। ବିନା ଟେଣ୍ଡରରେ ଜଣେ ଠିକାଦାରଙ୍କୁ କ୍ରୀଡ଼ା ବିଭାଗ କାର୍ଯ୍ୟାଦେଶ ଦେଇଥିବା ନେଇ ଅଭିଯୋଗ ହୋଇଥିଲା। ଏହାପରେ ଯୁବଗୋଷ୍ଠୀ ଜିଲାପାଳଙ୍କୁ ଭେଟି ଜିମ୍ ପାଇଁ ଆସିଥିବା ସାମଗ୍ରୀ ନିମ୍ନମାନର ବୋଲି ଅଭିଯୋଗ କରିଥିଲେ। ଏହି ସବୁ ଘଟଣାକୁ ଦୃଷ୍ଟିରେ ରଖି ସରକାରୀ ନିୟମାନୁଯାୟୀ କାର୍ଯ୍ୟ କରିବାକୁ ବିଡିଓ ସଦାଶିବ ନାୟକ କହିବା ସହ ଜିମ୍ ପାଇଁ ଆସିଥିବା ସାମଗ୍ରୀ ଫେରାଇବାକୁ ନର୍ଦ୍ଦେଶ ଦେଇଥିଲେ।
କ୍ରୀଡା ବିଭାଗ ପକ୍ଷରୁ ୩ବର୍ଷ ତଳେ ବିଷମକଟକ ବ୍ଲକର ସଦରରେ ଏକ ଓପନ ଜିମ କରିବାକୁ ୧୫ ଲକ୍ଷ ଟଙ୍କା ଅନୁଦାନ ଆସିଥିଲା। ୫ ଲକ୍ଷରୁ ଊର୍ଦ୍ଧ୍ୱ ଟଙ୍କାର କାର୍ଯ୍ୟ ପାଇଁ ଟେଣ୍ଡେର କରିବାର ସରକାରୀ ନିୟମ ରହିଛି। ପେପର କଷ୍ଟ ଓ କେଉଁଦିନ ଟେଣ୍ଡେର ପକ୍ରିୟା ଆରମ୍ଭ ସେ ନେଇ ଯେ କୌଣସି ଦୌନିକ ଖବର କାଗଜରେ ବିଜ୍ଞପ୍ତି ଜାରି କରିବା କଥା। ହେଲେ ବ୍ଲକ ପ୍ରଶାସନ ଏହି ସବୁ ନିୟମ ଉଲ୍ଲଘଂନ ଜଣେ ଠିକାଦାରଙ୍କୁ ବିନା ଟେଣ୍ଡେରରେ କ୍ରୀଡା ବିଭାଗର କାର୍ଯ୍ୟଦେଶ ଜାରି କରିଥିଲେ। ଜିମ ସାମଗ୍ରୀ କିଣିବା ପୂର୍ବରୁ କୋଟେଶନ ଜାରି କରିବା କଥା। ଏହାକୁ ବେଖାତିର କରି ବ୍ଲକର ଜଣେ ଅଧିକାରୀ ବ୍ରହ୍ମପୁରରୁ ଅତି ନିମ୍ନମାନର ସାମଗ୍ରୀ ଆଣିବା ସହ ଠିକାଦାରଙ୍କୁ ଦେଇ ଓପନ ଜିମର କାର୍ଯ୍ୟ ଆରମ୍ଭ କରିଥିଲେ। ୧୫ ଲକ୍ଷ ଆନୁଦାନ ଆସିଥିବା ବେଳେ ମାତ୍ର ୨ ଲକ୍ଷ ରୁ ୩ ଲକ୍ଷ ଟଙ୍କା ସାମଗ୍ରୀ ଅଣା ଯାଇ ତରବରିଆ ଭାବେ କାର୍ଯ୍ୟ କରି ଲକ୍ଷାଧିକ ଟଙ୍କା ହଡପ କରିବାକୁ ଯୋଜନା ଥିବା ଅଭିଯୋଗ ହୋଇଥିଲା। ବିଷମକଟକର ଯୁବପିଢ଼ ଏହାର ଉଚ୍ଚସ୍ତରୀୟ ତଦନ୍ତ ଦାବି କରିଥିଲେ।ଏହାପରେ ଜିଲା ପ୍ରଶାସନ ଧଡ଼ପଗଡ଼ ଆରମ୍ଭ କରିଥିଲା। ବ୍ଲକ ପ୍ରଶାସନର ସମସ୍ତ ଅଧିକାରୀ ପରସ୍ପରକୁ ଦୋଷ ଦେଇ ଖସି ଯାଇଥିଲେ। ଏହି ସବୁ କଥା ନୂତନ ବିଡିଓ ସଦାଶିବ ନାୟକ ଜାଣି ସରକରୀ ନିୟମାନୁଯାୟୀ କାର୍ଯ୍ୟ କରିବା ପାଇଁ ନିର୍ଦ୍ଧେଶ ଦେଇଥିଲେ।